Gushyingurwa ku Mumena, kubikwa kwa Rayon ...ibyaranze ihangana rya Kiyovu na Rayon Sports

Yanditswe na Eric Tony Ukurikiyimfura
Kuya 1 Ukuboza 2019 saa 09:37
Yasuwe :
0 0

Benshi bazi umupira w’amaguru mu Rwanda guhera mu 1965 bazakubwira ko amakipe ya Kiyovu Sports na Rayon Sports yari afitanye ubukeba bwo ku rwego rwo hejuru, aho ngo umukino wayahuzaga yombi, ari wo warebwaga n’abafana benshi mu rwa Gasabo.

Uyu munsi, hari umufana wa Rayon Sports uzakubwira ko ikipe bahanganye ari APR FC ariko nubaza uwa Kiyovu Sports, we azakubwira ko ikipe bahanganye ari Rayon Sports uko yaba imeze kose.

Saa kumi n’imwe n’iminota 30, ku wa 15 Kamena 2017, kuri stade yo ku Mumena, Kiyovu Sports yashinzwe mu 1964 yasubiye mu cyiciro cya kabiri ku nshuro ya mbere nyuma yo gutsindwa na Rayon Sports ibitego 2-1. Nubwo itigeze ikina muri iyo Shampiyona, ariko ni ibyabaye kandi byanditswe mu mateka y’umupira w’u Rwanda.

Amakipe yombi afitanye ubukeba bw’igihe kirekire

Gasingwa Michel ni umwe mu bafite izina rikomeye muri ruhago y’u Rwanda, aho yabaye Umunyamabanga Mukuru mu Ishyirahamwe ry’Umupira w’Amaguru mu Rwanda, FERWAFA, aba umusifuzi ku rwego mpuzamahanga ndetse akaba yarakiniye ikipe ya Kiyovu Sports mbere ya Jenoside yakorewe Abatutsi mu 1994.

Mu kiganiro yagiranye na IGIHE, Gasingwa yavuze ko mu gihe cyabo, ubukeba bwari hagati ya Kiyovu Sports na Rayon Sports, bwari ku rwego rwo hejuru.

Ati “Icyo gihe ubukeba bwari bukomeye hagati ya Rayon Sports na Kiyovu Sports nubwo hari Panthère Noir yari mu makipe akomeye atwara ibikombe. Guhangana kwari hagati y’amakipe yombi muri iyo myaka kugeza mbere gato ya Jenoside yakorewe Abatutsi mu 1994.”

Gakuba Abdoul Djabar uzwi nka Romario, umunyamakuru w’imikino akaba n’Umushakashatsi ku mupira w’amaguru mu Rwanda avuga ko Kiyovu Sports na Rayon Sports zatangiye guhangana kera ndetse byaryoshyaga umupira w’u Rwanda.

Ati “Amateka atwereka ko guhangana hagati ya Rayon Sports na Kiyovu Sports kwatangiye mu 1968 ubwo aya makipe yombi yahuriraga i Kabgayi, uwo mukino ukaza gusubirwamo bitewe n’uko amakipe yombi yashinjanyaga gukinisha abakinnyi batujuje ibyangombwa, ariko byose byaje kurangira Kiyovu itsinze Rayon Sports ibitego 4-2.”

Icyo gihe Rayon Sports yari yakinishije Runyinya Barabwiriza wigaga muri Kaminuza y’u Rwanda i Butare akaba yari amaze kuba icyamamare mu mupira, Kiyovu Sports yo yazanye Mashini bari bakuye i Bukavu, nyamara bombi nta byangombwa, bituma uwo mukino wari uwa nyuma (Final) ukinwa inshuro ebyiri.

Uko guhangana kwaje kurushaho kwiyongera mu 1981-1982, ubwo Muvala Valens yavaga muri Vitalo’o y’i Burundi azanye na Tindo Bulongo baza muri Kiyovu Sports.Umukino wa mbere abo bakinnyi bakinnye na Rayon Sports kuri Stade de l’Amitié (Stade Mumena), iyi kipe yambara ubururu n’umweru yatsinze ibitego 2-1.

Uwo mukino wababaje Muvala na Tindo dore ko bari bavuye i Burundi ari abakinnyi bakomeye kandi baje bahenze, bituma barahira ko Rayon Sports itazongera kubatsinda na rimwe bakiri muri Kiyovu Sports.

Kuva icyo gihe gutsinda Kiyovu Sports kwa Rayon Sports kwabaga ari ukunganya, kugeza ubwo Muvala Valens yayivagamo mu 1987 akajya gukina ku mugabane w’u Burayi mu ikipe ya FC Coutrin yo mu Bubiligi.

Kiyovu Sports na Rayon Sports zifitanye amateka kuva mu myaka 50 ishize

Raoul Shungu Jean Pierre ni we wagobotoye Rayon Sports ingoyi y’Abayovu

Rayon Sports yaje kwigaranzura Kiyovu Sports mu 1989, nyuma ya ya myaka indwi Abayovu bakikomangira mu gituza, ubwo Raoul Shungu Jean Pierre yageraga muri iyo kipe yambara ubururu n’umweru avuye muri Espoir FC y’i Cyangugu (i Rusizi) akazana na Janot Witakenge n’abandi bakinnyi.

Icyo gihe Rayon Sports yazanye Raoul nyuma y’uko bahuriye ku mukino wa nyuma ku gikombe cyitwaga ‘Trophée Habyarimana’, Rayon Sports igatsinda Espoir FC igitego 1-0 cyatsinzwe na Nkunzumwami Alpha.

Rayon Sports yigaranzuye Kiyovu Sports mu mukino w’irushanwa ryari ryateguwe na BRARUDI i Burundi, aho ayo makipe yombi yari yatumiwe muri iryo rushanwa ryarimo Inter FC na Vitalo’o.

Muri iryo rushanwa, Rayon Sports yatsinze Kiyovu Sports ku mukino wa nyuma igitego 1-0 cyatsinzwe na Sembagare Jean Chrisostome. Uwo mukino ni wo Raoul Shungu yahereyeho yigarurira imitima y’Aba-Rayon kuko yari abakuyeho igisuzuguriro cya Kiyovu Sports.

Guhangana kwatumye Kiyovu Sports yanga gukina maze Rayon Sports itwara igikombe idakinnye

Gakuba Abdoul Djabar benshi bazi nka Romario akomeza avuga ko kuva mu 1990, amikoro ya Kiyovu Sports yatangiye kugenda agabanuka, bihumira ku murari nyuma ya Jenoside yakorewe Abatutsi mu 1994, kuko iyi kipe itongeye kugaragara mu ruhando rw’amakipe ahanganye na Rayon Sports, byanabaho ugasanga ni umwaka umwe cyangwa amezi runaka ariko ugasanga ntibihoraho.

Ati “Guhangana kwarakomeje ariko ntikwatinze, kuko Kiyovu Sports yagiye igira ibibazo bigatuma itabasha kugura abakinnyi bakomeye, ariko ndibuka ku mukino wa nyuma w’igikombe cy’amahoro mu 1998, Rayon Sports yazanye Seko Sefu na Alaf Bulanga bagomba kubakinisha nk’Abanyarwanda, ariko Kiyovu Sports irabyanga, nyamara Uwitwa Zitoni wari Umunyamabanga mukuru wa FERWAFA yari yabahaye ibyangombwa, bikurura impaka, bituma Kiyovu yanga gukina kuko nta ndangamuntu bari bafite, bituma Rayon Sports itwara igikombe idakinnye.”

Kiyovu Sports yabitse urupfu rwa Rayon Sports maze iyi yo iza kuyishyingura mu 2017

Nk’uko twatangiye tubivuga, ubwo Rayon Sports yari imaze kumanura Kiyovu Sports mu cyiciro cya kabiri mu 2017, abafana bayo bazanye imisaraba bayishinga ku Mumen ndetse baririmba indirimbo zigaragaraza ko bayihashyinguye.

Ibi byasaga no kwihimurira kuri Kiyovu Sports yigeze gutanga itangazo ryo kubika kuri Radio Rwanda riranasomwa, ivuga ko ibabajwe n’urupfu rw’umugore wayo Rayon Sports, kandi ko imihango yo gushyingura iteganyijwe kubera kuri Stade Regional ku munsi no ku isaha bari bafitanyeho umukino.

Icyo gihe Kiyovu Sports yamenyeshaga inshuti n’abavandimwe ari bo Mukura VS, Etincelles FC, Panthere Noire FC na Mukungwa.

Si iryo gusa kuko Kiyovu Sports yigeze no gutanga irindi itumira mu bukwe ayo makipe yari yise inshuti n’abavandimwe, ivuga ko ifite ubukwe na Rayon Sports yitaga umugore wayo muri icyo gihe cyose iyi kipe yari yarabaye ingaruzwamuheto y’abambara icyatsi kibisi n’umweru.

Ibyo byakuruye inzika n’inzigo hagati y’amakipe yombi, ari nayo mpamvu nta mpuhwe na nkeya Rayon Sports yari kugirira Kiyovu Sports kuwa 15 Kamena 2017, ubwo yayimanuraga mu cyiciro cya kabiri, abafana bakayishyingura ku Mumena.

Abayovu ni bo babatije Rayon Sports izina ‘Gasenyi’

Izina Gasenyi rimaze kumenyekana haba mu ndirimbo zihimbwa n’abafana ba APR FC n’ahandi ryadutse mu 1987, ubwo abari abanyamuryango bakomeye ba Rayon Sports barimo Murego Donat, ari na bo bayifashaga bimurwaga bakavanwa i Nyanza bazanwa i Kigali, dore ko ari na bwo urukiko rw’Ikirenga rwari rukuweyo ruzanwa mu murwa mukuru.

Icyo gihe byabaye ngombwa ko na Rayon Sports yimuka, maze bahita bayishakira umuterankunga, aboneka ari Rwandex Shilington, uruganda rutunganya Ikawa, iyi kipe itangira kwambara umwambaro wanditseho Rwandex imbere.

Ubusanzwe gasenyi ni udushishwa tw’ikawa bajyaga bifashisha mu gucana imbabura no gutwika amatafari, ariko iyo turunze umuyaga ugahuha turaguruka ukabona ari twinshi cyane. Abayovu bahereye aho bahuza twa dushishwa tw’ikawa n’ubwinshi bw’abafana, ndetse n’izina ry’umuterankunga iyo kipe yari ifite, maze ubwo bamaraga kuyitsindira kuri Stade Regional, Rayon Sports imanutse i Nyamirambo n’abafana bayo, Abayovu biyicariye Tarinyota, Majengo, kuri 40 no mu bice byaho bati “Ngiyo Gasenyi irahise”.

Kiyovu Sports ngo ni yo yiyise ‘Urucaca’ ahanini ishingiye ku ibara ry’icyatsi kibisi cyiganje mu mwambaro wayo.

Amakipe yombi arongera guhura kuri iki Cyumweru

Hari byinshi byaranze imikino yahuje amakipe yombi

Ubwo amakipe yombi yanganyaga igitego 1-1 mu 1968 undi mukino ugasubikwa kubera umukinnyi utari ufite ibyangombwa, kamarampaka y’ibitego biine bya Kiyovu kuri bibiri bya Rayon byambitse ikamba iyi kipe yambara icyatsi n’umweru.

Mu 1984 Kiyovu yaguze abakinnyi Muvala na Tindo i Burundi hafi miliyoni ebyiri na Hassan Karera. Umukino wabo wa mbere ku butaka bwa ruguru y’Akanyaru bakirijwe ibitego 2 bya Rayon kuri 1 cya Kiyovu.

Ngo haciye imyaka isaga itanu Kiyovu yiharira umukino wayihuje na Rayon Sports. Ni muri iki gihe cyo umunyamakuru wa Radio Rwanda Kalinda Viateur yasomye itangazo ryo kubika ryatanzwe na Kiyovu Sports.

Muri 1987, abayovu bafashe ibikapu berekeza i Nyanza kwa Gikundiro gusa mu nzira aba banyamujyi baje kubura imyenda maze buri mukinnyi aserukana umwenda yari yitwaje birangira Kiyovu ibatsinze.

Kuya 31 ukuboza 1989 umukino utazasibangana mu mitima n’imitwe y’abafana ba Rayon Sports ubwo Kiyovu yabapfunyikiraga ubunani bwa 90 ku gitego kimwe ku busa.

Bivugwa ko uyu mukino wari umutego ku mutoza wa Kiyovu Sports, Kanamugire Aloys, nyamara Abayovu bari bataratsindwa umukino n’umwe. Nyamara ariko Abayovu ngo bahawe itike yo kujya gutamba kwa Lando dore ko ubusanzwe bineguriraga muri Bar de l’amitié.

Umukino wa mbere wa ruhago wabaye nyuma ya Jenoside yakorewe Abatutsi ni uwahuje izi kipe zombi kuri Stade Regional i Nyamirambo, hari taliki ya 11/09/1994, amezi abiri gusa nyuma yo kubohora igihugu, ikipe ya Kiyovu Sports yari yuzuye , mu gihe Rayon Sports byabaye ngombwa ko itira abakinnyi mu yandi makipe kuko itari yuzuye. Umukino warangiye Kiyovu itsinze Rayon Sports ibitego 3-1.

Ku cyumweru taliki ya 22 Ukuboza 1996, kuri Stade Amahoro ku mukino wa nyuma w’igikombe cya LA RWANDAISE DES JEUX , amakipe yombi yaje guhura nanone.

Umukino waje guhagarara utarangiye bitewe n’uko amatara yo kuri Stade yari amaze kuzima, ibintu bitavuzweho rumwe kuko uretse amatara yo ku kibuga mu mazu yo muri Stade ho amatara yari akiri kwaka.

Icyo gihe umukino wahagaze Rayon Sports ifite ibitego 2-0 byose byari byatsinzwe na Thierry Hitimana. Uyu mukino waje gusubirwamo taliki ya 16 Gashyantare 1997, Rayon Sports itsinda Kiyovu Sports 3-1.

Ku ya 4 Ukwakira 1998, ku mukino wa nyuma w’igikombe cy’Amahoro, Kiyovu Sports yabuze ku kibuga iterwa mpaga ya 3-0. Rayon Sports itwara igikombe idakinnye.

Ku italiki ya 27 Werurwe 2010 , mu mukino wa shampiyona Rayon Sports yatsinze 2-0 nyuma iza kubyishyurwa ndetse itsindwa n’icya gatatu. Umutoza wa Rayon Sports, Kayiranga Baptiste yatewe uducupa turimo inkari ndetse ku ya 28 Werurwe 2010, Kayiranga wanakiniye ikipe ya ayon Sports ahitamo kwegura.

Nyuma umutoza Jean Marie Ntagwabira, witabye Imana mu 2015, yaje kwivugira ko yari yatanze ruswa ku bakinnyi ba Rayon Sports kugira ngo bitsindishe bikaba byaramuviriyemo guhagarikwa imyaka ibiri.

Rayon Sports igiye guhura na Kiyovu Sports muri shampiyona ku nshuro ya 51 mu myaka 25 ishize. Mu mikino 50 zimaze guhuramo muri shampiyona, Rayon Sports yatsinzemo 29, Kiyovu Sports itsinda esheshatu, zinganya 15.

Nyuma ya Jenoside yakorewe Abatutsi mu 1994, mu mikino yose izi kipe zimaze guhura inshuro 75, muri izo nshuro zose Rayon Sports yatsinzemo imikino 41, Kiyovu Sports itsinda imikino 15 , zinganya inshuro 19.

Kiyovu Sports irakira Rayon Sports mu mukino w’umunsi wa 11 wa Shampiyona uteganyijwe kuri iki Cyumweru saa 18:00 kuri Stade ya Kigali i Nyamirambo.

Abafana ba Rayon Sports bashyinguye Kiyovu Sports ku Mumena ubwo bayimanuraga mu cyiciro cya kabiri mu 2017

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza