00:00:00 IGIHE NETWORK KN KINYARWANDA EN ENGLISH FR FRANCAIS

FC Barcelone mu ihurizo ryo kwandikisha abakinnyi bashya, kurenza imishahara yagenwe no kugumana Messi

Yanditswe na Bukuru JC
Kuya 6 Nyakanga 2021 saa 04:38
Yasuwe :
0 0

FC Barcelone isanzwe ifite amikoro adahagaze neza, ifite ihurizo ryo gukemura ikibazo cy’umubare w’imishahara wamaze kurenga uwemewe muri La Liga kugira ngo yemererwe kwandikisha abakinnyi bashya iherutse kugura mu gihe kandi igomba kongera gusinyisha Lionel Messi wasoje amasezerano.

Ikinyamakuru Goal cyatangaje ko FC Barcelone yamaze kurenza umubare w’imishahara wemewe ku ikipe imwe muri Shampiyona y’Icyiciro cya Mbere muri Espagne, La Liga, ndetse ubu idashobora kwandikisha abakinnyi bashya iherutse kugura barimo Sergio Agüero, Memphis Depay, Emerson na Eric García.

Lionel Messi ni undi mukinnyi ushobora kwiyongera kuri aba nyuma y’uko amasezerano ye yarangiye ku wa 30 Kamena ndetse ibiganiro byo kuyongera bikaba bikomeje, ariko FC Barcelone isabwa kubanza kugabanya imishahara yayo mbere yo kongera kumusinyisha.

Bamwe mu bakinnyi b’iyi kipe batangiye gusunikirwa ku muryango ugana hanze, bamwe babyihitiyemo, abandi ku gahato bitewe n’uko bikwiye ko batanga umwanya ku bandi baguzwe.

Kuri uyu wa Kabiri, Junior Firpo yagurishijwe muri Leeds United yo mu Bwongereza kuri miliyoni 13£. Uyu musore ukina inyuma ku ruhande, yari amaze imyaka ibiri gusa ageze muri FC Barcelone.

Kumugurisha birafasha iyi kipe kuzigama miliyoni 8£ ku mwaka w’imikino.

Francisco Trincão yoherejwe mu Bwongereza nk’intizanyo muri Wolves, ku buryo ishobora kumugura. Konrad De La Fuente yagurishijwe muri Marseille naho Jean Claire-Todibo agurishwa muri Nice. Aba babiri ba nyuma bashobora gutuma FC Barcelone yizigama miliyoni 9£ yatangaga mu kubahemba no kwishyura ibindi bitandukanye.

Myugariro Matheus Fernandes yashyizwe ku ruhande nyuma yo gusesa amasezerano ye ndetse avuga ko azitabaza inkiko kuko yirukanywe binyuranyije n’amategeko.

Gusa, kurekura abo bakinnyi bose ntibigahije kuri FC Barcelone ndetse kuri ubu amaso yayerekeje ku bandi batatu ishobora kugurisha barimo Samuel Umtiti, Philippe Coutinho na Miralem Pjanić kugira ngo ishake uko igabanya miliyoni 171£ ku mishahara yayo.

Bivugwa kandi ko ubundi buryo buri gutekerezwa ari ukugabanyiriza imishahara abahembwa menshi barimo Gerard Piqué, Jordi Alba, Sergi Roberto, Sergio Busquets, Antoine Griezmann na Ousmane Dembélé.

Kugabanya iyo mishahara bizabafasha kongera gusinyisha Lionel Messi wasoje amasezerano ndetse kuri ubu akaba ari kumwe n’Ikipe y’Igihugu cye cya Argentine muri Copa América.

Uyu munyabigwi wa FC Barcelone, yitezweho gukomereza urugendo rwe rwo gukina i Camp Nou, ariko ahembwa menshi ndetse ntazongera amasezerano natabona ibyo yasabye.

Mu mwaka utaha w’imikino, FC Barcelone itegerejweho kwitwara neza nyuma y’uko ibaye iya gatatu muri Shampiyona ya 2020/21 mu gihe yasezerewe itarenze 1/8 muri UEFA Champions League.

FC Barcelone ntishobora kwandikisha abakinnyi bashya iherutse kugura barimo Sergio Aguero mu gihe itaragabanya imishahara yayo kuko yarenze iyagenwe muri La Liga
Bamwe mu bakinnyi bari kugurishwa, abandi bashobora kugabanyirizwa imishahara kugira ngo Messi yongererwe amasezerano
Miralem Pjanić ni umwe mu bandi bakinnyi bashobora kugurishwa na FC Barcelone
Eric García wakinaga muri Manchester City, ni umukinnyi mushya wa FC Barcelone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .