Ferwafa yisobanuye ku kibazo cy’umusifuzi uyishinja ruswa

Yanditswe na Manzi Rema Jules
Kuya 12 Nzeri 2018 saa 04:43
Yasuwe :
0 0

Ishyirahamwe ry’umupira w’amaguru mu Rwanda (FERWAFA) ryahakanye ibyatangajwe n’umusifuzi w’Umunya-Namibia, Jackson Pavaza, wavuze ko hari abayobozi bamuhaye ruswa kugira ngo asifure umukino w’Amavubi na Côte d’Ivoire abogamiye ku Rwanda.

Ni amakuru Pavaza yahaye ikinyamakuru cy’iwabo, Namibian Sun aho yagitangarije kuri uyu wa Kabiri.

Yavuze ko abayobozi muri Ferwafa barimo Umunyamabanga Mukuru, François Regis Uwayezu na Ruhamiriza Eric ushinzwe amarushanwa, bamuzaniye ibahasha irimo amafaranga “atazi umubare” bashaka ko abogamira ku Rwanda.

Mu nyandiko ndende Ferwafa yashyize ku rubuga rwayo kuri uyu wa Gatatu igira iti “ Ku wa Gatanu tariki 7 Nzeri 2018, nyuma y’inama itegura umukino yabereye ku ishyirahamwe ry’umupira w’amaguru mu Rwanda iyobowe na Komiseri w’Umukino, Mike Letti wo muri Uganda n’abasifuzi bane bakomoka muri Namibia.

Bishyuwe $247 yo kwifashisha mu byo bashobora gukenera bitateganyijwe byemewe n’Ishyirahamwe ry’umupira w’amaguru muri Namibia kandi bikaba biteganywa n’ingingo ya 36 na 37 by’amategeko agenga amajonjora y’igikombe cya Afurika cya 2019.”

Muri iyi nyandiko, Ferwafa ivuga ko imaze kwishyura abasifuzi ayo mafaranga, bahise bagaragaza ko hari andi yarenze ku matike yabazanye i Kigali bityo nayo bagomba kuyishyurwa.

Ku wa Gatandatu nyuma y’Inama y’Inteko Rusange Isanzwe ya Ferwafa yatangiye mu gitondo igasozwa mu masaha akuze y’ijoro, Eric Ruhamiriza ushinzwe amarushanwa yibukijwe na Pavaza ko hari amafaranga abasifuzi batarishyurwa.

Ibi yabimwibukije bavugana mu magambo ndetse anamwandikira ubutumwa kuri WhatsApp ku Cyumweru tariki 9 Nzeri 2018 amumenyesha ko angana n’amadolari ya Amerika 237 kuri buri musifuzi.

Byatumye ku Cyumweru mbere y’umukino, Ruhamiriza ari kumwe n’Umunyamabanga Mukuru wa Ferwafa, François Regis Uwayezu bajyana amadolari 948 yo kugabanya abasifuzi bane, buri umwe afata 237.

Aba bayobozi bombi ngo bagiye kuri Hotel des Milles Collines saa tanu za mu gitondo kandi bitari mu bwihisho, bahurira ku muryango wa hoteli babaha amafaranga nk’uko bari bayasabye.

Itangazo rya Ferwafa rigira riti “Aha niho Pavaza yahise amenyesha abayobozi ba Ferwafa ko amafaranga bamugomba ari $237 atari 948 nk’uko Ferwafa yari yayateguye.”

Uwayezu na Ruhamiriza bamaze kubona ko Pavaza hari ibindi yatekereje bitandukanye n’ibyari bibajyanye, bamusabye ko yakomeza kwitegura umukino wari butangire saa 15:30 noneho amafaranga bakayasubiranayo bakayamuha nyuma y’umukino kuko bitari gushoboka ko bamuha $237 batabonye aho bavunjishiriza.

Mbere yo guhaguruka i Kigali, ku Kibuga cy’Indege i Kanombe, Pavaza yahawe anasinyira $237 imbere ya komiseri w’umukino, Mike Letti.

Ferwafa ivuga ko icyabayeho ari ubutumwa bwatambutse nabi aho Pavaza we yumvaga ko agomba gushyikirizwa $237 nk’uko yari yabimenyesheje Ruhamiriza noneho akabona umubare urenga ari nabyo yahise afata nka ruswa.

Pavaza ni we wari uyoboye umukino w'u Rwanda na Côte d’Ivoire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza