Hatangajwe umunsi APR FC na Mukura VS zizahura muri Super Cup

Yanditswe na Nshimiyimana Jean Baptiste
Kuya 21 Nzeri 2018 saa 06:52
Yasuwe :
0 0

Ishyirahamwe ry’Umupira w’Amaguru mu Rwanda (Ferwafa), ryatangaje ko umukino w’igikombe kiruta ibindi ‘Ferwafa Super Cup’ uzakinirwa kuri Stade Umuganda kuwa 6 Ukwakira 2018.

Uyu mukino uzahuza APR FC yatwaye igikombe cya Shampiyona ya 2017/2018 ifite amanota 66 na Mukura VS yatwaye igikombe cy’amahoro itsinze Rayon Sports, penaliti 3-1 nyuma yo kunganya 0-0 mu minota 120 y’umukino.

Nk’uko bigaragara ku rubuga rwa Ferwafa, uyu mukino uzatangira saa cyenda (15h00).

Ni ubwa mbere Mukura VS igiye guhurira na APR FC ku mukino wa Super Cup, mu nshuro eshatu izaba ikinwe mu Rwanda.

Ikipe y’ingabo z’Igihugu (APR FC) yasoje shampiyona ya 2017/2018 itsinze imikino 19, inganya 9, itsindwa 2, yinjiza ibitego 51, yo yinjizwa 15 gusa mu mikino 30.

Mukura VS yasoje ku mwanya wa munani, ndetse igikombe cy’Amahoro yatwaye ni icya mbere kuva mu 1992.

Iyi kipe yo mu Majyepfo y’u Rwanda yatwaye igikombe cy’Amahoro mu 1978, 1986 na 1990. Mu myaka 10 ishize batsinzwe ku mukino wa nyuma ibitego 4-2 na APR FC mu 1999, Rayon Sports ibatsinda 3-0 mu 2005, na ATRACO ubu itakibaho ibatsinda 1-0 mu 2009.

Igikompe cya Super Cup kibanjirije Shampiyona ya 2018/2019 y’icyiciro cya mbere izatangira kuwa 19 Ukwakira 2018.

APR FC izahagararira u Rwanda mu irushanwa Nyafurika ry’amakipe yabaye aya mbere iwayo Total CAF Champions League, mu gihe Mukura izaba iri mu irushanwa ry’ayatwaye ibikombe by’igihugu Total CAF Confederations Cup.

Rayon Sports yatwaye Super Cup y’umwaka ushize itsinze APR FC ibitego 2-0 mu mukino wabereye i Rubavu ugasorezwa i Kigali kubera ikibazo cy’amashanyarazi cyabaye kuri Stade Umuganda ubwo umukino wari usigaje iminota 27 gusa ngo urangire.

APR FC izacakirana na Mukura VS mu mukino wa Super Cup

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza