Kwamamaza

Ahazaza h’Amavubi mu mboni ya Mbonabucya, Kayiranga na Kazungu

Yanditswe kuya 30-08-2016 saa 17:39' na Manzi Rema Jules


Ikipe y’Igihugu, Amavubi yavutse muri 1964 nyuma y’igitekerezo cyazanywe n’abari abayobozi ba ruhago, bafashe icyemezo cyo guhuriza hamwe abakinnyi, b’umupira w’amaguru mu Ruhengeri , bagahitamo ikipe igomba guhagararira u Rwanda.

Imyaka hafi 52 irashize Amavubi avutse, imyaka 17 Rwanda B itwaye igikombe cya CECAFA mu 1999, ari nacyo rukumbi igihugu gifite mu mikino mpuzamahanga, imyaka 12 Amavubi akoze amateka bwa mbere akabasha kwitabira imikino y’igikombe cya Afurika cya 2004 muri Tunisia.

Kuva icyo gihe Abanyarwanda baracyategereje kongera kubona ikipe y’igihugu itamba mu mikino mpuzamahanga ariko amaso yaheze mu kirere.

Benshi mu bakunzi b’umupira w’amaguru bibaza niba u Rwanda ruzongera kwitabira CAN ndetse niba rushobora kuyegukana.

U Rwanda rutera imbere umunsi ku munsi mu mibereho myiza y’abaturage, ubuzima, uburezi, ibikorwa remezo biriyongera ubutitsa hirya no hino mu gihugu, isuku n’umutekano nabyo biza ku isonga mu gukurura amahanga akaza kwigira ku rw’imisozi 1000 uko igihugu gishobora kwiyubaka vuba nyamara hashize imyaka 22 gusa kibayemo Jenoside yagisenye ikanatwara ubuzima bw’abasaga miliyoni.

Nubwo impinduka z’iterambere zigaragarira buri wese mu gihugu no hanze yacyo, abakunzi b’umupira w’amaguru uko umwaka ushi undi ukaza bakomeza kugaragaza ko urwego rwa ruhago ari rwo rusa n’aho rudafite icyerekezo kuko ibyo bahora bizezwa byakomeje kuba inzozi ahari zitazanasohora mu myaka ya vuba.

Abasesenguzi ba ruhago babona gute icyerekezo cy’umupira w’amaguru mu Rwanda

IGIHE yaganiriye na bamwe mu basesenguzi b’umupira w’amaguru mu Rwanda ariko banawumazemo igihe nka Kayiranga Baptiste, umutoza wa Pépinière FC, Kazungu Clever wamaze igihe kirekire mu mwuga w’itangazamakuru ry’imikino na Désiré Mbonabucya wari kapiteni w’Amavubi 2004 muri CAN.

Aba bose ikintu bahurizaho ni uko umupira wo mu Rwanda nta cyerekezo gihamye ufite, ndetse bagashimangira ko igihe hatagiyeho amarushanwa y’abana n’ubuyobozi buzi umupira nta gishobora kuzagerwaho.

Kayiranga wakinnye umupira ndetse akaza no kuba umutoza ukomeye mu makipe nka Rayon Sports, Kiyovu Sports, Mukura VS, AS Kigali, Gicumbi, Amavubi makuru n’ ay’abatarengeje imyaka 20 yatanze impamvu eshatu zizitira iterambere rya ruhago y’u Rwanda.

Ku isonga iya mbere ikaba ari ugushakira umusaruro wihuse ku mukinnyi nyamara ntacyatanzwe ngo ategurwe ndetse rimwe na rimwe ntawe uzi aho yavuye, uko yakuze yewe nta n’ukeneye kumenya uwagize uruhare mu izamuka rye ngo ahabwe agaciro.

Umutoza Kayiranga Jean Baptiste ashimangira ko umupira ugomba guhera mu bato

Yagize ati “Mu Rwanda ntitwabuze impano mu mupira, ahubwo dushaka ibya huti huti nyamara ntacyo biduha? Namwe murakibona. Amashuri y’umupira w’amaguru hirya no hino mu gihugu agomba guhabwa agaciro, abatoza bayo bakagenerwa amahugurwa, n’ibikoresho by’ibanze. Turamutse twihaye imyaka itanu, twaba twarabonye abana bazi umupira ndetse tukagira n’ikipe ikomeye.”

Amarushanwa y’abana niyo agaragaza icyerekezo cy’umupira ariko mu Rwanda yarapfuye

Kayiranga avuga avuga ko nta na rimwe umupira ushobora gutera imbere igihe nta marushanwa y’abana ashyizweho ndetse n’imikino ihuza ibigo by’amashuri ngo yongere ivugururwe kuko ubu ngo isa n’iyapfuye.

Yagize ati “Ikintu njye mbona gishoboka ni ugutegura duhereye hasi. Si igitangaza ko dushaka abakinnyi mu Ikipe y’Igihugu y’abato tukababura kuko nta rushanwa na rimwe ryabo ribaho aho ushobora kujya kubashakira.”

Yakomeje agira ati “Mu bihugu byadusize, umwana atangira gutozwa akiri mu myaka itanu akazamuka nta cyiciro asimbutse ariko twe urabyuka ukabona umukinnyi utazi aho avuye ahamagawe mu Mavubi kuko yigaragaje rimwe. Uko si ugutegura by’igihe kirambye kandi ntaho byatugeza.”

Nubwo Kayiranga avuga ibi, mu minsi ishize, Kayiranga yatanze itangazo ahamagarira ababyeyi bafite abana b’ibigango kubohereza mu ikipe y’igihugu y’abatarengeje imyaka 20 yari mu mikino yo gushaka itike yo kujya mu gikombe cya Afurika.

Isonga FC, umushinga mwiza wizwe unacungwa nabi

Kayiranga agira ati “ Isonga yari gahunda nziza yari no gutanga umusaruro kuko turabibona iyo umwaka warangiraga wasangaga aya makipe akomeye arwanira abakinnyi b’Isonga ariko se kuki bitava ku bana 25 gusa amafaranga agashyirwa mu bice bitandukanye mu turere hagashyirwa amashuri y’umupira w’amaguru ko byatanga umusaruro kandi bidatwaye amafaranga menshi?”

Kazungu Clever, uheruka kugirwa Umuvugizi wa APR FC, akaba n’umwe mu banyamakuru b’imikino bamaze imyaka myinshi, avuga ko amakipe ashingiye ku bigo bya Leta akwiye guhabwa abaturage.

Kazungu Clever avuga ko umutoza w'Ikipe y'Igihugu agomba gutoranwa ubushishozi

Yashimangiye ko hagomba gushakwa umutoza uzi ibyo akora kandi ufite amateka ndetse n’abakinnye umupira bagahabwa umwanya.

Avuga ko intambwe ya mbere yamaze guterwa yo gukinisha abakinnyi b’Abanyarwanda gusa kandi mu gihe kiri imbere bizabyara umusaruro mwiza. Ati "Iyo ndeba ikipe y’Igihugu ubu mbona ifite isura itandukanye n’iyo mu myaka yashize. Uyu munsi n’iyo dutsindwa, tuvuga ko hatsinzwe abana b’Abanyarwanda gusa, bashobora kuvuga ikinyarwanda bari mu mwiherero mbere ntibyashobokaga, hakoreshwaga igiswahili."

Kazungu ashingira ku musaruro gahunda yo gukura abanyamahanga mu Mavubi yatanze ku bana bato nka Savio Nshuti wavuye mu Isonga agahabwa umwanya muri Rayon Sports agahita anafata umwanya uhoraho mu ikipe y’igihugu, ibintu bitashobokaga mbere kuko ayo mahirwe yahabwaga ’abanyamahanga batatanakundaga igihugu, batazi umuco wacyo n’icyo Abanyarwanda babifuzaho’.

Amakipe nave mu biganza bya Leta ashyirwe mu maboko y’abaturage

Kazungu avuga ko nta na rimwe umupira ushobora gutera imbere mu Rwanda igihe cyose ukiri uwa leta aho kuba uw’abaturage kuko aribwo wiyongeramo uguhangana kubera ishyaka n’igitutu cy’abafana ari nabyo bituma umukinnyi akura mu mutwe ndetse no mu kibuga bikanatanga umusaruro mu Ikipe y’Igihugu.

Yagize ati "Ubu dufite amakipe akoresha amafaranga menshi ariko nta musaruro atanga, urugero nka AS Kigali, Police FC […] kuko ni amakipe adafite abafana kenshi bigatuma n’umukinnyi nta cyo yumva ahanganira kuko nta gitutu cy’umufana kimuri inyuma."

Yakomeje agira ati "Mbona nibura amakipe nka Rayon Sports, Kiyovu Sports, Mukura VS na APR FC y’abaturage itari iy’ingabo zikwiye kugenerwa ingengo y’imari na Leta, wenda Rayon igafatwa n’Akarere ka Kicukiro kuko i Nyanza byaranze, Kiyovu ikaba iya Nyarugenge, APR FC iya Gasabo ubundi zigategekwa kugira amarerero y’abana bato kuko yaba afite ubushobozi."

Amavubi akeneye umutoza ukomeye utavugirwamo

Kazungu avuga ko igihe kigeze kugira ngo Amavubi ntiyongere gutozwa n’umutoza udafite amateka na make mu mupira, uyigiraho, ahubwo akenshi abamuha aka kazi bakisobanura ngo "ahembwa make" nyamara "hari izindi nyungu bwite bamushakaho".

Ati "Uwa make se nyine ikindi yaduha kitari ugutsindwa na Mauritius tutari ku rwego rumwe mu mukino wakaduhaye kujya muri CAN ni ikihe? Dukeneye umutoza ushobora kugira icyo aha abakinnyi bagiye mu Mavubi kiruta icyo babona mu makipe yabo, naho ubu biratandukanye kuko ahubwo wumva umukinnyi uvuye mu ikipe y’igihugu asubira mu ikipe ye yarasubiye hasi."

Désiré Mbonabucya Mbonabucya wari kapiteni n’inkingi ya mwamba mu Ikipe y’Igihugu yitabiriye CAN 2004, we yatanze ibintu bitatu byakorwa u Rwanda rukajya ku rwego rwo guhangana n’ibihangange byo muri Afurika.

Désiré Mbonabucya asanga abakinnye umupira w'amaguru bakwiye guhabwa agaciro

Gushyira ingufu mu guteza imbere umupira w’abato, ikintu ahuriyeho na Kayiranga, kwitabira amarushanwa no gutegura imikino ya gicuti n’amakipe akomeye muri Afurika no hanze yayo ndetse n’ubushobozi, ubushake n’ubumenyi muri ruhago ku bayiyobora.

By’umwihariko ku ngingo ya gatatu ijyanye n’abayobora umupira batawuzi ahuriraho na benshi mu bakunzi b’umupira w’amaguru mu Rwanda, Mbonabucya avuga ko u Rwanda rukwiye gufatira urugero ku bihugu byateye imbere muri Afurika nka Nigeria, Misiri, Ghana, Sénégal n’ibindi, aho usanga abahoze bakina bari mu buyobozi bw’umupira cyangwa ari abatoza, ikintu cyananiranye mu Mavubi, ndetse n’abagiriwe icyizere batamaraho kabiri.

Yagize ati "Ubumenyi mu mupira, nshaka kuvuga ko abayobozi ba ruhago yacu bari bakwiriye gufata ingero muri bya bihugu byateye imbere kuko byo biha agaciro abakinnyi baba barakiniye amakipe y’ibihugu byabo. Nubwo byatangiye ariko Jimmy Mulisa wenyine ntahagije. Kuki abantu nka ba Jimmy Gatete, Olivier Karekezi, Kalisa Claude n’abandi benshi batagira uruhare mu kuzamura umupira wacu? Njye mbona inama zabo ziba zikenewe cyane kuko n’abantu basobanukiwe umupira neza, ikindi kandi bashobora no kuba abatoza."

Désiré Mbonabucya(ufite ibendera) yari Kapiteni w'Ikipe y'Igihugu yakinnye CAN muri 2004

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved