Ferwafa irashinja Rayon Sports kuba imbarutso y’ikurwaho ry’umukino wa Super Cup 2016

Yanditswe na Ishimwe Israel
Kuya 6 Ukwakira 2016 saa 06:39
Yasuwe : XX
0

Umukino wa "Super Cup" uhuza ikipe yegukanye Shampiyona n’iyatwaye igikombe cy’Amahoro ubanziriza uyu mwaka ntugikinwe, Ferwafa ikaba yatunze Rayon Sports urutoki kuba yaramenyeshejwe iyo gahunda ariko ikayirenza ingohe.

Uyu mukino wagombaga guhuza APR FC yatwaye igikombe cya shampiyona na mukeba Rayon Sports yatwaye icy’Amahoro kuri uyu wa Gatandatu tariki 8 Ukwakira, wakuweho nyuma yo kutumvikana hagati y’abawutegura.

Kuri uwo munsi Rayon Sports izaba ifite umukino wa gicuti na AS Kigali kuri Stade Amahoro uzakurikirwa n’umuhango wo kumurika ku mugaragaro umushinga yatangije wo kubarura abakunzi bayo.

Ishyirahamwe ry’Umupira w’Amaguru mu Rwanda, Ferwafa binyuze ku muvugizi waryo, Mussa Hakizimana yabwiye IGIHE ko aya makipe yandikiwe amenyeshwa ko hari umukino wa Super Cup uteganyijwe ndetse ibikenerwa byose birimo n’amafaranga y’igihembo ku wagombaga gutsinda byari byarateguwe ariko iyi kipe y’i Nyanza ibishyiramo imbaraga nke ivuga ko ititeguye.

Yagize ati “Uyu mukino twari twawuteguye n’ibikenerwa byose. Twandikiye amakipe yombi tubamenyesha gahunda ariko imwe ibishyiramo imbaraga nke. Bagenda bavuga ngo babibwiwe bitinze, ubwo se urumva APR FC yari kumenyeshwa, iyo bazakina ntimenyeshwe? Nta bushake babishyizemo. […] ubu nta tegeko ryateganyijwe ryahana ikipe nk’iyi yanze gukina Super Cup ariko bigomba gutekerezwaho ubutaha zigafatirwa ibyemezo.”

Ku ruhande rwa APR FC, Umuvugizi wayo Kazungu Claver yatangaje ko n’uyu munsi ikipe yiteguye kuba yakina biramutse byemejwe.

Ati “APR FC nta kibazo ifite n’uyu munsi batubwiye ko umukino uri kuwa Gatandatu twakina. Ikibazo ni ukumenya niba ku rundi ruhande nabo bafite iyo gahunda.”

Umunyamabanga Mukuru wa Rayon Sports, Gakwaya Olivier yatangaje ko ibijyanye n’umukino babimenyeshejwe ariko mu buryo butemewe n’amategeko.

Yagize ati “Ntabyo twamenyeshejwe mu nzira zemewe n’amategeko.”

Muri iki gihe, uretse kuba aya makipe asanzwe ahora ahanganye mu kibuga birasa n’aho urwego rw’ubukeba rwafashe indi ntera dore ko mu gihe hasigaye iminsi ibarirwa ku ntoki ngo shampiyona itangire buri imwe iri mu rubanza n’indi zishinjanya gutwarana abakinnyi mu buryo butanyuze mu mategeko.

Umwuka mubi ushingiye ku bakinnyi babiri Emmanuel Imanishimwe na Yves Rwigema, buri kipe yatanze ku rutonde rw’abo azifashisha mu mwaka mushya wa shampiyona.

Rayon Sports yanyagiye APR FC ibitego 4-0 muri shampiyona y’umwaka ushize, inayisubira iyitsinda igitego 1-0 ku mukino wa nyuma w’igikombe cy’Amahoro ariko iyi kipe y’Ingabo z’Igihugu iza kwihimura mu irushanwa ryari ryateguwe na AS Kigali inyagira mukeba ibitego 3-0 inayisezerera muri ½ .

Umuvugizi wa Ferwafa, Musa Hakizimana avuga ko amakipe yombi yamenyeshejwe igihe umukino wa Super Cup wagombaga kubera ariko Rayon Sports ibishyiramo intege nke
Umukino uheruka guhuza amakipe yombi, APR FC yanyagiye Rayon Sports ibitego bitatu ku busa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza