Gukora imyitozo ntibihagije kugira ngo Imanishimwe abe umukinnyi wa APR FC-Ferwafa

Yanditswe na Jah d’eau Dukuze
Kuya 6 Ukwakira 2016 saa 10:53
Yasuwe : XX
0

Ubuyobozi bw’Ishyirahamwe ry’Umupira w’Amaguru mu Rwanda Ferwafa, butangaza ko mu ntangiriro z’icyumweru gitaha buzaba burangije kubona umuti w’ibibazo by’abakinnyi barimo Imanishimwe Emmanuel na Rwigema Yves bagaragaye ku rutonde rwa APR FC na Rayon Sports.

Aba bakinnyi bombi bakina inyuma ku mpande, bagiye bagurwa n’amakipe y’abakeba y’ayo bakiniraga mu mwaka ushize wa shampiyona, gusa kugenda kwabo ntikuvugweho rumwe n’amakipe bavuyemo. Yves Rwigema wakuriye mu ishuri rya ruhago rya APR FC, avuga ko nta masezerano yigeze agirana n’iyi kipe y’ingabo z’igihugu bityo ko nta mpamvu yari butume adasinyira Rayon Sports.

Ati “Njye nta masezerano mfitanye na APR FC. Sinumva n’impamvu ari njye bashakisha gusa kandi muri Rayon Sports harimo abandi bakinnyi nka Abuba bakuriye muri Academy ya APR. Nasinyiye Rayon Sports kandi ni yo nzakinira”.

Rwigema Yves(wambaye nimero 14) ntabwo yumva impamvu APR FC ikomeje kumushakisha

Ku rundi ruhande, Imanishimwe Emmanuel we uretse kuba avuga ko yari intizanyo ya ASPOR muri Rayon Sports, atangaza ko agapapuro yasinyiyeho Rayon Sports katari ak’amasezerano ndetse ko nta n’amafaranga bari bamuhaye ngo abasinyire.

Nyuma yaho amakipe yombi atanze aba bakinnyi ku rutonde rw’abo azifashisha mu mwaka mushya wa shampiyona, twegereye Ferwafa, maze Umuvugizi wayo Mussa Hakizimana atangariza IGIHE ko ibibazo by’aba bakinnyi biri bukemuke vuba.

“Hari akanama ka komisiyo ishinzwe amarushanwa, ni ko kari kwiga ibibazo by’abo bakinnyi bisanze kuri lisiti zirenze imwe. Turizera ko ibibazo byabo bizaba byakemutse mu ntangiriro z’icyumweru gitaha”.

“Icyo tureba ni amasezerano basinye n’uburyo bayasinyemo. Biranashoboka ko nidusanga bafite amakosa tuzabahana. Kuba nka Imanishimwe Emmanuel amaze iminsi akorera imyitozo muri APR FC ntabwo bimugira umukinnyi wa APR FC. Byose bizaterwa n’icyo amasezerano yabo tuzasanga avuga”.

Uretse ibibazo by’aba bakinnyi bombi, ikipe ya Rayon Sports igomba no kumenya icyemezo kizafatwa kuri Rwatubyaye Abdoul. Rayon Sports yasinyishije Rwatubyaye mu mezi ashize ariko n’ubu ntabwo yari yagera mu myitozo na rimwe.

Amakuru agera ku IGIHE, avuga ko uyu wahoze ari myugariro wa APR FC, kuri ubu yibereye muri Romania aho ashobora no gutangira gukina vuba, ni nyuma yo kubona ibaruwa imusohora muri iyi kipe y’Ingabo z’Igihugu.

Kugeza kuri uyu munsi, amakipe abiri muri 16 ni yo atari yageza lisiti z’abakinnyi azifashisha mu mwaka wa shampiyona uzatangira ku wa gatanu w’ icyumweru gitaha tariki ya 14 Ukwakira 2016, Rayon Sports yisobanura na Police i Nyamirambo.

Ibya Imanishimwe biracyari agatereranzamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza