Kwamamaza

Haruna yahishuriye Minispoc na Ferwafa ikibura ngo Amavubi yongere kwesura amahanga

Yanditswe kuya 31-08-2016 saa 21:35' na Manzi Rema Jules


Kuva mu mwaka wa 2004 u Rwanda rwitabira igikombe cya Afurika rutozwa na Ratomir Dujković wari umaze imyaka ine ategura abo bakinnyi bakoze amateka atarongera kubaho, ikipe y’umupira w’amaguru y’u Rwanda Amavubi, amaze gutozwa n’abatoza 15 mu myaka 12, muri bo uwahawe igihe kinini ni Milutin Sredojević Mico wamaze imyaka ibiri na ho abandi birukanwa nyuma y’amezi ugiriwe icyizere akamara umwaka umwe.

Ni ikibazo cyashakirwa mu mpande zitandukanye, kuko abayobora umupira w’amaguru mu Rwanda basobanura ko abo batoza birukanwa kuko badashoboye nyamara ababikurikiranira hafi bakemeza ko ababazana bakabaha ako kazi ndetse bakabaha n’amategeko bagenderaho ari bo badashoboye.

Umutoza w’Amavubi uheruka gusezererwa ni Umunya-Ireland y’amajyaruguru, Johnny McKinstry w’imyaka 30, wari wahawe gutoza Amavubi muri Werurwe 2015 atoranyijwe mu mazina akomeye afite amateka mu mupira nka Hans Michael Weiss, umudage wari warigeze gutoza Amavubi U20 hagati ya 2007-2010 ari n’umuyobozi wa tekinike mu Rwanda anatoza Philippines hagati ya 2011-2014.

Undi ni Jose Manuel Ferreira de Morais, umunya-Portugal w’imyaka 51 watoje amakipe agera kuri 12 arimo Benifica y’abana muri 2000-2001, Espérance de Tunis 2008-2009, kuri ubu atoza Antalyaspor mu cyiciro cya mbere muri Turikiya.

Si aba bonyine kuko na Engin Firat umudage w’imyaka 46, watoje Antalyaspor yo muri Turikiya kuva 1998-1999, Eintracht Frankfurt, Fenerbahçe n’andi agera kuri 16.

Uretse aba kandi, icyatunguranye cyane ni uguhitamo Mckinstry wari umaze gutoza igihugu kimwe mu mateka ye cya Sierra Leone na cyo nta bitangaza yahakoze, bakirengagiza Ratomir Dujković wari warajyanye Amavubi muri CAN 2004 wari wongeye gusaba ko yagaruka muri iyi kipe.

Mu gihe u Rwanda rwitegura gukina na Ghana, igihugu u Rwanda rwakuyeho itike muri 2004 rugitsinze igitego 1-0 cya Jimmy Gatete i Kigali, kapiteni w’Amavubi Haruna Niyonzima yasabye Minisiteri ya Siporo n’umuco (MINISPOC) ndetse n’ishyirahamwe ry’umupira w’amaguru mu Rwanda ( FERWAFA) kwirinda guhindagura abatoza bya hato na hato kuko iyi ari yo ntandaro yo kwitwara nabi kw’Amavubi.

Yagize ati “Icyo nasaba, nibagire kwihangana kuko n’umwana iyo umubyaye ntahita agenda, abanza gukambakamba. Tuzatsinda rimwe cyangwa kabiri ariko igihe kizagera dutsinde. […] njye ndi umukozi, umukoresha bampaye ni we dukorana ariko ntibiba byoroshye. No mu buzima busazwe iyo utagira kwihangana ntutera imbere, tujye twihangana twumve ko turimo twubaka, bizaza.”

Yongeyeho ati “ Ndakeka uyu munsi n’iyo watuzanira Mourihno nta kintu twakora, natanga nk’urugero twakinnye na Ghana hano 2003 ariko mureba aho bari kuko baragiye barategura umuntu yakosa ntibumve ko birangiye bakamuha andi mahirwe, ni ko umupira umera. Niba umuntu tumuhaye akazi tujye tumuha n’icyizere. Ni byiza, nasanze dufite abatoza bo mu rugo, niba babahaye icyo cyizere nibabashyigikire turebe, ibintu byose ni ukugerageza.”

Mu batoza basezerewe mu Mavubi harimo abagiye nyuma bakagira ibyo batangaza nka Mckinstry wavuze ko atananiwe gukora akazi kari kamuzanye ahubwo yananijwe na bamwe mu bo bakoranaga ndetse akagira ati “Umupira wo mu Rwanda ntaho uzagera igihe uyobowe n’abatawuzi.”

Abatoza 15 bamaze gutoza Amavubi kuva muri 2004

Ratomir Dujković 2001-04, Roger Palmgren 2004-05, Michael Nees 2006-07, Josip Kuže 2007-08, Raoul Shungu 2008 (ari umutoza w’agateganyo), Branko Tucak (2008–09), Eric Nshimiyimana 2009–10 (ari umutoza w’agateganyo), Sellas Tetteh (2010–11), Milutin Sredojević (2011–13), Eric Nshimiyimana (2013–14), Stephen Constantine (2014–2015), Lee Johnson 2015 (ari umutoza w’agateganyo), Johnny McKinstry (2015–16) Gilbert Kanyankore 2016 (ari umutoza w’agateganyo) na Jimmy Mulisa 2016 (umutoza w’agateganyo).

Haruna Niyonzima asaba ko abayobozi b'umupira w'amaguru bakwiye kurangwa no kwihangana
Jimmy Mulisa ni we wahawe Amavubi by'agateganyo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved