Ibice byose bya Stade Amahoro bigiye gusakarwa

Yanditswe na Ndayishimye Jean Claude
Kuya 8 Gicurasi 2018 saa 11:40
Yasuwe :
1 0

Ikigo cy’Igihugu cy’imiturire (RHA) cyatangaje ko mu gihe cya vuba hagiye gutangira imirimo yo kuvugurura Stade Amahoro, ibice byayo byose bigasakarwa.

Byatangajwe kuri uyu wa Kabiri ubwo Minisiteri y’Ibikorwaremezo (Mininfra) n’ibigo biyishamikiyeho byasobanuriraraga Komisiyo y’Ingengo y’imari mu Mutwe w’Abadepite, uko bakoresheje ingengo y’imari ya 2017-2018 n’ibiteganyijwe gukorwa mu ya 2018-2019.

Umuyobozi Mukuru wa RHA, Serubibi Eric, yavuze ko mu byo bateganya gukora vuba harimo gusakara ibice byose bya Stade Amahoro kuko ubusanzwe igice kinini cyayo kidatwikiriye.

Serubibi yabwiye IGIHE ko inyigo yo kuvugurura Petit Stade yarangiye naho iyo kuvugurura Stade Amahoro ikazarangira mu matariki yo hagati y’uku kwezi, hakazahita hatangira gahunda y’itangwa ry’amasoko ku masosiyete y’ubwubatsi.

Yagize ati “Iyo inyigo irangiye ikiba gikurikiyeho ni ugutangira ibyo gutanga amasoko, ubwo bizahita bitangira uku kwezi kurangiye."

Yemeje ko izo nyigo zizagaragaza ko izo stade zitazamara igihe zivugururwa, bizatwara hagati y’amezi 10 n’umwaka.

Uyu muyobozi yirinze gutangaza ingano y’amafaranga bizatwara mu kuvugurura izo stade.

Yagize ati “Ingengo y’imari ntabwo nahita nyivuga nonaha, abakoze inyigo baracyatubarira.”

Minisiteri ya Siporo n’Umuco isanzwe ikorera muri Stade Amahoro ariko biteganyijwe ko izimurirwa ahandi mu gihe imirimo izaba yatangiye.

Mu bindi bikorwa byo kuvugurura, hateganyijwe ko hazanavugururwa Petit Stade, muri gahunda yo kwitegura imikino nyafurika ya Basketball izabera i Kigali umwaka utaha.

Uretse izi stade zombi, hanateganyijwe ko mu turere hazubakwa Stade ya Nyagatare, iya Bugesera ndetse n’iya Ngoma.

Hateganyijwe kandi ko hazarangizwa burundu imirimo yo kubaka Stade ya Huye.

Stade Amahoro ikunze kwakira ibikorwa bitandukanye birimo imikino n’ibirori bitandukanye birimo iby’igihugu.

Umuyobozi Mukuru wa RHA, Serubibi Eric, yari imbere y'Abadepite
Ibice byose bya Stade Amahoro bigiye gusakarwa. Ifoto yafashwe na Niyonzima Moses ku wa 25 Kanama 2017, mu muhango wo gushyikiriza impamyabumenyi abanyeshuri 8252 ba Kaminuza y’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza