FIFA yashyize hanze amatike yo kureba igikombe cy’Isi cya 2018 harimo izagura hafi miliyoni y’u Rwanda

Yanditswe na Manzi Rema Jules
Kuya 13 Nzeri 2017 saa 09:44
Yasuwe :
0 0

Ishyirahamwe ry’Umupira w’Amaguru ku Isi, FIFA, ryamaze gushyira ahagaragara ibiciro by’amatike ku bifuza kuzareba imikino ya nyuma y’Igikombe cy’Isi kizabera mu Burusiya mu 2018 harimo n’izagura hafi miliyoni y’amafaranga y’u Rwanda.

Ikipe y’Igihugu y’u Rwanda ntizagaragara muri iri rushanwa riruta ayandi ku Isi mu mupira w’amaguru kuko yasezerewe ku ikubitiro mu gushaka itike, ariko abakunzi ba ruhago by’umwihariko abifite bashobora kuzicara muri Stade za Luzhniki yakira abafana ibihumbi 81, Saint Petersburg Stadium ijyamo ibihumbi 68, Fisht Stadium yakira abantu 47 n’izindi.

Nk’uko FIFA yabitangaje kuri uyu wa Gatatu, kujya ku mukino itike ya make izaba ihagaze ama-paund 17 angana n’amafaranga y’u Rwanda ibihumbi 19 aha bikazaba ari ukureba imikino yo mu matsinda mu myanya iciriritse, naho itike ya menshi izagura ama-pound 829 asaga ibihumbi 900 Frw by’u Rwanda.

Amatike yo kureba imikino y’igikombe cy’Isi cya 2018 mu myanya itandukanye

Ku munsi wo gufungura irushanwa, abazinjira muri stade bashaka kwicara mu cyubahiro bazishyura ama-Pound 414 (asaga ibihumbi 400 Frw), mu myanya ikurikiraho bazishyura ama Pound 294 (asaga ibihumbi 300 Frw), naho umwanya uhendutse umuntu azaba asabwa kwishyura ama-Pound 42 (asaga ibihumbi 40 Frw) ariko iyi myanya igenewe Abarusiya gusa.

Ku mikino yo mu matsinda amatike azagabanuka kuko iya menshi izagura ama-Pound 158 (170 Frw), ikurikiye igure ama-Pound 124 (asaga ibihumbi 130 Frw), naho ahaciriritse ari nayo kite izagura make mu irushanwa ryose hazishyurwa ama-Pound 17 (hafi ibihumbi 20 Frw).

Iko imikino izagenda yigira imbere niko amatike azongera guhenda, muri 1/16 ikazagura ama-Pound 185 mu cyubahiro (asaga ibihumbi 200 Frw) mu gihe ahaciriritse izagura ama-Pound 29 (asaga ibihumbi 30 Frw).

Kureba imikino ya ¼ umuntu azishyura ama-Pound 275 (asaga ibihumbi 300 Frw) iya make ikazagura ama-pound 50 (asaga ibihumbi 50 Frw). Imikino ya ½ nayo izaba ihenze cyane kuko kwicara mu cyubahiro bizasaba kwishyura ama-Pound 565 (asaga ibihumbi 500 Frw) mu gihe iya make izagura ama-Pound 59 (asaga ibihumbi 60 Frw).

Kureba umukino wa nyuma umuntu yicaye mu mwanya w’icyubahiro muri Stade ya Luzhniki, bizamusaba kwishyura ama-Pound 829 (asaga ibihumbi 900 Frw), mu myanya ikurikiye bishyure ama-Pound 535 (asaga ibihumbi 500 Frw) mu myanya ya gatatu bishyure ama Pound 343 (asaga ibihumbi 300 Frw) naho ahasigaye hose bishyure ama Pound 92 (asaga ibihumbi 100 Frw).

Kugeza ubu ibihugu birindwi muri 32 bigomba kuzakina iri rushanwa rizatangira tariki 14 Kamena 2018, nibyo bimaze kubona itike birimo u Burusiya buzakira, Brazil, u Bubiligi, Iran, Mexique, u Buyapani, Arabia Saoudite na Koreya y’Epfo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza