00:00:00 IGIHE NETWORK KN KINYARWANDA EN ENGLISH FR FRANCAIS

FC Barcelone yatandukanye na Lionel Messi

Yanditswe na Bukuru JC
Kuya 5 Kanama 2021 saa 09:38
Yasuwe :
0 0

Ikipe ya FC Barcelone yatangaje ko itazakomezanya na rutahizamu wayo Lionel Messi kubera ibibazo by’amikoro.

Messi w’imyaka 34, yari umukinnyi wigenga kuva tariki ya 1 Nyakanga nyuma y’uko yari asoje amasezerano na FC Barcelone.

Mu minsi ishize, uyu mukinnyi yari yemeye kongera amasezerano muri FC Barcelone, ariko agabanyirizwa umushahara kugeza kuri 50% ndetse n’iyi kipe ikagurisha bamwe mu bakinnyi ngo ibone ayo imuhemba.

Ku mugoroba wo kuri uyu wa Kane, tariki ya 5 Kanama 2021, FC Barcelone yatangaje ko impande zombi zibabajwe n’uko ibyo zifuzaga bitagezweho.

Iyi kipe yavuze ko Messi yashakaga kongera amasezerano ku myaka 21 yari amaze ayikinira, yanenze La Liga ko itatumye bikorwa kuri uyu wa Kane.

Messi yari yemeye kuguma muri Barcelone kugeza mu 2026, ariko La Liga ivuga ko iyi kipe igomba kugabanya imishara yayo mbere y’uko we n’abandi bakinnyi bashya bandikishwa.

FC Barcelone yagize iti “Nubwo FC Barcelone na Lionel Messi bumvikanye ndetse bakaba bari bafite ubushake bwo gusinya amasezerano mashya uyu munsi [ku wa Kane], ntibishobora kuba kubera ikibazo cy’amikoro n’imbogamizi z’imikorere [amabwiriza ya La Liga]”.

Messi yatandukanye na FC Barcelone afite agahigo ko kuyitsindira ibitego 672 ndetse yayifashije kwegukana ibikombe 10 bya La Liga, bine bya Champions League, birindwi bya Copa del Rey, anatwara Ballon d’Or esheshatu.

Kimwe mu byari biraje ishinga Perezida mushya wa FC Barcelone, Joan Laporta, ni ukongerera amasezerano Messi.

Amakipe bivugwa ko ashobora gusinyisha uyu mukinnyi arimo Paris Saint-Germain yo mu Bufaransa na Manchester City yo mu Bwongereza, aho ashobora kongera gukorana na Pep Guardiola babanye muri Barcelone.

Inkuru bifitanye isano: FC Barcelone mu ihurizo ryo kwandikisha abakinnyi bashya, kurenza imishahara yagenwe no kugumana Messi.

FC Barcelone yatandukanye na Lionel Messi kubera ibibazo by'amikoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .