Ibanga ry’imirire ya Cristiano Ronaldo ritumye agira imyaka 34 akiri ku isonga ku isi

Yanditswe na Ndayikunda Josué
Kuya 13 Mutarama 2020 saa 02:21
Yasuwe :
0 0

Ruhago ni umwe mu mikino itanga ibyishimo ku bantu benshi, ibi bikajyana n’ubuhanga bw’abayikina. Ku bakinnyi usanga nabo baryoherwa no gutera umupira upima garama 450 bikaba akarusho iyo bari mu bihe byabo byiza.

Uyu mukino ugira ijambo ryamaze kuba nk’icyita rusange rigira riti “yabaye umusaza”. Ku bakunzi b’umupira w’amaguru, umukinnyi winjiye mu myaka iri hejuru ya 30 batangira kumwita umusaza.

Ibi ariko biba bifite impamvu kuko iyo umukinnyi atangiye kugaragaza intege nke mu kibuga, uwatsindaga ibitego bigatangira kuba iyanga, abakurikirana ruhago bo bahita batangira kubibarira mu myaka.

Abakinnyi benshi usanga iyo bageze hejuru y’imyaka 30 imbaduko n’imbaraga bari bafite bigabanuka, imvune zitangira kubibasira ndetse n’abatoza bagatangira kubaha iminota mike mu kibuga.

Ibi si ko bimeze kuri Cristiano Ronaldo, umunya-Portugal ufite imyaka 34 ariko bikaba bitamubuza gukomeza guhindukiza abanyezamu akaba n’inkingi ya mwamba mu ikipe ye y’igihugu na Juventus yo mu Butaliyani.

Iyo witegereje imikinire ye, usanga nta n’ibimenyetso agaragaza byo kuba yamanika inkweto nka bagenzi be bahitamo gushyira akadomo kuri ruhago iyo bageze muri iyi myaka cyangwa bakajya muri za Shampiyona ziri ku rwego ruciriritse.

Umunyarwanda yaravuze ngo “ntakabura imvano.” Kuba Cristiano akiri igihangange ku Isi ndetse akaba agitsinda ibitego, anatwara ibikombe hirya no hino ku myaka abenshi bavuga ko umukinnyi aba yashaje, we afite ibanga yibitseho ari naryo kugeza ubu rimuhetse ku buryo amakipe agiye guhura na we yikanga imirindi ye.

Imirire y’uyu mugabo w’abana bane ni imwe mu ntwaro ikimufashije kuguma ku ruhando rw’abakinnyi b’intarumikwa ku isi.

Cristiano Ronaldo afata ifunguro rito inshuro esheshatu ku munsi, bivuze ko buri nyuma y’amasaha hagati y’atatu n’ane afata ifunguro. Amafunguro ye aba yiganjemo ibinyampeke, imbuto, amafi n’inkoko bikungahaye ku ntungamubiri.

Aya mafunguro yose Ronaldo ayafata atabanje gushyirwa mu byuma bikonjesha, akaba anaherekejwe na “salade” nyinshi.

Ku mafunguro ye ya mu gitondo, Cristiano akunda gufata ‘fromage’, amata atarimo ibinure na voka. Indyo Ronaldo afata igirwamo uruhare n’umuhanga mu by’imirire we ku giti cye wamukurikiranye kuva akiri muri Real Madrid kugeza ubu.

Cristiano yita bikomeye ku buzima bwe hanze y’ikibuga bitandukanye n’abandi bafata uwo mwanya nk’uwo gusohokera mu tubari no mu tubyiniro cyangwa kurya ibyo babonye byose. Inyama zitukura n’amafunguro yashyizwe mu byuma bikonjesha ni ikizira kuri uyu rutahizamu.

Patrice Evra bigeze gukinana muri Manchester United ni umwe mu batangariye imyitwarire ye hanze y’ikibuga nyuma yo kumusura.

Yagize ati “Nagira inama umuntu wese kutitabira ubutumire bwa Cristiano mu rugo iwe kuko uyu musore ni imashini kandi ntahwema gukora imyitozo. Nagiye iwe naniwe ariko ansaba ko dukorana imyitozo. Ku meza haba hari salade, inkoko n’amazi gusa, nta bindi binyobwa biharangwa.”

Cristiano Ronaldo agira akaruhuko gato k’iminota 90 inshuro eshanu ku munsi, ibi abikora n’iyo ari mu kiruhuko abakinnyi bagira nyuma ya za shampiyona zabo.

Amaze gutwara ibikombe bya Champions League bitanu n’imipira ya zahabu itanu. Kuri ubu Ronaldo amaze gutsinda ibitego 14 muri Shampiyona y’uyu mwaka w’imikino wa 2019/2020 mu Butaliyani, inyuma ya Ciro Immobile ufite 20.

Salade ntiyabura ku mafunguro ya Cristiano Ronaldo
Cristiano Ronaldo akunda kurya ibiryo byiganjemo ifi n'inkoko
Ku myaka 34 Cristiano Ronaldo aracyatwara ibikombe
Patrice Evra we agereranya Cristiano Ronaldo n'imashini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza