Kwamamaza

Davis Kasirye arashaka gusesa amasezerano na DCMP

Yanditswe kuya 2-11-2016 saa 21:50' na Manzi Rema Jules


Rutahizamu w’umugande, Davis Kasirye wagize ibihe byiza muri Rayon Sports umwaka ushize bikamuhesha kubengukwa na Daring Club Motema Pembe y’i Kinshasa yamutanzeho akayabo ka miliyoni 70 z’amafaranga y’u Rwanda ariko kuva yageramo ntiyahiriwe ku buryo yatangiye gutekereza gusesa amasezerano na yo.

Kasirye yaje mu Rwanda mbere gato y’umwaka wa 2015/2016 avuye iwabo muri Uganda aho yari yarabuze amahirwe yo gukina aza muri Rayon Sports kugerageza amahirwe biramuhira mu mikino ya gishuti yakinnye ndetse ahabwa amasezerano y’imyaka itatu muri iyi kipe.

Kwitwara neza kwe afasha Rayon Sports kubona amanota ku mikino itandukanye byatumye yigarurira imitima y’abakunzi b’iyi kipe ndetse bidatinze ku ncuro ya mbere ahamagarwa na Milutin Micho mu ikipe y’igihugu ya Uganda izwi nka Uganda Cranes yagombaga gukina na Zimbabwe muri Gicurasi.

Nubwo uyu musore w’imyaka 23 yahiriwe cyane n’umwaka ushize agatsindira Rayon Sports ibitego 13 muri shampiyona akanayifasha kwegukana igikombe cy’Amahoro, nyuma yo kwerekeza muri DCMP atanzweho miliyoni 70 uyu mwaka nta mahirwe yagiriye muri iyi kipe kuko adakinishwa ku buryo ngo yatangiye gutekereza kuyivamo.

Aganira na IGIHE Kasirye yagize ati “Hano ntibirakunda, ntabwo bigenda nk’uko nabitekerezaga ariko ikibazo ni umutoza. Ntabwo akinisha. Ndashaka gusohoka muri iyi kipe kuko ndumva bindambiye. Niko bimeze.”

Gakwaya Olivier, Umuvugizi Rayon Sports igifite inyungu muri uyu mukinnyi kuko mu masezerano yagiranye na DCMP harimo ko igihe azaba agurishijwe ahandi Rayon Sports izahabwa 20% by’inyungu izamuvaho, yavuze ko kuba Kasirye yasaba gusesa amasezerano ari uburenganzira bwe ariko kugaruka muri iyi kipe bigoranye.

Ati “Twe mu masezerano harimo ko igihe azaba agurishijwe tuzafata 20% ariko nta ngingo yo kuba yagaruka muri Rayon Sports irimo. Kuri ubu dufite abanyamahanga bane kandi nabo mubona ko bigora umutoza kumenya abo yicaza kuko bose ni abahanga cyane, ibaze nawe aje akiyongeraho bakaba batanu?”

“Sinavuga ngo ntiyaza muri Rayon Sports ariko ni ibintu byabanza kuganirwaho cyane kuko imyanya y’abanyamahanga irasa n’iyashize. Ndabizi ku ruhande rw’abafana bo bahita bishimira ko agaruka kandi nibyo yaradukoreye cyane ariko nabwo ntiyaba ahunga aho bamwicaza ngo natwe abe aricyo tumuzanira.”

Kasirye yerekeje muri iyi kipe yo muri Congo Kinshassa ari kumwe na Ismaila Diarra, Umunya-Mali bafatanyaga ku busatirizi bwa Rayon Sports ariko bose nta n’umwe urahabwa amahirwe yo kwigaragaza kuko kenshi baba bicaye ku ntebe y’abasimbura iminota 90 ikarangira.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved