De Gaulle yabwiye urukiko ko adakwiye kubazwa amakosa yakozwe n’abakozi ba FERWAFA nubwo yayasinyiye

Yanditswe na Evariste Nsengimana
Kuya 16 Ukwakira 2017 saa 02:06
Yasuwe :
0 0

Umuyobozi w’Ishyirahamwe ry’Umupira w’Amaguru mu Rwanda (FERWAFA), Nzamwita Vincent de Gaulle, yabwiye Urukiko Rwisumbuye rwa Nyarugenge ko adakwiye kubazwa amakosa yakozwe n’abakozi b’urwego ayobora nubwo ari we wayasinyeho.

Yabitangaje kuri uyu wa Mbere ubwo yireguraga ku bujurire bwatanzwe n’Ubushinjacyaha ku byaha yari akurikiranyweho we n’uwahoze ari Umunyamabanga wa Ferwafa, Mulindahabi Olivier.

Muri Kamena uyu mwaka nibwo Urukiko rw’Ibanze rwa Nyarugunga rwagize umwere De Gaulle, rukatira Mulindahabi igifungo cy’amezi atandatu ku byaha bishingiye ku itonesha, icyenewabo mu gutanga isoko ryo kubaka hoteli y’inyenyeri enye ya Ferwafa.

Icyo gihe urukiko rwasanze ko ibiregwa De Gaulle bitakwitwa gutonesha, ruvuga ko nta bufatanyacyaha mu guhombya umutungo ufitiye rubanda inyungu yakoze kuko atasinye ku masezerano abigambiriye.

Ubushinjacyaha bwahise bujuririra uyu mwanzuro ndetse na Mulindahabi ajurira igihano cy’amezi atandatu yahawe.

Ubwo yatangiraga kwiregura kuri uyu munsi haburanwa ubwo bujurire, De Gaulle yavuze ko adakwiye kubazwa amakosa yakozwe n’abakozi ba Ferwafa (abatekinisiye) bakurikiranaga isoko ryo kubaka hoteli ya Ferwafa.

Yagize ati “Nyakubahwa Perezida (w’iburanisha), nagira ngo nibutse ko ntari umukozi wa FERWAFA […]. Simpembwa na Ferwafa. Perezida wayo aba ashinzwe gukurikirana ibikorwa adahembwa ariko akabikurikirana mu nyungu za Leta. Ibyo byose (ibyaha ashinjwa) nyakubahwa Perezida, biri mu rwego rwa tekiniki.”

De Gaulle yasobanuriye urukiko ko hashyizweho akanama gashinzwe gukurikirana ibijyanye n’itangwa ry’amasoko, bigatuma nta bubasha nka Perezida agira ku byemezo by’ako.

Yagize ati “Ibyo byatumaga Perezida atagira ingufu nubwo ubushinjacyaha bwavugaga ko ari we byose. Kiriya kigo muvuga (Ferwafa), gifite amategeko akigenga. Perezida wacyo ntari, ntazanaba hejuru y’ayo mategeko. Dosiye y’amasoko yose itegurwa na ‘system’ ikurikirana ibikorwa bya buri munsi; Perezida ntiyaza ngo ashyireho umurongo uretse ku byashyizweho nayo. Aho perezida aza mu bintu by’amasoko, ni ahantu hamwe gusa. Ni mu gushyiraho umukono ku masezerano ahabwa n’ububasha n’amategeko ya Ferwafa. Ni nabyo nakoze.”

Yabwiye urukiko ko atari umutekinisiye ku buryo yamenya ibijyanye n’amasoko, ko abo bakozi aribo bakoze amakosa bakamuhereza akayasinya.

Ku bijyanye n’inama ubushinjacyaha buvuga ko zabaga abizi kandi ko zavugirwagamo ibijyanye n’itangwa ry’amasoko, yisobanuye ko iyo Ferwafa ifite abashyitsi, ikoresha ibiro bya Perezida ko ari nabyo byabaye umunsi abashyitsi ba FIFA bazaga gusinya amasezerano yo kubaka iyo hoteli, ko we yaje kubafata abajyanye kwa Minisitiri ufite mu nshingano Siporo n’Umuco.

De Gaulle yavuze ko ibyo bigaragaza ko nta shingiro na rimwe urukiko rukwiye guheraho rumubaza amakosa yakozwe n’abandi bakozi, cyane cyane ibijyanye na tekinike kandi atari umutekinisiye.

Ubushinjacyaha bwavuze ko bitumvikana uburyo Umuyobozi Mukuru asinya ibyo atazi kandi nta wamubujije gukurikirana ibikorerwa mu rwego ayobora.

Bwavuze kandi ko nka Perezida wa Ferwafa, afite inshingano mu buryo ubwo aribwo bwose, bwo gufata umwanzuro wose mu ishyirahamwe ayobora ndetse ko nta wavuga ko nta ruhare yabigizemo kandi mbere yo gusinya aya masezerano hari ibindi byacuriwemo umugambi wo gukora icyaha byabaye.

Mulindahabi Olivier we yireguye avuga ko yahamijwe icyaha cyo konona umutungo ufitiye rubanda akamaro kandi yaratawe muri yombi amafaranga ya FIFA yagombaga kubaka hoteli ataraza, akavuga ko atashinjwa gukoresha nabi umutungo utaramugeze mu ntoki.

Uyu mugabo yanavuze ko na FIFA yagombaga gutera inkunga uwo mushinga cyangwa Ferwafa zitigeze zigaragaza ko hari ukunyereza umutungo byabayeho, bityo ko nta mpamvu yo kubihanirwa.

Ubushinjacyaha bwo bwavuze ko kuba Ferwafa cyangwa Fifa bitarigeze biregera iki cyaha, Ubugenzacyaha bufite inshingano zo gukurikirana icyaha cyo gukoresha nabi umutungo ufitiye inyungu rubanda, bukabikora bubisabwe cyangwa bubyibwiye mu gihe bufite ibimenyetso.

Bwanavuze ko Mulindahabi yakatiwe igihe gito ukurikije icyaha yahamijwe, ko umucamanza yamugabanyirije igihano kandi atarigeze yemera icyaha cyangwa ngo yorohereze urukiko bityo ko igihano cye gikwiye kwiyongera.

Uru rubanza kandi rwagaragayemo na Muhirwa Adolphe wari warahawe imirimo yo kwiga iyubakwa ry’iyo hoteli wakatiwe gufungwa amezi atandatu kubera kuba icyitso mu bufatanyacyaha.

Muhirwa yisobanuye ko amakosa yakozwe muri Ferwafa adakwiye kuyaregwamo kuko yari yarahawe ikiraka cy’iminsi 14 cyo gusesengura dosiye z’abahataniraga isoko, kandi ko nyuma yo kuyisesengura, yayishyikirije akanama gashinzwe amasoko ngo kayisuzume mbere y’uko byemezwa.

Ubushinjyacyaha bwavuze ko icyaha aregwa ari icy’ubufatanyacyaha kandi ko gihanwa n’amategeko y’u Rwanda, na we buvuga ko yakatiwe igihe gito ukurikije icyaha ashinjwa.

Isoko ryo kubaka hoteli y’inyenyeri enye ya Ferwafa ryari ryatsindiwe na rwiyemezamirimo witwa Segatabazi Protais, atsinze Sosiyete y’Ubwubatsi yitwa Horizon Construction.

Ubushinjacyaha buvuga ko Horizon ariyo yari ifite ubunararibonye ugereranyije n’uwo rwiyemezamirimo ko yari yasabye kuyubakira amafaranga make ugereranije n’uwahawe isoko. Amategeko agenga itangwa ry’amasoko ntareba gusa uwatse amafaranga make, anaha amahirwe ufite ubushobozi bwo gukora neza ibyo apiganirwa ari nayo ngingo abaregwa batanga.

Umucamanza amaze kumva uko buri ruhande rwiregura, yatangaje ko umwanzuro w’urukiko uzasomwa ku wa Gatatu, tariki ya 25 Ukwakira 2017.

Perezida wa Ferwafa, Nzamwita Vincent de Gaulle na Mulindahabi wahoze ari Umunyamabanga wa Ferwafa ubwo bari ku rukiko
Mulindahabi na Nzamwita nyuma y'iburanisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza