Kwamamaza

Ferwafa yirengagije amategeko none miliyoni 10 za Mussa na Seninga ziheze mu kirere

Yanditswe kuya 9-09-2016 saa 10:57' na Jah d'Eau DUKUZE


Ishyirahamwe ry’umupira w’amaguru mu Rwanda Ferwafa, rikomeje guseta ibirenge mu gushyira mu bikorwa imyanzuro ya Komisiyo yaryo ishinzwe imyitwarire, yategekaga amakipe ya Sunrise na Kiyovu Sports kwishyura abatoza yasezereye bidaciye mu mategeko amafaranga agera kuri miliyoni 10 bombi.

Taliki 3 Ugushyingo 2014, Sunrise yasezereye uwari umutoza wayo Gatera Mussa imushinja imikoranire itari myiza na bagenzi be ndetse n’umwuka mubi mu ikipe. Icyo gihe, yasezerewe amaze gutoza imikino itanu yo mu cyiciro cya mbere, nyuma yo kuzamura iyi kipe ayikuye mu cyiciro cya kabiri.

Ku rundi ruhande, tariki ya 14 Mutarama 2016, Kiyovu Sports yasezereye Seninga Innocent imuziza kudatanga umusaruro mu ikipe, kutayobora abakinnyi ndetse no guta ikipe nta ruhushya.

Aba batoza bombi nyuma yo gusezererwa mu buryo batangazaga ko budakwiye, baje kwifashisha Umunyamategeko Me Emile Ngiruwonsanga, maze baregera Komisiyo ishinzwe imyitwarire muri Ferwafa basaba kurenganurwa.

Nkuko bigaragara mu mpapuro zitandukanye IGIHE ifitiye kopi, iyi Komisiyo yaje gufata umwanzuro w’uko amakipe ya Kiyovu Sports na Sunrise atsinzwe, ni ko kuyategeka kwishyura aba batoza amafaranga yari asigaye ngo amasezerano yabo arangire.

Sunrise yasabwe kwishyura Gatera Mussa Miliyoni enye z’amafaranga y’u Rwanda (4 000 000Frw), mu gihe ikipe ya Kiyovu Sports yategetswe kwishyura Seninga Innocent miliyoni esheshatu (6 000 000 Frw). Iyi Komisiyo, ikaba yaranategetse ubuyobozi bwa Ferwafa kwishyuriza aba batoza.

Ubuyobozi bwa Ferwafa bwatereye agati mu ryinyo

Nubwo icyemezo cya nyuma cyafashwe tariki ya 21 Gicurasi 2015, kugeza kuri ubu nta kintu aba batoza bari bahabwa kijyanye no kwishyurwa amafaranga yabo, Me Ngiruwonsanga yadutangarije ko bavuganye na Ferwafa inshuro nyinshi, ariko ko yo nta kintu yari yabafasha.

Ngiruwonsanga yagize ati “Komisiyo yari yasabye Ferwafa kutwishyuriza amakipe ariko ntabwo yigeze ibikora”.

“Twabandikiye kenshi ndetse tunavugana n’ubuyobozi bwayo, gusa kugeza uyu munsi bisa nkaho batiteguye kudufasha”.

Uyu munyamategeko yakomeje atangaza ko bishobora kurangira bagiye muri CAF, nubwo yumva nta mpamvu yo kuregera CAF ikirego cyarangije kuburanishwa.

Kiyovu Sports kuri ubu nta buyobozi ifite, nyuma yaho inteko rusange ishyiriyeho komisiyo y’agateganyo izaba iyobora ikipe mu gihe hagitegerejwe gukorwa amatora. Ku rundi ruhande, Sunrise nyuma yo kuvanwa i Rwamagana ikajya i Nyagatare, yaje na yo guhindura ubuyobozi bwose.

Me Ngiruwonsanga Emile, yanavuze ko bari babwiye Ferwafa ko byibura yafatira ku mafaranga make ya AZAM igenera amakipe kugira ngo ibe ihayeho aba batoza ariko Ferwafa yarabyanze.

Nubwo Ferwafa ikomeje kugenda gake mu gukemura ibibazo by’aba batoza bombi, tariki ya 17 Werurwe 2015, iri shyirahamwe ryakase Rayon Sports amanota atatu muri shampiyona, riyiziza gutinda kwishyura uwari umutoza wayo Raoul Shungu.

Twifuje kuvugana n’ubuyobozi bwa Ferwafa, ariko yaba Umuyobozi wayo Nzamwita Vincent De Gaulle, ndetse n’Umuvugizi w’ iri shyirahamwe Mussa Hakizimana, nta n’umwe wafataga telefone ye igendanwa.

Perezida wa Ferwafa Nzamwita Vincent ahanzwe amaso n'abatoza bambuwe

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 29 Ugushyingo 2016
Copyright © 2009 -2014 - IGIHE Ltd - All Rights Reserved