Espinoza wemeye ko Rayon Sports iri ku gitutu, yizeye gutwara Shampiyona

Yanditswe na Eric Tony Ukurikiyimfura
Kuya 30 Ukwakira 2019 saa 11:33
Yasuwe :
0 0

Umunya-Mexique utoza Rayon Sports, Javier Martinez Espinoza, yavuze ko ari ikipe ihora iri ku gitutu ku buryo kuba itakaje amanota ane mu mikino ibiri iheruka bitatuma idatwara igikombe cya Shampiyona y’uyu mwaka.

Ibi uyu mutoza yabivuze nyuma y’umukino w’umunsi wa gatandatu wa Shampiyona Rayon Sports yanganyijemo na Etincelles FC ubusa ku busa, uba umukino wa kabiri wikurikiranya iyi kipe inaniwe gutsinda nyuma yo gutakaza amanota atatu ubwo yatsindirwaga i Nyagatare na Sunrise FC ibitego 2-1.

Javier Martinez Espinoza yavuze ko yaje muri Rayon Sports azi ko ari ikipe ihora ku gitutu ku buryo asanga amanota imaze gutakaza uyu mwaka atatuma itisubiza igikombe cya Shampiyona yatwaye mu mwaka ushize w’imikino.

Ati “Iyi kipe buri gihe ihora ku gitutu, ibyo turabizi. Kuva ngeze hano nzi ko Rayon Sports buri gihe iba iri ku gitutu ariko mwibuke ko umwaka ushize, Rayon yatakaje imikino ine, inganya ibiri. Ubu tumaze gukina imikino itandatu dufite amanota 11, biratandukanye. Mu mwaka ushize Rayon Sports yatwaye Igikombe, rero dufite amahirwe n’uyu mwaka.”

Espinoza yavuze ko Rayon Sports yari yagerageje gukora cyane muri uyu mukino yanganyijemo na Etincelles FC, ariko igira amahirwe make yo guhusha penaliti yatewe na Rutanga Eric, aho yemeza ko hari icyo byari guhindura ku mukino.

Ati "Turi gukora cyane, turi gushyira mu bikorwa ibyo twakagombye kuba dukora ariko uyu munsi ntabwo bikunze, penaliti yari kugira icyo ihindura ariko ku bw’amahirwe make twayishuhije. Byari impanuka, birashoboka ko uyu munsi Rutanga atigiriye icyizere, tuzabireba ku mukino utaha.”

Abajijwe niba muri uyu mukino hatagaragaye icyuho cya Michael Sarpong utawukinnye kubera ikarita itukura yabonye ku mukino uheruka, Espinoza yavuze ko ari umukinnyi washoboraga kugira icyo abafasha.

Ati” Birumvikana, turamukumbuye. Afite ubunararibonye, ni umukinnyi wanjye ukomeye kandi ni byo twari dukeneye uyu munsi.”

Rayon Sports izagaruka mu kibuga ku Cyumweru tariki ya 3 Ugushyingo, yakirwa na Musanze FC mu mukino w’umunsi wa karindwi wa Shampiyona uzabera kuri Stade Ubworoherane.

Iyi kipe yatwaye Shampiyona mu mwaka ushize w’imikino, kuri ubu iri ku mwanya wa gatanu n’amanota 11, irushwa amanota atatu na Mukura Victory Sports ya mbere mu gihe APR FC ifite amanota 13 ku mwanya wa kabiri, ihura na Police FC kuri uyu wa Gatatu.

Javier Martinez Espinoza yizeye ko Rayon Sports izatwara igikombe cya Shampiyona y'uyu mwaka w'imikino nk'uko yabigenje mu mwaka ushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza