Kwamamaza

Ferwafa yatangiye gushaka umutoza mushya w’Amavubi

Yanditswe kuya 6-09-2016 saa 11:10' na IGIHE


Ishyirahamwe ry’umupira w’amaguru mu Rwanda, Ferwafa ryatangiye gushaka umutoza mushya w’umuzungu uzasimbura Jimmy Mulisa na Mashami Vincent bari bahawe iyi kipe by’agateganyo kugira ngo batoze umukino wa Ghana baje no kunganya igitego 1-1 i Accra mu guhatanira itike y’igikombe cya Afurika.

Nk’uko Perezida wa Ferwafa, Nzamwita Vincent de Gaulle yabitangarije The Newtimes, mu bufatanye basanzwe bafitanye n’Ishyirahamwe ry’umupira w’amaguru mu Budage, DFB, batangiye ibiganiro kugirango babafashe kubona umutoza udahenze kandi ushobora kugira ibyo ageza ku Mavubi.

Ati “Dukeneye umutoza mushya kandi twatangiye ibiganiro n’Ishyirahamwe ry’umupira w’amaguru mu Budage kugira ngo dutsure umubano twizeye ko uzadufasha mu kuzamura umupira duhereye mu bana bakiri bato ndetse no kubaka ikipe y’igihugu ikomeye.”

Kuba u Rwanda rwarasezerewe mu rugendo rwo guhatanira itike y’igikombe cy’Isi cya 2018 ndetse rukaba rutazitabira igikombe cya Afurika cya 2017 kizabera muri Gabon, bivuze ko Amavubi atazagaragara mu marushamwa mpuzamahanga hafi mu myaka ibiri iri imbere uretse kwitabira imikino ya CECAFA Senior Challenge Cup.

Nzamwita yakomeje agira ati “Nta kitwirukansa guhita dushyiraho umutoza mushya kuko ikipe y’igihugu nta marushanwa mpuzamahanga yenda kwitabira mu gihe cya vuba, tuzafata umwanya duhitemo umutoza mwiza kandi udahenze cyane.”

Yongeraho ati “Dukeneye umuntu wazamura urwego ikipe y’igihugu iriho kandi twizeye ko mu bufatanye n’Ishyirahamwe ry’umupira w’amaguru mu Budage, ku nkunga yabo dushobora kuzabona umuntu nyawe ukwiriye uyu mwanya.”

Bitandukanye na Jonathan Mckinstry wahoze atoza Amavubi akirukanwa, ngo umutoza mushya uzaza ntabwo azaba afite inshingano zo gutoza Amavubi gusa kuko azaba agomba no gutoza abatoza ba hano mu gihugu imbere ari na bo bazagira uruhare mu iterambere ry’umupira mu bana bakiri bato.

Ibi bitangajwe mu gihe Jimmy Mulisa wafashije Amavubi mu mpera z’icyumweru gishize kwitwara neza muri Ghana banganya igitego 1-1 mu mukino wa nyuma mu itsinda H mu guhatanira itike y’igikombe cya Afurika, yamaze kwerekeza mu Budage aho agiye mu mahugurwa y’ubutoza azamara ibyumweru bitatu yateguwe anaterwa inkunga n’Ishyirahamwe ry’umupira w’amaguru mu Bugade (DFB) akazabera mu kigo cy’imikino cya Hennef Sports Centre.

Aya mahugurwa azaba hagati ya tariki 4- 25 Nzeli Mulisa usanzwe ari umuyobozi wa tekinike wungirije ndetse akaba yari n’umutoza wungirije umunya-Ireland y’Amajyaruguru, Jonathan Mckinstry atarirukanwa, si we Munyarwanda wa mbere uyitabiriye kuko hanyuze bamwe mu batoza bakomeye mu Rwanda nka Mashami Vincent utoza Bugesera FC, Seninga wa Police FC, Thierry Hitimana (watoje Rayon Sports) André Cassa Mbungo ( watoje AS Kigali na Police FC) ndetse na Grace Nyinawumuntu utoza Amavubi y’abagore na AS Kigali y’abagore.

Jimmy Mulisa(uwa kabiri uhereye iburyo) yari asanzwe ari umutoza wungirije Johnathan Mckinstry atarirukanwa
Nzamwita Vincent(iburyo) yavuze ko umutoza mushya azaba afite inshingano zitandukanye n'izo Mckinstry yari afite zo gutoza Amavubi gusa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved