Haruna Niyonzima ashobora kwirukanwa muri Simba SC

Yanditswe na Ngabo Roben
Kuya 2 Ugushyingo 2018 saa 01:36
Yasuwe :
0 0

Kapiteni w’ikipe y’igihugu y’u Rwanda Haruna Niyonzima ashobora kwirukanwa muri Simba SC yo muri Tanzania imushinja imyitwarire mibi, ndetse bivugwa ko yanatangiye kurambagiza umukinnyi wo hagati wo kumusimbura.

Tariki 21 Kamena 2017 nibwo Niyonzima yafashe umwanzuro wo kuva muri Yanga Africans, yerekeza muri mukeba wayo Simba Sports Club, amakipe yombi y’i Dar es Salaam muri Tanzania.

Uyu mukinnyi wo hagati ntiyahiriwe n’ubuzima mu ikipe nshya kuko yayikiniye amezi abiri gusa agahita agira ikibazo cy’imvune ku kirenge, cyatumye ajya no kuvurirwa mu Buhinde.

Nyuma yo gukira no gutangira imyitozo muri Werurwe uyu mwaka, ntabwo yagiye abona umwanya wo kubanza mu kibuga, anashinjwa n’ikipe ye imyitwarire mibi irimo kutitabira imyitozo n’ibindi bikorwa by’ikipe ku gihe.

Ibyavuzwe cyane ni uko atitabiriye imyitozo n’imikino ya gicuti Simba SC yakinnye muri Turikiya muri Kanama na Nzeri nta ruhushya, na nyuma y’imikino y’ikipe y’igihugu Amavubi yakinnye na Guinea, ngo yatinze gusanga bagenzi be mu myitozo yitegura shampiyona.

Souleyman Kova ushinzwe imyitwarire y’abakozi muri Simba SC yabwiye ikinyamakuru ‘MwanaSpoti’ cyo muri Tanzania ko mu ntangiriro z’iki cyumweru bagiranye ibiganiro na Haruna Niyonzima.

Ati “Nibyo twaganiriye na Haruna ku bibazo by’imyitwarire ye. Twamutumije dushaka kuganira nawe nubwo icyo twagezeho tutagitangaza. Ibijyanye no kumwirukana ntacyo nabivugaho. Icyo nzavuga ni uko agifite amasezerano bityo kumwirukana ntabwo ari ikintu twakora duhubutse kuko byaduhenda kurushaho.”

Simba Sports Club bivugwa ko iri kwiga uburyo yakoresha ngo itandukane na Niyonzima kuko abahenda cyane kandi nta musaruro atanga.

Ni nyuma y’umwaka umwe gusa aguzwe miliyoni 180 z’amashillingi ya Tanzania - asaga miliyoni 66 z’amafaranga y’u Rwanda - akaba ahembwa 4000$, ni ukuvuga asaga miliyoni 3 384 000 Frw.

Iyi kipe yo muri Tanzania yanatangiye gushaka umusimbura wa Niyonzima kuko iri mu biganiro n’umukinnyi wo hagati wa Gor Mahia FC, umunya-Kenya Francis Kahata Nyambura, bivugwa ko ashobora kugurwa muri uku kwezi.

Yahita asanga yo mugenzi we Kagere Meddie nawe waguzwe na Simba SC avuye muri Gor Mahia.

Haruna Niyonzima ashobora kwirukanwa na Simba SC, nyuma y'igihe ari mu bihano ndetse akora imyitozo wenyine
Franciss Kahata ashobora kongera gukinana na Kagere muri Simba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza