00:00:00 IGIHE NETWORK KN KINYARWANDA EN ENGLISH FR FRANCAIS

Hoteli Messi acumbitsemo yatewe n’abajura

Yanditswe na Bukuru JC
Kuya 2 Ukwakira 2021 saa 08:54
Yasuwe :
0 0

Hoteli ihenze icumbitsemo rutahizamu wa Paris Saint-Germain, Lionel Messi, yatewe n’abajura bipfutse ku maso ku wa Gatatu w’iki cyumweru, aho batwaye bimwe mu bintu by’agaciro by’abandi bayibamo.

Messi ari kuba muri hoteli Le Royal Monceau y’i Paris hamwe n’umugore we n’abana babo batatu, ariko kuri ubu umutekano wabo watangiye kwibazwaho mu gihe gito amaze ageze mu Bufaransa.

Ibinyamakuru bitandukanye birimo Daily Mirror byatangaje ko ku wa Gatatu w’iki cyumweru, abagabo bipfutse ku maso binjiriye mu idirishya rya kimwe mu byumba by’iyi hoteli bakahiba.

Umwe mu bagore bacumbitse muri iyi hoteli yibwe agakufe gafite agaciro ka 3000£ (agera kuri miliyoni 4 Frw), amaherena afite agaciro ka 500£ (asaga ibihumbi 670 Frw) n’amafaranga 2000£ (agera kuri miliyoni 2,7 Frw).

Amashusho yafashwe na camera za CCTV agaragaza abagabo bipfutse ku maso binjira mu nyubako banyuze mu idirishya ryari ridafunze hafi y’aho Messi aba. Bivugwa ko icyumba kimwe cyishyurwa ibihumbi 17£ (hafi miliyoni 23 Frw) ku ijoro.

Bivugwa ko kandi umutekano wari wakajijwe kuri iyi hoteli nyuma yo kuyigeramo kwa Lionel Messi, ariko kuri ubu bikaba bidahagije nyuma y’uko bamwe mu bakiliya bayo babuze ibyo bari basize mu byumba.

Umupolisi wo muri ako gace yabwiye abanyamakuru ko umutekano utacunzwe neza ndetse hari gukorwa iperereza.

Si ku nshuro ya mbere ibi bibaye ku mukinnyi wa PSG. Mu ntangiriro z’uyu mwaka, Angel Di Maria wari mu kibuga bakina na Nantes, yasimbujwe igitaraganya ubwo Leonardo [Umuyobozi wa Siporo muri PSG] yabwirwaga ibyaberaga mu rugo rw’uyu mukinnyi ruri mu gace ka Neuilly-sur-Seine.

Icyo gihe, Di Maria yihutiye kugera mu rugo kureba umugore n’abana be.

Kuri ubu, Lionel Messi n’umuryango we, bateganya kuva muri iyi hoteli y’inyenyeri eshanu nyuma y’uko bamaze kubona inzu yo gukodesha i Paris.

Hoteli Messi acumbitsemo n'umuryango we i Paris, yatewe n'abajura muri iki cyumweru
Hoteli Le Royal Monceau ni imwe mu zihenze cyane i Paris

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .