Kwamamaza

Ferwafa:Babiri bifuzaga kuba Perezida umwe yahagaritswe imyaka ibiri undi asohorwa nabi

Yanditswe kuya 17-09-2016 saa 22:49' na Jah d'eau DUKUZE


Umunsi wa mbere w’Inteko Rusange idasanzwe ya Ferwafa, usize Munyandamutsa Augustin ahagaritswe imyaka ibiri azira imyitwarire idahwitse mu gihe Raoul Gisanura yaje gusohorwa mu nama azira ko ikipe ahagarariye kuri ubu iri mu bihano.

Aba bagabo bombi, bari bahatanye na Nzamwita Vincent De Gaulle mu matora yo kuyobora Ferwafa, bari bazanye n’abandi banyamuryango mu nama y’inteko rusange idasanzwe ya Ferwafa yatangiye kuri uyu wa gatandatu tariki ya 17 Nzeri kuri Hoteli La Palme i Musanze.

Mu masaha ashyira i saa tatu za mu gitondo mbere gato y’uko iyi nteko rusange itangizwa ariko, Munyandamutsa Augustin usanzwe ari Perezida w’ikipe ya SEC yo mu cyiciro cya kabiri, yaje gusohoka atishimye ahita agenda asubira i Kigali.

Umunyamakuru w’IGIHE wari uri aho hanze, cyane ko itangazamakuru ryari ryangiwe kwinjira muri iyi nama, yashatse kumuvugisha ariko yanga kugira icyo atangaza ku mpamvu yaba yamuteye kutitabira inteko rusange kandi asanzwe ari umwe mu bakunze kuyitangamo ibitekerezo.

Nyuma y’iminota 30 iyi nama itangiye(ahashyira saa 9:30’), ni bwo byamenyekanye ko Munyandamutsa Augustin amaze guhagarikwa imyaka ibiri mu bikorwa bya ruhago, ndetse agacibwa amande y’ibihumbi magana atanu, byose azira imyitwarire itari myiza. Uyu akaba ahanini azira ibaruwa yanditse mu minsi yashize asaba ko perezida wa Ferwafa uriho kuri ubu yakwegura.

Ubwo inama yari ikomeje mu masaha ashyira ku i saa tanu z’amanywa, ni bwo Raoul Gisanura, undi mugabo na we wari wahataniye kuyobora Ferwafa mu matora ya 2014, yazaga gusohoka mu nama ubona atishimye na gato, ni ko guhita afata imodoka aragenda. Uyu na we twashatse kugira icyo tumubaza ariko ntibyakunda.

Impamvu nyamukuru y’igenda rye nkuko twaje kubitangarizwa n’abari mu nama y’inteko rusange, ngo ni ibihano byafatiwe ikipe ahagarariye ya Gasabo byo guhagarikwa imyaka igera kuri itanu nyuma yo guterwa mpaga ubugira gatatu.

Gusohora Raoul Gisanura wanagiye agaragara kenshi anenga ubuyobozi bwa Ferwafa buriho bikanarangira aregeye Minispoc, ntabwo byavuzweho rumwe n’abanyamuryango bari i Musanze, cyane cyane ko icyemezo cyo guhagarika ikipe ye na perezida wayo bamaze kukijuririra kandi kuri ubu bikaba byari bitarafatirwa umwanzuro.

Gisanura(iburyo) na Munyandamutsa(ibumoso) bigijweyo muri Ferwafa

Ubundi amategeko afata abantu nk’abere mu gihe imyanzuro y’ubujurire itari yajya hanze, mu gihe kandi na sitati ya Ferwafa itemerera abanyamuryango n’ubuyobozi kuvuga ku ngingo nshya itari ku murongo w’ibyigwa. Ibi byose ariko byaje kwirengagizwa ubwo Gisanura yasohorwaga.

Mu bindi byavuzwe muri iyi nama y’inteko rusange, harimo gutanga raporo y’ibijyanye n’ikoreshwa ry’umutungo yari yavuzweho cyane mu nama iheruka. Iyi raporo yatanzwe kuri uyu wa Gatandatu, itandukanye cyane n’iyari yatanzwe hambere aho uburyo amafaranga yagiye akoreshwa bwabereye bushya abanyamuryango.

Kuri uyu munsi wa mbere kandi, haganiwe ku bijyanye n’intangiriro za shampiyona aho byemejwe ko iyi yatangira tariki ya 14/10/2016, mu gihe ariko hamaze gukorwa igenzura ry’ibibuga byose bizakinirwaho. Abanyamuryango bari muri iyi nama bandikiye ubuyobozi bw’Uturere dufite amakipe mu cyiciro cya mbere, ngo dutunganye ibibuga bizakinirwaho mbere yo gusurwa n’inzobere za Ferwafa.

Ku bijyanye n’amakarita y’umuhondo, inteko rusange yemeje ko umukinnyi azajya ahagarikwa ari uko yujuje amakarita atatu aho kuba abiri nkuko byari bisanzwe, mu gihe kandi umubare w’abanyamahanga bagomba kujya mu bakinnyi 18 bakina umukino umwe wagumye kuri batatu.

Inteko rusange ya Ferwafa iri busozwe kuri iki Cyumweru hanakorwa ikiganiro n’itangazamakuru.

Abari mu nteko rusange bagize akaruhuko mu masaha ashyira saa 14:30
Ferwafa yahisemo kujyana inama i Musanze

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 September 2016
Copyright © 2009 -2014 - IGIHE Ltd - All Rights Reserved