Kwamamaza

Ibibazo by’imishahara muri Rayon Sports yitegura gukina irushanwa rya AS Kigali

Yanditswe kuya 7-09-2016 saa 20:59' na Manzi Rema Jules


Mu gihe hasigaye amasaha make Rayon Sports ikinjira mu rugendo rwo guhatanira igikombe n’andi makipe arindwi mu irushanwa ryateguwe na AS Kigali rizatangira kuri uyu wa Kane tariki 8 Nzeli, muri iyi kipe y’i Nyanza haravugwamo ibibazo byo kudahemba abakinnyi bishobora no gutuma batazarikina mu gihe iki kibazo kitarakemuka.

Si ubwa mbere ibibazo by’amikoro bigaragara muri Rayon Sports ariko hari hashize iminsi bitumvikana mu itangazamakuru. Mu minsi ya nyuma ya shampiyona y’umwaka ushize yarangiye yaba agahimbazamusyi ku mikino ikipe yitwayemo neza ndetse n’imishahara y’abakinnyi babihabwa ku gihe byanatumye ibasha kwegukana igikombe cy’Amahoro.

Nk’uko abakinnyi babitangaza, muri iki gihe bari bamaze bakora imyitozo nta mushahara bigeze bahabwa, ikibazo cyatumye Perezida w’ikipe, Gacinya Denis kuri uyu wa Gatatu aganiriza abatoza n’abakinnyi bahagarariye abandi barimo kapiteni Ndayishimiye Eric Bakame, Manzi Thierry, Manishimwe Djabel na Munezero Fiston ku bijyanye n’uburyo ikibazo cyakemuka.

Nyuma y’ibyo biganiro, umutoza Masoudi Djuma yatangaje ko basezeranyije abakinnyi ko bashobora kubona amafaranga yabo ku mugoroba wo kuri uyu wa Gatatu, byatinda bakaba bayabona mbere y’uko umukino w’ejo utangira.

Yagize ati “Narabivuze hano buri muntu agomba gukora akazi ke, njye ndatoza, abafana bagafana abagize Komite bagashaka amafaranga, nta bindi. Iyo kimwe gipfuye urumva ni ibibazo, bagomba kubikora [guhemba] kandi uno munsi abakinnyi barajya mu mwiherero. Bagomba kuwujyamo bafite morale ihagije. Ejo nimuramuka mubabonye mu kibuga ni uko bazaba bayahawe.”

Masoudi avuga ko imyiteguro ijyanye no mu kibuga yagenze neza, abakinnyi bose bameze neza. Abarundi, Kwizera Pierrot na Nahimana Shasir bari bagiye mu ikipe y’igihugu bagomba kurara uyu munsi bageze mu Rwanda.

Masoudi yatangaje ko nta gihindutse Kwizera yabanza mu kibuga nubwo atakoranye n’abandi imyitozo ariko ngo asanzwe amenyereye umwuka uri mu ikipe.

Abakunzi b’iyi kipe bagiye kubona bwa mbere Rayon Sports itarimo ba rutahizamu bayitsindiye ibitego byinshi umwaka ushize, Davis Kasirye na Ismaila Diarra bose bamaze kwerekeza muri DCMP yo muri Congo Kinshasa mu irushanwa rizitabirwa n’amakipe yo mu Rwanda ndetse n’azaturuka muri Congo.

Ni n’umwanya wo kureba abandi bakinnyi, iyi kipe yazanye bayobowe na rutahizamu ukomoka muri Mali, Mussa Camara wigaragaje cyane mu mikino ya gicuti, ndetse benshi batangiye kugereranya na Ismaila Diarra.

Kuri uyu wa Kane saa 18h00, nibwo biteganyijwe ko Rayon Sports izakina na Police FC mu irushanwa ryateguwe na AS Kigali.

Uyu mukino ndetse n’ufungura irushanwa uzahuza AS Kigali yariteguye na AS Vita Club yo muri Repubulika Iharanira Demokarasi ya Congo uzatangira saa 15h 30 kuyireba ni amafaranga 5000 mu myanya y’icyubahiro, 3000 impande zaho na 2000 ahasigaye hose.

Manzi Thierry wari wahamagawe mu ikipe y'Igihugu yakinnye na Ghana yakoze imyitozo
Ndayishimiye Eric Bakame(ibumoso) na Bashunga Abouba (iburyo) mu myitozo yo kuri uyu wa Gatatu
Rutahizamu Mussa CamaRa (iburyo) ni umwe mu bakinnyi bashya, abafana ba Rayon Sports bitezeho byinshi
Abafana bari baje kureba imyitozo
Abakinnyi n'abatoza basenga nyuma yo kurangiza imyitozo
Dominique Nshuti Savio wari mu ikipe y'Igihugu, Amavubi yamaze kugaruka muri Rayon Sports n'inyogosho nshya
Lomami Frank wavuye muri Musanze FC na we ari muri ba rutahizamu bitezweho ibitego
Inama yateranye nyuma y'imyitozo Perezida Gacinya Denis asezeranya abakinnyi kubona amafaranga
Perezida Gacinya yabanje kuvugana n'abatoza Masoudi Djuma (hagati) na Maso wambaye ingofero

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved