Ibihugu by’i Burayi biratangira gushaka itike y’Igikombe cy’Isi cya 2022

Yanditswe na Bukuru JC
Kuya 23 Werurwe 2021 saa 09:56
Yasuwe :
0 0

Ibihugu 55 bigize Impuzamashyirahamwe y’Umupira w’Amaguru ku Mugabane w’u Burayi (UEFA) biratangira gushaka itike y’Igikombe cy’Isi cya 2022 muri iki cyumweru. Kylian Mbappé, Cristiano Ronaldo, Gareth Bale n’abandi bakinnyi bakomeye i Burayi bazahura hagati yabo.

Muri uru rugendo rugana muri Qatar mu 2022, ibihugu by’i Burayi bizakina imikino itatu mu gihe cy’iminsi irindwi gusa uhereye ku wa Gatatu.

Ibihugu bibiri bya mbere ku Isi; u Bubiligi n’u Bufaransa, bizahera ku mikino ikomeye bizakirira mu rugo ku wa Gatatu.

U Bufaransa bufite Igikombe cy’Isi giheruka, buri ku mwanya wa kabiri inyuma y’u Bubiligi, buzakira Ukraine mu mukino uzabera kuri Stade de France i Paris.

Umutoza Didier Deschamps yongeye guhamagara rutahizamu wa FC Barcelone, Ousmane Dembélé, Tanguy Ndombele wa Tottenham n’abandi barimo Paul Pogba, Antoine Griezmann, Anthony Martial na Kylian Mbappé.

Ku ruhande rw’u Bubiligi buzakira Pays de Galles kuri Stade Roi Bedouin i Brussels, umutoza Roberto Martinez ntabwo azaba afite kapiteni we, Eden Hazard, wavunitse.

Amakuru meza kuri uyu mutoza ni uko azaba afite rutahizamu Romelu Lukaku byashobokaga ko yasiba uyu mukino kubera ubwandu bwa COVID-19 buvugwa muri Inter Milan.

Abanya-Pays de Galles, bo bazakina n’u Bubiligi badafite Aaron Ramsey wa Juventus, wavunitse nk’uko byemejwe n’Ishyirahamwe ry’Umupira w’Amaguru muri icyo gihugu.

Ubwo ibihugu byombi byaherukaga guhura mu mikino ya nyuma ya Euro 2016, Pays de Galles yatsinze Amashitani Atukura ibitego 3-1. Abakinnyi bigaragaje muri uwo mukino barimo Hal Robson-Kanu na kapiteni Gareth Bale, bazerekeza mu Bubiligi.

Nyuma y’iminsi itatu, u Bubiligi buzisanga mu wundi mukino utoroshye, buzahuramo na Repubulika ya Tchèque, uzabera i Prague.

Ikipe y’umutoza Jaroslav Šilhavý imenyereye gukina imikino ya nyuma y’Igikombe cy’u Burayi, ariko yitabiriye Igikombe cy’Isi inshuro imwe mu 1994.

Undi mukino ukomeye ku munsi wa kabiri w’amatsinda ni uwo Portugal ya Cristiano Ronaldo izahuramo na Serbia ku wa Gatandatu.

Umutoza wa Portugal, Fernando Santos, afite amahitamo menshi mu busatirizi uhereye kuri kapiteni Ronaldo, Bruno Fernandes, André Silva, João Félix na Diogo Jota.

Serbia yakinnye igikombe cy’Isi inshuro ebyiri- mu 2010 na 2018, ariko yananiwe kurenga amatsinda muri izo nshuro zombi nubwo yatsinze Australia mu 2010 na Costa Rica mu 2018.

Abakunzi b’umupira w’amaguru muri Afurika bazabasha kureba iyi mikino yose yo gushaka itike y’Igikombe cy’Isi iri kuba mu mashusho meza ya HD ku mashene y’umupira w’amaguru ya StarTimes.

Iki kigo kiyoboye ibindi mu ikoranabuhanga ryo gusakaza amashusho ya televiziyo, gifite kandi uburenganzira busesuye bwo kuzerekana EURO 2020 izaba hagati ya tariki ya 11 Kamena n’iya 11 Nyakanga 2021.

StarTimes izerekana imikino yo gushaka itike y'Igikombe cy'Isi cya 2022 ku Mugabane w'u Burayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .