00:00:00 IGIHE NETWORK KN KINYARWANDA EN ENGLISH FR FRANCAIS

Djabel na Lague wakinanye ‘casque’ bafashije APR FC gutsinda Gasogi United

Yanditswe na Eric Tony Ukurikiyimfura
Kuya 11 Ugushyingo 2021 saa 04:45
Yasuwe :
0 0

Ibifashijwemo na Manishimwe Djabel utaragiye mu Ikipe y’Igihugu ‘Amavubi’ na Byiringiro Lague wakinanye ‘casque’ imurinda umutwe, APR FC yatsinze Gasogi United ibitego 2-1 mu mukino wa gicuti wabereye i Shyorongi mu gitondo cyo kuri uyu wa Kane.

APR FC yakinnye uyu mukino mu rwego rwo kwitegura iyo ifite imbere irimo ibiri iyo izahuramo na RS Berkane mu ijonjora ribanziriza amatsinda muri CAF Confederation Cup mu gihe Gasogi United yitegura Shampiyona.

Gasogi United yari yasanze APR FC ku kibuga ikoreraho imyitozo i Shyorongi, yafunguye amazamu hakiri kare ku gitego cyinjijwe na Armel Ghislain ku munota wa 15.

Gusa, ibyishimo byayo ntibyatinze kuko Manishimwe Djabel yishyuriye Ikipe y’Ingabo nyuma y’iminota ibiri.

Manishimwe yakinnye uyu mukino mu gihe atitabiriye ubutumire bw’Amavubi akina na Mali kuri uyu wa Kane saa Kumi n’Ebyiri.

Kimwe na Ruboneka Bosco wabanje muri uyu mukino ndetse na Kwitonda Alain ‘Bacca’, ubuyobozi bwa APR FC bwavuze ko impamvu bose batitabiriye ubutumire bw’Ikipe y’Igihugu ari uko bafite uburwayi butandukanye.

Byiringiro Lague wari umaze amezi abiri adakina, yatsinze igitego cya kabiri cya APR FC ku munota wa 31, ayifasha kwegukana intsinzi muri uyu mukino wa gicuti.

Uyu mukinnyi w’imyaka 21, yakinnye yambaye ‘casque’ imurinda umutwe kuko yatewe inkokora mu gahanga ubwo u Rwanda rwakinaga na Kenya muri Nzeri i Kigali ndetse kuva icyo gihe yari atarongera kujya mu kibuga.

Muri CAF Confederation Cup, APR FC izabanza kwakira RS Berkane mu mukino ubanza uzabera i Kigali ku wa 28 Ugushyingo mu gihe uwo kwishyura uzakirwa na RS Berkane ku wa 5 Ukuboza 2021.

Mbere yo gukina n’iyi kipe yo muri Maroc, biteganyijwe ko APR FC izabanza gukina imikino ibiri ya Shampiyona, aho izahura na Etincelles FC ku wa 19 Ugushyingo ndetse na Rayon Sports ku wa 24 Ugushyingo 2021.

Ikipe y’Ingabo izakina undi mukino wa kabiri wa gicuti na Gorilla FC ku Cyumweru, uzabera kuri Stade ya Kigali i Nyamirambo saa Cyenda.

Byiringiro Lague (ubanza iburyo) yakinanye 'casque' imurinda umutwe
Abakinnyi ba Gasogi United babanje mu kibuga muri uyu mukino wa gicuti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .