Gen Rudakubana yasabye abajya mu butumwa bw’amahoro kuzuzanya

Yanditswe na N.Kubwimana Janvière
Kuya 17 Ukwakira 2018 saa 05:28
Yasuwe :
0 0

Abasirikare, abapolisi n’abasivili basabwe kuzuzanya igihe bagiye mu butumwa bw’amahoro, kugira ngo barusheho kubungabunga umutekano w’abaturage baba bagiye kurinda.

Abagera kuri 46 baturutse mu bihugu umunani bya Afurika, bari guhabwa amahugurwa agamije kuzuzanya mu bikorwa byo kubungabunga amahoro. Ni amahugurwa azamara icyumweru mu Kigo cy’Igihugu cy’Amahoro, Rwanda Peace Academy, i Nyakinama mu Karere ka Musanze.

Atangiza aya mahugurwa, Maj. Gen. Charles Rudakubana wari uhagarariye umutwe w’Ingabo za Afurika y’Iburasirazuba zishinzwe gutabara aho rukomeye, yasabye abayitabiriye kumenya ko mu butumwa bw’amahoro haba hakenewe ubwuzuzanye bw‘izi nzego zose.

Ati "Ubumenyi mugiye guhabwa buzarusheho kubafasha mu kuzuzanya mugamije kurengera abaturage muzaba mukorera, buri rwego muri mwe ruba rufite icyo rushinzwe ariko biba byiza iyo mwuzuzanya kuko aribyo bitanga umusaruro."

Lt Col. Antoine Nyagatoma wo mu Ngabo z’u Rwanda witabiriye aya mahugurwa yatangijwe ku wa Mbere w’iki cyumweru. Yavuze ko biteguye ko hari byinshi azungukiramo kuko nk’umusirikare, aba amenyereye gukorana n’abasirikare bagenzi be ahanini.

Ati "Ariko ubu nzarushaho kumenya uko izi nzego zishobora gukorana zikanakorera hamwe."

Lucy Wangui Njoroge we yaturutse muri Kenya, yavuze ko kuba bagiye kwigira gukorera hamwe bizabafasha kuko usanga izi nzego zose zihura n’ingaruka mu gihe cy’umutekano muke.

Aya mahugurwa yateguwe n’Ikigo cy’Igihugu cy’Amahoro Rwanda ku bufatanye n’Ikigo mpuzamahanga gitanga amahugurwa ku kubungabunga amahoro cy’Ingabo za Finland na bimwe mu bihugu birimo Norvège, Suède, Iceland na Danemark.

Aya mahugurwa ahuje abantu 46 baturuka mu bihugu bya Comores, Ethiopia, Kenya, u Rwanda, Sudan, Seychelles, Somalia na Uganda.

Maj. Gen. Charles Rudakubana wari uhagarariye umutwe w’Ingabo za Afurika y’Iburasirazuba zishinzwe gutabara aho rukomeye
Ifoto y'Urwibutso nyuma yo gutangiza amahugurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza