00:00:00 IGIHE NETWORK KN KINYARWANDA EN ENGLISH FR FRANCAIS

Gasogi United yasinyishije abandi banyamahanga babiri, KNC ateguza gutangaza ikintu gikomeye

Yanditswe na Eric Tony Ukurikiyimfura
Kuya 5 Ukwakira 2021 saa 09:10
Yasuwe :
0 0

Gasogi United ikomeje kwiyubaka, yasinyishije abakinnyi babiri bashya barimo Umunya-Sénégal Cissoko Boubakar n’Umunya-Côte d’Ivoire Moukoro Cheikh Ahmed Tenena, bombi ku masezerano y’imyaka ibiri.

Cissoko Boubakar na Moukoro Cheikh Ahmed Tenena basinye nk’abakinnyi bashya muri Gasogi United ku wa Kabiri, biyongera ku bandi banyamahanga batanu muri iyi kipe barimo Hassan Djibrine wavuye muri Tchad, Armel Ghislain wavuye muri Kiyovu Sports, Herron Berrian Scarla, Hassan Kikoyo na Iddy Muselemu bari bayisanzwemo.

Perezida wa Gasogi United, Kakooza Nkuriza Charles (KNC), yavuze ko kuba bamaze kugeza abanyamahanga batanu mu ikipe kandi bemerewe gukoresha batanu gusa ku mukino atari ikibazo.

Ati “Ikibazo si umubare w’abanyamahanga, ikibazo ni icyo baba bagiye kumarira ikipe kuko ntabwo buri umwe yakina wenyine. Ashobora kuvunika, ashobora kubona amakarita, undi akamusimbura.”

Yakomeje agira ati “Ikibazo kandi si uguhenda, ahubwo uribaza ngo ese umunyamahanga nguze nshobora kumugurisha? Ntabwo tubazanye ngo babe hariya buri wese ajye ahora ababona muri Gasogi United, oya, icyo tubasabye ni gukora cyane. Gasogi ni ikipe y’ubucuruzi.”

KCN yavuze ko kandi bashaka kubaka ikipe ikomeye, ateguza gutangaza ikindi kintu gikomeye atigeze ahishura.

Ati “Nshaka ngo turebe, twubake ikipe idasuzuguritse, ndatekereza ko mu minsi ya vuba tuzongera guhurira hano tubabwira ‘big announcement’ [dutangaza ikintu gikomeye], big announcement irahari.”

Gasogi United yagaruye umutoza Guy Bukasa, ikomeje kwitegura Shampiyona ya 2021/22 izatangira ku wa 30 Ukwakira, ifitanye umukino wa gicuti na AS Kigali ku wa Gatatu.

Imaze gukina indi mikino ine, aho yanganyije na Gorilla FC ibitego 2-2 ndetse na Marines FC igitego 1-1, itsindwa na Bugesera FC igitego 1-0 mbere yo gutsinda AS Muhanga ibitego 2-0.

Moukoro Cheikh Ahmed Tenena yasinye imyaka ibiri muri Gasogi United
Umunya-Sénégal Cissoko Boubakar na we yahawe amasezerano y'imyaka ibiri nk'umukinnyi mushya wa Gasogi United
KNC yavuze ko mu minsi iri imbere hari ikintu gikomeye bazatangaza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .