00:00:00 IGIHE NETWORK KN KINYARWANDA EN ENGLISH FR FRANCAIS

Cristiano Ronaldo yasubiye muri Manchester United nyuma y’imyaka 12

Yanditswe na Bukuru JC
Kuya 27 Kanama 2021 saa 08:20
Yasuwe :
0 0

Manchester United yatangaje ko yamaze kumvikana na rutahizamu Cristiano Ronaldo kugira ngo yongere kuyikinira nyuma y’imyaka 12 ayivuyemo.

Ronaldo w’imyaka 36, yakiniraga Juventus de Turin yo mu Butaliyani, aho yari amaze imyaka itatu nyuma yo kuva muri Real Madrid.

Manchester United yemeye kwishyura miliyoni 12,8£ ku masezerano y’amezi 10 Cristiano Ronaldo yari asigaje muri Juventus ndetse byitezwe ko azakorera isuzuma ry’ubuzima i Lisbon.

Ronaldo yatsinze ibitego 118 mu mikino 292 yakiniyemo Manchester United ubwo yayibagamo bwa mbere kugeza mu 2009, aho yahise agurwa na Real Madrid.

Itangazo rya Manchester United riha ikaze Cristiano Ronaldo, ryasohotse nyuma y’amasaha 24 yavugishije abatari bake dore ko umukeba wayo, Manchester City, ari yo yavugwaga mu biganiro n’uyu mukinnyi.

Gusa, Ronaldo yahisemo gusubira muri Manchester United aho yamaze imyaka itandatu, atwara ibikombe bitatu bya Premier League, kimwe cya Champions League, bibiri bya League Cup, FA Cup imwe, Igikombe cy’Isi cy’Amakipe na Community Shield ubwo yatozwaga na Sir Alex Ferguson.

Mu kiganiro yagiranye n’abanyamakuru kuri uyu wa Gatanu, kibanziriza umukino wa Wolves uzaba ku Cyumweru, Ole Gunnar Solskjaer utoza Manchester United, yari yaciye amarenga yo gusinyisha Ronaldo.

Yavuze ko Ronaldo azi ko Manchester United ihari ndetse na Bruno Fernandes bakomoka hamwe muri Portugal, ari kumuvugisha.

Amasaha make nyuma yaho, iyi kipe yatangaje ko byamaze kurangira ndetse Ronaldo azaba umukinnyi wayo wa gatatu mushya nyuma ya Jadon Sancho na Raphaël Varane.

Imibare igaragaza ko Cristiano Ronaldo ari umwe mu bakinnyi beza ku Isi:

  • Yegukanye Ballon d’Or eshanu: 2008 (muri Man Utd), 2013, 2014, 2016 na 2017 (ari muri Real Madrid).
  • Yatwaye Champions League eshanu: 2008 (muri Man Utd), 2014, 2016, 2017 na 2018 (ari muri Real Madrid).
  • Yatwaye ibikombe birindwi bya shampiyona muri eshatu zikomeye i Burayi: Mu 2007, 2008, 2009 (muri Man Utd), 2012 na 2017 (muri Real Madrid) na 2019, 2020 (muri Juventus).
  • Yegukanye Igikombe cy’u Burayi akinira Portugal mu 2016.
  • Yegukanye ibikombe 32 mu makipe yanyuzemo no mu ikipe y’Igihugu: Sporting Lisbon, Manchester United, Real Madrid, Juventus na Portugal.
  • Ni we mukinnyi watsinze ibitego byinshi mu mateka ya UEFA Champions League: 134 mu mikino 176.
Cristiano Ronaldo yasubiye muri Manchester United nyuma y’imyaka 12
Ronaldo yari asigaje amezi 10 ku masezerano y'imyaka ine yasinye muri Juventus mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .