FERWAFA yavuze ku byo gusubukura Shampiyona muri Werurwe

Yanditswe na Eric Tony Ukurikiyimfura
Kuya 9 Gashyantare 2021 saa 02:23
Yasuwe :
0 0

Ishyirahamwe y’Umupira w’Amaguru mu Rwanda (FERWAFA) ryavuze ko hakomeje ibiganiro byo kurebera hamwe umwanzuro uzafatwa kuri Shampiyona y’Icyiciro cya Mbere yahagaritswe mu Ukuboza nubwo hari amakuru ko ishobora gusubukurwa muri Werurwe.

Shampiyona y’Icyiciro cya Mbere mu Rwanda yahagaritswe na Minisiteri ya Siporo guhera ku wa 12 Ukuboza 2020 nyuma y’uko hari amakipe amwe yagaragayemo ubwandu bwa COVID-19.

Amakuru IGIHE yamenye ni uko ishobora gusubukurwa muri Werurwe , ariko byose bizaterwa n’uko ingamba zo kwirinda COVID-19 zizaba zifashe muri iyo minsi.

U Rwanda ni kimwe mu bihugu bike bya Afurika byamaze kwitegura neza uburyo bwo gutanga inkingo za Covid-19 ndetse biteganyijwe ko ukwezi kwa Gashyantare gushira rubonye inkingo zigera kuri miliyoni.

Mu kiganiro yagiranye na IGIHE, Umunyamabanga Mukuru w’Ishyirahamwe ry’Umupira w’Amaguru mu Rwanda (FERWAFA), Uwayezu François Régis, yavuze ko ibijyanye no gusubukura Shampiyona muri Werurwe ntabyo bazi ndetse batarafata umwanzuro kuri Shampiyona y’uyu mwaka w’imikino wa 2021.

Ati “Shampiyona y’uyu mwaka w’imikino yabaye ihagaritswe, ntabwo yigeze ikurwaho cyangwa ngo igirwe impfabusa ifatwe nk’itarabayeho. Ibyo gusubukura muri Werurwe ni mwe tubyumvanye, nta mwanzuro urafatwa.”

Yakomeje avuga ko ibijyanye n’isubukurwa rya Shampiyona “bikiri kuganirwaho.”

Mu kiganiro n’abanyamakuru cyabaye ku wa 16 Ukuboza 2020, kigaruka ku ngamba zo kwirinda icyorezo cya COVID-19, Minisitiri wa Siporo, Munyangaju Aurore Mimosa, yavuze ko Shampiyona izasubukurwa vuba bitewe n’aho ibiganiro na FERWAFA byari bigeze.

Ati “Igihe bazaba babitugejejeho nibwo tuzabyigaho nabo bakabona igisubizo, ariko Shampiyona yo izasubukura vuba nkurikije ibiganiro bimaze iminsi biri hagati yacu n’urwego rushinzwe umupira w’amaguru mu Rwanda.”

Kuwa 24 Ukuboza 2020, FERWAFA yagiranye inama nyunguranabitekerezo n’amakipe y’Icyiciro cya Mbere, impande zombi zirebera hamwe icyakorwa kugira ngo Shampiyona yongere gusubukurwa, hirindwa amakosa yabaye agatuma ihagarikwa.

Mu ntangiriro z’uyu mwaka, Perezida wa FERWAFA, Rtd Brig Gen Sekamana Jean Damascène, yari yavuze ko bateganya ko Shampiyona yasubukurwa muri Gashyantare ubwo bazaba bamaze kugaragariza Minisiteri ya Siporo ko ingamba bafashe zizubahirizwa.

Mu byo FERWAFA n’amakipe bari bumvikanye harimo kuvugurura amabwiriza yari yatanzwe mu Ukuboza mbere yo gutangira Shampiyona ndetse no gushyiraho ibihano biremereye birimo guterwa mpaga no kwirukanwa muri Shampiyona ku bo byagaragara ko bananiwe burundu kubahiriza ingamba zafashwe.

Gusa, ibi byose byakomwe mu nkokora n’ubwiyongere bukabije bw’ubwandu bwa COVID-19 bwagaragaye mu gihugu mu Ukuboza, byatumye Inama y’Abaminisitiri ya tariki ya 4 n’iya 18 Mutaram 2021, zifatirwamo ibyemezo birimo ibyo guhagarika ingendo zihuza intara n’Umujyi wa Kigali mu gihe uyu Murwa mukuru w’u Rwanda washyizwe muri gahunda ya Guma mu Rugo mu gihe cy’ibyumweru bitatu byarangiye ku wa 7 Gashyantare 2021.

Kuri ubu nta ngamba nshya zerekeye siporo rusange ziheruka gutangazwa ndetse iziheruka gufatwa zerekeye kwirinda icyorezo cya COVID-19 zizageza ku wa 22 Gashyantare 2021.

Shampiyona y’Icyiciro cya Mbere mu mupira w’amaguru yahagaritswe nyuma y’iminsi yayo itatu, imikino umunani imaze gusubikwa, irimo ine yasubitswe kubera COVID-19, yari gukinwa n’amakipe arimo Rayon Sports na Rutsiro FC icyo gihe yari yashyizwe mu kato ku munsi wa kabiri n’uwa gatatu. Indi ine yari gukinwa n’amakipe ya APR FC na AS Kigali yari mu marushanwa Nyafurika.

Inkuru bifitanye isano: Amakosa yakozwe kugeza ubwo Shampiyona Nyarwanda y’umupira w’amaguru ihagaritswe kubera COVID-19

Shampiyona y'Icyiciro cya Mbere mu Rwanda ishobora gusubukurwa muri Werurwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .