Fernando Torres wamamaye muri Liverpool yasezeye ku mupira w’amaguru

Yanditswe na Ndayikunda Josué
Kuya 21 Kamena 2019 saa 06:52
Yasuwe :
0 0

Umunya-Espagne, Fernando Torres, wamenyekanye cyane ari mu ikipe ya Liverpool, yamaze gutangaza ko yasezeye ku mupira w’amaguru nyuma y’imyaka 18 awukina nk’uwabigize umwuga.

Torres w’imyaka 35, yakiniye amakipe arimo Atlético Madrid, Liverpool na Chelsea, aho ubu akinira Sagan Tosu yo mu cyiciro cya mbere mu Buyapani.

Mu mikino 110 yakiniye ikipe y’igihugu ya Espagne, yayifashije kwegukana Euro 2008, atsinda igitego cy’intsinzi mu gihe yanatsinze ku mukino wa nyuma wa Euro ya 2012, igihugu cye cyongeye kwegukana.

Abinyujije ku rubuga nkoranyamabaga rwa Twitter, Torres yatangaje ko asezeye ku mupira w’amaguru.

Ati “Nyuma y’imyaka 18 yambereye myiza, igihe kirageze ngo nshyire akadomo ku gukina umupira w’amaguru nk’uwabigize umwuga.”

Uyu mugabo wahawe akabyiniriro ka El Ninho bisobanura ‘Umwana’ kubera uburyo isura ye iteye, yatangaje ko azagira ikiganiro n’abanyamakuru ku Cyumweru mu Mujyi wa Tokyo kugira ngo agire byinshi asobanura.

Fernando Torres yatangiriye umupira w’amaguru muri Atlético Madrid mbere yo kugurwa na Liverpool miliyoni £20 mu 2007, aho yayitsindiye ibitego 81 mu mikino 142.

Mu 2011, yaguzwe na Chelsea aba umukinnyi wa mbere uhenze icyo gihe mu Bwami bw’u Bwongereza, kuri miliyoni £50. N’ubwo nta bitego byinshi yayitsindiye, ariko yari mu ikipe yatwaye UEFA Champions League mu 2012.

Yayifashije kandi gutwara igikombe cya FA Cup, anatsinda ku mukino wa nyuma wa Europa League ubwo Chelsea yegukanaga igikombe itsinze Benfica ibitego 2-1 mu 2013.

Nyuma yo gutsinda ibitego 45 mu mikino 172, Fernando Torres yatijwe na Chelsea muri AC Milan mu gihe cy’amezi ane mbere y’uko asubira muri Atlético Madrid mu 2014, aho bageranye ku mukino wa nyuma wa UEFA Champions League ya 2016 batsinzwemo na Real Madrid mbere yo gutwara Europa League ya 2018 agahita yerekeza mu Buyapani.

Torres wa gatatu mu batsindiye Espagne ibitego byinshi n’ibitego 38, yakinnye amarushanwa atandatu akomeye harimo n’igikombe cy’Isi cya 2010 igihugu cye cyegukanye.

Fernando Torres wamamaye muri Liverpool yasezeye ku mupira w’amaguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza