Ibanga ritumye Rayon Sports imara imikino itandatu itarinjizwa igitego

Yanditswe na Philbert Girinema
Kuya 27 Ugushyingo 2016 saa 11:24
Yasuwe : XX
0

Umukino Rayon Sports yatsinzemo Bugesera FC igitego kimwe ku busa wabaye uwa Gatandatu iyi kipe yambara ubururu n’umweru itarinjizwa igitego na kimwe; biturutse ku nama abinyuma bahawe n’umutoza Masoudi Djuma.

Kuri ubu Rayon Sports ifite amanota 16 mu mikino itandatu ya shampiyona ikaba yaratsinze itanu inganyiriza i Rusizi na Espoir FC ubusa ku busa i Rusizi.

Niyonzima Olivier Sefu watsinze igitego cya mbere kuva yagera muri Rayon Sports kuri uyu wa Gatandatu tariki 26 Ugushyingo, yatangaje ko Masoudi Djuma yabasabye kujya birinda gukinira imbere y’izamu ryabo ahubwo buri gihe bakaba bari gusatira mukeba. Iyi niyo mpamvu batarinjizwa igitego na kimwe kuva shampiyona yatangira.

Ati “Turabashwa no kuba dukorera hamwe, tukumva umutoza. Akunda kutubwira ko tutagomba gukinira imbere y’izamu kugira ngo tutinjizwa igitego. Niyo mpamvu mubona tuba twarihunze kugira ngo n’ukoze ikosa tubashe kugarura mukeba ataragera ku izamu.”

Niyonzima Olivier “Sefu” w’imyaka 20, ukina hagati yunganira ubwugarizi yageze muri Rayon Sports avuye mu Isonga FC. Ashimangira ko muri iyi kipe hari umwuka mwiza aho yavuze ko “Umutoza aradufasha cyane kuko tuba twisanzuranyeho, dutera urwenya. Bituma duhorana imbaraga no gukina nta kwizigama.”

Rayon Sports igomba gusura Amagaju FC ku munsi wa karindwi wa shampiyona tariki 4 Ukuboza 2016, kuri ubu iri ku mwanya wa mbere n’amanota 16 irusha atandatu Sunrise FC igomba gusura Etincelles FC kuri iki Cyumweru ikarusha mukeba w’ibihe byose, APR FC amanota umunani nubwo yo igifite ibirarane bibiri harimo icyo izakirami Kirehe FC n’icyo izasuramo Pepiniere FC.

Sefu avuga ko gukorera hamwe no kumvikana ari imwe mu ntwaro zifashije Rayon Sports muri iki gihe
Niyonzima Olivier Sefu yabashije gutsinda igitego cya mbere kuva yagera muri Rayon Sports
Masoudi Djuma yasabye ba myugariro kwitarura izamu ahubwo bagakinira mu kibuga cya mukeba
Abakinnyi ba Rayon Sports bashimira abafana nyuma y'umukino na Bugesera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE