Cristiano Ronaldo yataye igitambaro cya kapiteni ubwo yangirwaga igitego umupira warenze umurongo

Yanditswe na Bukuru JC
Kuya 28 Werurwe 2021 saa 09:41
Yasuwe :
0 0

Rutahizamu w’ikipe y’Igihugu ya Portugal, Cristiano Ronaldo, yarakajwe no kwangirwa igitego ubwo yibwiraga ko ahesheje amanota atatu igihugu cye mu minota y’inyongera y’umukino cyanganyijemo na Serbia ibitego 2-2 ku wa Gatandatu.

Muri uyu mukino wabereye i Belgrade, Cristiano Ronaldo yafashe umupira wamusanze mu rubuga rw’amahina, awutera mu izamu arobye umunyezamu Marko Dmitrović.

Myugariro wa Serbia, Stefan Mitrović, yihutiye kuwukuramo, awusubiza mu kibuga, abasifuzi bemeza ko utarenze umurongo, umukino urakomeza.

Gusa, amashusho y’ibyabaye yerekana ko umupira wari wamaze kurenga umurongo ndetse Ronaldo yagaragaje uburakari. Kubera ko nta koranabuhanga ry’amashusho ryifashishwa mu misifurire [VAR] ryari rihari, uyu rutahizamu wa Portugal yirukankiye kubwira umusifuzi wo ku ruhande ko umupira we wageze mu izamu mbere y’uko akuramo igitambaro cy’ubukapiteni akagita hasi ndetse akaba yahawe ikarita y’umuhondo.

Nyuma yaho, Ronaldo yanditse kuri Instagram ati “kuba kapiteni w’ikipe y’Igihugu ya Portugal ni kimwe mu byubahiro bikomeye kandi bidasanzwe mu buzima bwanjye.”

Yakomeje agira ati “Ntanga kandi nzakomeza gutanga ibyanjye byose ku gihugu, ibyo ntibizahinduka. Gusa hari ibihe bigoranye kubyihanganira, by’umwihariko iyo twumva ko igihugu cyose kibabajwe. Reka turebe imbere, amahirwe kuri Portugal.”

Uyu mukino wo gushaka itike y’Igikombe cy’Isi, wabaye umwihariko kuri Aleksandar Mitrović wabaye umukinnyi umaze gutsindira Serbia ibitego byinshi, kuko ari 39 mu mikino 63 amaze kuyikinira.

Mitrović usanzwe ukinira Fulham, yatsindiye igihugu cye igitego cya mbere muri uyu mukino warangiye ari 2-2, aturutse inyuma kuko igice cya mbere cyarangiye Portugal ifite ibitego 2-0.

Diogo Jota yatsindiye Portugal ku munota wa 11 n’uwa 36 naho Mitrović na Filip Kostić batsinda ku wa 46 n’uwa 60.

Serbia yasoje ari abakinnyi 10 mu kibuga nyuma y’ikarita itukura yahawe Nikola Milenković mu minota y’inyongera.

Ibihugu byombi binganya amanota ane mu mikio ibiri imaze gukinwa mu itsinda A, ni nyuma y’uko Portugal yari yatsinze Azerbaijan igitego 1-0 mu gihe Serbia yatsinze Ireland ibitego 3-2.

Uyu mukino wari uwa 1000 ku mutoza Fernando Santos umaze imyaka 33 atoza amakipe asanzwe n’ikipe y’Igihugu ya Portugal.

Diogo Jota yatsindiye Portugal ibitego bibiri i Belgrade
Aleksandar Mitrović yabaye umukinnyi umaze gutsindira Serbia ibitego byinshi
Filip Kostić yishyuriye Serbia ku munota wa 60
Cristiano Ronaldo yibwiraga ko ahesheje Portugal intsinzi mu minota y'inyongera ubwo yarobaga Marko Dmitrović
Stefan Mitrović yihutiye gukura umupira mu izamu nubwo wari warenze umurongo
Ronaldo yagiye kuburana ku musifuzi amubwira ko umupira wari warenze umurongo
Cristiano Ronaldo wahawe ikarita y'umuhondo, yakuyemo igitambaro cya kapiteni agikubita hasi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .