00:00:00 IGIHE NETWORK KN KINYARWANDA EN ENGLISH FR FRANCAIS

FC Barcelone yirukanye umutoza Ronald Koeman

Yanditswe na Eric Tony Ukurikiyimfura
Kuya 28 Ukwakira 2021 saa 08:20
Yasuwe :
0 0

Ronald Koeman wari umaze amezi 14 ari umutoza wa FC Barcelone, yirukanywe ku wa Gatatu nyuma yo gutsindwa na Rayo Vallevano igitego 1-0 muri Shampiyona.

FC Barcelone yabonye amanota 15 mu mikino 10 imaze gukina muri Shampiyona y’Icyiciro cya Mbere muri Espagne, La Liga, mu gihe imaze gutsindwa inshuro ebyiri mu matsinda ya UEFA Champions League.

Kuri ubu, iri ku mwanya wa cyenda muri La Liga, irushwa amanota atandatu n’amakipe ya mbere nyuma yo gutsindwa na Rayo Vallecano igitego 1-0 ku wa Gatatu.

Bwari ubwa gatatu FC Barcelone itsinzwe mu mikino ine iheruka, bikaba byabaye nyuma yo gutakaza umukino wa El Clasico yahuyemo na Real Madrid ku Cyumweru.

Mu itangazo FC Barcelone yashyize ahagaragara, yagize iti “Perezida w’ikipe, Joan Laporta, yamumenyesheje icyemezo nyuma yo gutsindwa na Rayo Vallecano. Ronald Koeman azasezera abakinnyi ku wa Kane.”

Koeman w’imyaka 58, watoje amakipe arimo iy’Igihugu y’u Buholandi, Everton na Southampton zo mu Bwongereza, yafashije FC Barcelone gusoza Shampiyona iri ku mwanya wa gatatu mu mwaka ushize w’imikino.

Uyu Muholandi yatengushywe cyane n’igenda rya Lionel Messi werekeje muri Paris St-Germain muri Kanama uyu mwaka.

FC Barcelone yananiwe gutanga amafaranga yo kugura abakinnyi bashya mu mpeshyi. Memphis Depay, Sergio Agüero na Eric Garcia bose baguzwe ku buntu mu gihe Luuk de Jong yatiriwe muri Seville.

Nyuma yo gutsindwa ku wa Gatatu, Koeman yagize ati “Umwanya ikipe iriho uvuga ko tutameze neza. Ikipe ntabwo iri ku rwego rumwe, yatakaje abakinnyi b’ingenzi kandi birigaragaza. Mu myaka ya vuba, andi makipe yariyubatse buri mwaka w’imikino, ariko twe nta byabaye.”

Umunyabigwi wa FC Barcelone, Xavi, kuri ubu utoza Al Sadd muri Qatar, ari mu bahabwa amahirwe yo gusimbura Koeman.

Ni ku nshuro ya mbere kuva muri Nzeri 1987 FC Barcelone itsindwa imikino itatu yikurikiranya yakiniye hanze, itinjije igitego, icyo gihe byatumye Umwongereza Terry Venables wari umutoza yirukanwa.

Koeman yegukanye Copa del Rey ku mpera z’umwaka w’imikino wa mbere, ariko FC Barcelone isoza Shampiyona iri inyuma ya Atletico Madrid na Real Madrid ndetse ifite amanota macye cyane kurusha ayo yagize kuva mu 2008.

Uyu mugabo yigeze gukina mu bwugarizi bwa FC Barcelone hagati ya 1989 na 1995, ayifasha kwegukana ibikombe bine bya Shampiyona ndetse anatsinda igitego cy’intsinzi cyayisheje kwegukana European Cup mu 1992.

Yagaruwe muri FC Barcelone muri Kanama 2020 nk’umutoza mukuru, na Josep Maria Bartomeu wahoze ari perezida w’iyi kipe.

Gusa, Laporta watowe muri uyu mwaka, yagaragaje ko uyu Muholandi atamushyigikiye cyane ndetse umubano wa bombi ntiwabaye mwiza kugeza ubwo Koeaman muri Nzeri yavuze ko akeneye igihe cyo kubaka ikipe nyuma y’igenda rya Messi na Antoine Griezmann.

Nyuma yo gutsindwa na Real Madrid ku Cyumweru, imodoka ya Koeman yazengurutswe n’abafana ba FC Barcelone bamututse, avuga ko batarezwe.

Ronald Koeman w'imyaka 58 yirukanywe na FC Barcelone nyuma y'amezi 14 yari amaze ayitoza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .