Gasogi United yinjije miliyoni 19 Frw ku mukino wayihuje na Rayon Sports

Yanditswe na Eric Tony Ukurikiyimfura
Kuya 7 Ukwakira 2019 saa 05:16
Yasuwe :
0 0

Ikipe ya Gasogi United yinjije agera kuri miliyoni 19 Frw ku mukino ubanza wa Shampiyona yakiriyemo Rayon Sports kuri Stade Amahoro.

Amakipe yombi yanganyije ubusa ku busa muri uyu mukino wabaye ku wa Gatandatu.

Kuri uyu wa Mbere, Umuyobozi wa Gasogi United, Kakoza Nkuriza Charles (KNC) yabwiye abanyamakuru ko kuri uyu mukino iyi kipe yinjije agera kuri miliyoni 19 Frw.

Ati” Urebye ubwitabire bwari bushimishije kuko hari nka 60 by’abasanzwe bajya muri Stade Amahoro. Amafaranga twabonye kuri uriya mukino ntabwo ari mabi. Ni miliyoni 19 Frw n’utundi duke turengaho. Nashimira abakunzi ba Gasogi United baje kudushyigikira. No ku wa Gatatu bazaze barebe umupira kuko ubu ntiturakina, bazabibona.”

Kwinjira kuri uyu mukino byari ibihumbi 2,000, ahadatwikiriye, ibihumbi 3,000 ahatwikiriye 5000 iruhande rwa VIP n’ibihumbi 10 Frw mu myanya y’icyubahiro (VIP).

Muri izi miliyoni 19 Frw zinjiye kuri uyu mukino, Gasogi United yasigaranyemo asaga miliyoni 13.68 Frw nyuma yo gukuramo 28% yahawe Ishyirahamwe ry’Umupira w’Amaguru mu Rwanda (FERWAFA) na Sosiyete ya Centrika yinjiza abantu ku kibuga.

Sosiyete ya Centrika ishinzwe imyinjirize no kwishyuza ku kibuga, yatwaye 12% bingana na miliyoni 2,280,000 Frw, Ishyirahamwe ry’Umupira w’Amaguru mu Rwanda (FERWAFA) ritwara 6.5% kimwe na Stade Amahoro (ba nyir’ikibuga) yatwaye 6.5%, bingana na miliyoni 1,637,350 Frw kuri buri ruhande.

KNC yavuze ko amafaranga Gasogi United yinjije kuri uyu mukino angana na 7% by’ingengo y’imari ya miliyoni 168 Frw ikipe izakoresha muri uyu mwaka w’imikino.

Iyi kipe yateganyije ko amafaranga angana na 20% y’iyi ngengo y’imari ari yo azava ku bibuga.

Nyuma yo kunganya na Rayon Sports, Gasogi United izakira Marines FC mu mukino w’umunsi wa kabiri wa Shampiyona uzaba ku wa Gatatu tariki ya 9 Ukwakira, kuri Stade ya Kigali.

Gasogi United yakiriye Rayon Sports mu mukino w'umunsi wa mbere wa Shampiyona wabaye ku wa Gatandatu
Umutoza wungirije wa Gasogi United, Nshimiyimana Maurice 'Maso' (ibumoso), Perezida w'ikipe KNC (hagati) na Kapiteni wayo Kazindu Bahati Guy (iburyo) mu kiganiro n'abanyamakuru kuri uyu wa Mbere
KNC yavuze ko Gasogi United yinjije miliyoni 19 Frw ku mukino wayihuje na Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza