Kwamamaza

Isano shampiyona y’u Bwongereza ifitanye n’umugabane wa Afurika

Yanditswe kuya 5-09-2016 saa 21:10' na Manzi Rema Jules


Shampiyona y’u Bwongereza ni imwe mu zikurikirwa n’abantu benshi ku Isi, mu Rwanda no hirya no hino muri Afurika abantu barara amajoro bareba imikino yayo itandukanye bitewe n’uburyohe yihariye.

Premier League yerekanwa mu bihugu 212, mu ngo zisaga miliyoni 643, ndetse ikaba ishobora kurebwa n’abantu miliyari enye na miliyoni magana arindwi ku mwaka.

Iyi shampiyona ikinamo abakinnyi baturuka mu bice bitandukanye by’isi, barimo n’abakomoka ku mugabane wa Afurika.

BBC yagaragaje ibintu birindwi byerekana umwihariko w’abakinnyi b’Abanyafurika muri iyi shampiyona.

1. 9% by’abakinnyi bose bakina muri shampiyona y’u Bwongereza ni Abanyafurika

Mu bakinnyi 500 bashyizwe hanze n’amakipe 20 akina shampiyona y’u Bwongereza bazifashishwa mu mwaka w’imikino 2016/17, abagera kuri 46 bose ni abanyafurika, ariko hatabariwemo abakomoka kuri uyu mugabane bagiye gukinira ibihugu by’ahandi.

2. Amakipe 19 yose afite abakinnyi b’Abanyafurika uretse Burnley

Amakipe 19 muri 20 akina shampiyona y’u Bwongereza, buri imwe ifite nibura umukinnyi w’umunyafurika.

Sénégal ni cyo gihugu cyo muri Afurika gifite abakinnyi benshi muri iyi shampiyona bagera ku munani barimo Cheikhou Kouyate (West Ham United), Diafra Sakho (West Ham United), Pape Souare (Crystal Palace), Idrissa Gana (Everton), Oumar Niasse (Everton), Sadio Mane (Liverpool), Mame Biram Diouf (Stoke City) na Papi Djilobodji (Sunderland).

Ku mwanya wa kabiri haza Côte d’Ivoire ifite batandatu, Nigeria batanu, Algeria bane mu gihe Ghana ifite batatu.

Burnley ni yo kipe rukumbi idafite umukinnyi w’Umunyafurika. Tendayi Darikwa ufite se w’umunya-Zimbabwe, akaba yaravukiye mu Bwongereza yatangaje ko agiriwe icyizere yakinira Zimbabwe, ariko ntarahamagarwa.

3. Afurika ifite abakinnyi bakina kuri buri mwanya muri shampiyona y’u Bwongereza uretse mu izamu

Umugabane wa Afurika ushobora gukora ikipe y’abakinnyi bakina mu Bwongereza ariko ntishobora kubona umuzamu kuko na Steve Mandanda wavukiye muri Congo Kinshasa ukinira Crystal Palace ni umunyezamu mu ikipe y’Igihugu y’u Bufaransa ‘Les Bleus’.

4.Sunderland niyo ifite abakinnyi benshi b’Abanyafurika

Sunderland ni yo kipe ifite abakinnyi benshi baturuka ku mugabane wa Afurika, bagera kuri batandatu nyuma yo gusinyisha umunya-Nigera Victor Anichebe nyuma y’iminsi ibiri isoko ry’igura n’igurisha mu Bwongereza rifunze.

Abanyafurika bakina muri Sunderland barimo Papy Djilobodji (Sénégal), Wahbi Khazri (Tunisia), Lamine Kone (Côte d’Ivoire), Didier Ndong (Gabon), Steven Pienaar (Afurika y’Epfo), na Victor Anichebe (Nigeria).

Iyi kipe yanyuzemo abakinnyi bakomeye b’abirabura barimo umunya-Cameroun Patrick Mboma, Asamoah Gyan na John Mensah bo muri Ghana, Benjani Mwaruwari wo muri Zimbabwe na Talal El Karkouri wo muri Maroc.

Leicester City FC ifite igikombe cya shampiyona y’umwaka ushize ifite abakinnyi batanu b’Abanyafurika, igakurikirwa na Everton, Watford na West Ham United buri imwe ifite abakinnyi bane.

5. Ibihugu bibiri bya Afurika byabonye abakinnyi mu Bwongereza

Muri uyu mwaka w’imikino, bwa mbere mu mateka ibihugu bya Guinée Equatoriale na Libya byagize abakinnyi muri iyi shampiyona ku nshuro ya mbere.

Guinée Equatoriale yabonye myugariro Emilio Nsue wagiye muri Middlesbrough mu gihe Libya yabonye myugariro Sadik El Fitouri wakuriye mu ikipe y’abana ya Manchester United nyuma atizwa Salford City uyu mwaka akaba yaragarutse ahita ajya no mu ikipe ya mbere.

6. Eric Bailly yinjiye mu mateka ya ba myugariro bahenze ku Isi

Umunya- Côte d’Ivoire Eric Bailly nyuma yo kwerekeza muri Manchester United kuri miliyoni 30 z’ama-pound uyu mwaka, yahise aba myugariro wa mbere w’Umunyafurika waguzwe amafaranga menshi ndetse aza ku mwanya wa karindwi mu bahenze ku Isi.

7. Sadio Mane ni we mukinnyi w’Umunyafurika uhenze mu mateka ya ruhago

Uyu munya-Sénégal ukinira Liverpool afite agahigo ko kuba ari we mukinnyi w’Umunyafurika waguzwe amafaranga menshi kurusha abandi kuko uyu mwaka ava muri Southampton ajya muri Liverpool yatanzweho miliyoni 34 z’ama-pound.

Kapiteni wa Mali, Cheikhou Kouyate(wambaye nimero umunani) ukinira West Ham
Umunya-Nigeria Ahmed Musa ukina muri Leceister City

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved