00:00:00 IGIHE NETWORK KN KINYARWANDA EN ENGLISH FR FRANCAIS

Cristiano Ronaldo yahigitse The Rock ku rutonde rw’ibyamamare byinjiza menshi kuri Instagram

Yanditswe na Bukuru JC
Kuya 2 Nyakanga 2021 saa 06:52
Yasuwe :
0 0

Rutahizamu w’Ikipe y’Igihugu ya Portugal na Juventus, Cristiano Ronaldo, ayoboye urutonde rw’ibyamamare byinjiza amafaranga menshi kuri buri kimwe bishyira ku rubuga rwa Instagram mu 2021, aho yinjiza miliyoni 1,6$ ku butumwa bumwe.

Urutonde rwashyizwe hanze na Sosiyete ya Hopper HQ ku wa Kane, rugaragaza ko Cristiano Ronaldo ari we winjiza amafaranga menshi ku butumwa bumwe ashyize kuri Instagram, aho yasimbuye umukinnyi wa filime Dwayne "The Rock" Johnson.

Ni ku nshuro ya mbere Cristiano Ronaldo yayoboye uru rutonde rwatangiye gukorwa na Hopper HQ mu 2017.

Uyu mukinnyi wa Juventus wanyuze mu makipe ya Manchester United na Real Madrid, kuri ubu akurikirwa n’abasaga miliyoni 308 kuri Instagram ndetse yinjiza miliyoni 1,6$ ku butumwa bumwe.

The Rock wakinnye muri Filime "Fast and Farious", afite miliyoni 250 z’abamukurikira ndetse ashobora kwinjiza arenga miliyoni 1,52$ ku butumwa bumwe mu gihe umuhanzi Ariane Grande (winjiza miliyoni 1,51$) ari ku mwanya wa gatatu.

Lionel Messi udafite ikipe kuri ubu nyuma yo gusoza amasezerano yari afitanye na FC Barcelone ku wa Gatatu, ni undi mukinnyi wenyine uri mu 10 ba mbere ndetse ari ku mwanya wa karindwi.

Uyu Munya-Argentine ufite abamukurikira bagera kuri miliyoni 224, yinjiza arenga miliyoni 1,1$ ku butumwa anyujije kuri Instagram ye.

Neymar ukinira Paris Saint-Germain yo mu Bufaransa n’Ikipe y’Igihugu ya Brésil, ni undi mukinnyi winjiza menshi, aho ari ku mwanya wa 16 n’ibihumbi 824$.

Sosiyete ya Hopper HQ yo mu Bwongereza, ikoresha imbuga nkoranyamabaga z’ibigo bitandukanye n’abantu ku giti cyabo, yatangiye gukora uru rutonde rw’abinjiza menshi kuri Instagram guhera mu 2017.

Kimwe mu byo yagendeyeho ikora uru rutonde hari isesengura yakoze ku mpuzandengo y’umubare w’ubutumwa ibi byamamare bisangiza kuri Instagram, ababureba, uburyo ibiciro byo kwamamaza bihagaze n’umubare w’abakurikira ibyo byamamare.

Mu byamamare 10 bya mbere byinjiza menshi, muri uyu mwaka harimo abagore batandatu nubwo kuri ubu ari inshuro ya mbere Kardashian cyangwa Jenner bataje muri batatu ba mbere.

Ibyamamare 10 byinjiza menshi ku butumwa bwo kuri Instagram

  1. Cristiano Ronaldo, miliyoni 308 z’abamukurikira – asaga miliyoni 1,6$ ku butumwa bumwe.
  1. Dwayne "The Rock" Johnson, miliyoni 250 z’abamukurikira, $1.52$ ku butumwa bumwe.
  1. Ariana Grande, miliyoni 247 z’abamukurikira, $1.51$ ku butumwa bumwe.
  1. Kylie Jenner, miliyoni 244 z’abamukurikira, $1.49$ ku butumwa bumwe.
  1. Selena Gomez, miliyoni 241 z’abamukurikira, $1.46$ ku butumwa bumwe.
  1. Kim Kardashian, 232 z’abamukurikira, $1.41$ ku butumwa bumwe.
  1. Lionel Messi, miliyoni 224 z’abamukurikira, $1.16$ ku butumwa bumwe.
  1. Beyonce Knowles, miliyoni 189 z’abamukurikira, $1.14$ ku butumwa bumwe.
  1. Justin Bieber, miliyoni 180 z’abamukurikira, $1.11$ ku butumwa bumwe.
  1. Kendall Jenner, miliyoni 172 z’abamukurikira, $1.05$ ku butumwa bumwe.
Cristiano Ronaldo ayoboye urutonde rw’ibyamamare byinjiza akayabo kuri Instagram
The Rock ni umwe mu bagabo bane bari mu byamamare 10 bya mbere byinjiza menshi kuri Instagram mu 2021
Umuhanzi Ariane Grande ari ku mwanya wa gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .