Kwamamaza

Ferwafa mu rugamba rwo kwisubiza ibibuga byahindutse aho kwigishiriza ibinyabiziga

Yanditswe kuya 19-09-2016 saa 15:49' na Manzi Rema Jules


Ishyirahamwe ry’umupira w’amaguru mu Rwanda, Ferwafa, ryatangiye gukorana n’inzego zitandukanye kugira ngo rigaruze ibibuga byahoze bikinirwamo umupira w’amaguru hirya no hino mu gihugu ariko ubu byahindutse aho bigishiriza ibinyabiziga n’ibinamba.

Imwe mu mpamvu zigarukwaho na benshi zituma nta bana bato benshi bafite impano mu mikino bakizamuka ngo bigaragaze no ku rwego rw’igihugu, harimo ibura ry’ibibuga mu bice bitandukanye by’igihugu kuko haba mu bigo by’amashuri aho abana bakiniraga hahinzwe indabo n’ahandi hari ibibuga by’imikino hahinduka aho kwigishiriza ibinyabiziga no kubyoza.

Mu kiganiro yagiranye na IGIHE, umuyobozi wa Ferwafa Nzamwita Vincent de Gaulle, yatangaje ko iki ari ikibazo gikomeye kandi koko babona ko kiri kudindiza umupira, bityo ngo ni yo mpamvu batangiye gukorana n’inzego za Leta n’ibigo by’amashuri kugira ngo barebe uko ibyo bibuga byagaruzwa bikanasanwa.

Yagize ati "Turi mu biganiro na MININFRA na MINALOC mu buryo bwo guteza imbere umupira duhereye mu bana. Ni ukuvuga ko iyo MININFRA ijemo, ibibuga bigomba gusanwa, ibyari byarahindutse ama Auto-Ecole (aho bigishiriza ibinyabiziga) abana bakahakinira. Si i Kigali gusa, ni ikibazo rusange mu gihugu, usanga ibibuga byarabaye ama Auto Ecole, tugomba kubigaruza abana bakabona aho bakinira."

Nzamwita yavuze ko mu bigo by’amashuri ho bitagoye cyane kuko ahenshi hagiye haterwa indabo bityo kuzikuraho bikaba bitatwara igihe kugira ngo abana babone aho bidagadurira, ndetse bikanafasha ko imikino ihuza amashuri na yo yongera gushyirwamo imbaraga kuburyo hongera kujya hava abana bafite impano nk’uko byahoze mu myaka yashize.

Bamwe mu bakinnyi banditse izina mu mupira w’amaguru Rwanda bakinnye muri shampiyona y’u Rwanda baturutse mu makipe y’ibigo by’amashuri, harimo Ndoli Jean Claude wavuye muri Groupe Scolaire Gahini mu Karere ka Kayonza yerekeza muri Police Fc, Haruna Niyonzima waturutse muri Groupe Scolaire Inyemeramihigo yo mu karere ka Rubavu yerekeza muri Etincelles FC nayo yo mu ri ako karere n’abandi.

Gusa uko imyaka yagiye yicuma ni ko uyu muco wagiye ukendera bitewe n’uko bamwe mu bayobozi b’ibigo by’amashuri batahaga umwanya imikino ndetse ahandi ugasanga nta bibuga abanyeshuri bakiniraho umupira bihari.

Ahazwi nka Tapis Rouge i Nyamirambo, ni hamwe mu higishirizwa ibinyabiziga hagakiniwe umupira
FERWAFA ivuga ko ibibuga byari byarahinduwe ahigishirizwa ibinyabiziga bigiye kugaruzwa

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved