FIFA: Impinduka ku rutonde rwa Nyakanga, U Rwanda rwazamutse imyanya itatu

Yanditswe na Eric Tony Ukurikiyimfura
Kuya 25 Nyakanga 2019 saa 01:52
Yasuwe :
0 0

Urutonde Ngarukakwezi rushyirwa hanze n’Ishyirahamwe ry’Umupira w’Amaguru ku Isi, FIFA, rwasohotse kuri uyu wa Kane, tariki ya 25 Nyakanga, rwasize impinduka zikomeye ku makipe yegukanye ibikombe ku migabane yayo mu gihe u Rwanda rwisanze ku mwanya wa 133.

Ikipe y’Igihugu Amavubi imaze amezi ane idakina umukino mpuzamahanga, yazamutse imyanya itatu ku rutonde rwa FIFA, aho yabaye iya 133 ku Isi n’uwa 36 muri Afurika.

Amavubi aheruka mu kibuga mu mpera za Werurwe 2019 ubwo yatsindwaga na Côte d’Ivoire ibitego 3-0.

Tanzania iheruka mu Gikombe cya Afurika cyabereye mu Misiri, yo yamanutse imyanya itandatu iba iya 137.

Ikipe y’u Burundi na yo yavuye mu Gikombe cya Afurika nta mukino itsinze nta n’igitego yinjije, yisanze ku mwanya wa 148 nyuma yo gusubira inyuma imyanya 14 yose.

Uganda yagarukiye muri 1/8 muri iri rushanwa riheruka kubera mu Misiri, yagumye ku mwanya wa 80 mu gihe Repubulika Iharanira Demokarasi ya Congo na yo yasezerewe itarenze 1/8 yaje ku mwanya wa 56 nyuma yo gutakaza imyanya irindwi.

Amakipe yatwaye ibikombe by’imigabane yazamutse cyane

Ikipe y’Igihugu ya Brésil [Samba Boys] yegukanye Copa América yazamutseho umwanya umwe iba iya kabiri ku Isi, aho yatambutse ku Bufaransa bwabaye ubwa gatatu nyuma yo gutakaza umwanya umwe.

Mexique yatwaye Gold Cup muri CONCACAF, yazamutseho imyanya itandatu iba iya 12 ku Isi mu gihe Leta zunze Ubumwe za Amerika bahuriye ku mukino wa nyuma yazamutseho imyanya umunani iba iya 22.

Algérie yegukanye Igikombe cya Afurika, yazamutse imyaka 28 iba iya 40 mu gihe Sénégal yatsindiwe ku mukino wa nyuma, yo yazamutse imyanya ibiri ikaba iya 20.

Ibihugu 10 bya mbere ku Isi: U Bubiligi, Brésil, u Bufaransa, u Bwongereza, Uruguay, Portugal, Croatie, Colombie, Espagne na Argentine.

Ibihugu 10 bya mbere muri Afurika: Sénégal (ya 20 ku Isi), Tunisie (29), Nigeria (33), Algérie (40), Maroc (41), Misiri (49), Ghana (50), Cameroun (53), RDC (56) na Côte d’Ivoire (57).

Algérie yegukanye Igikombe cya Afurika cyabereye mu Misiri
Amavubi aheruka gukina muri Werurwe, yazamutse imyanya itatu ku rutonde rwa FIFA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza