Coutinho yerekeje muri FC Barcelone aciye agahigo, anashyirirwaho igiciro cya miliyoni 400 €

Yanditswe na Manzi Rema Jules
Kuya 7 Mutarama 2018 saa 08:57
Yasuwe :
1 0

Umunya-Brazil, Philippe Coutinho, wakiniraga Liverpool yo mu Bwongereza yerekeje muri FC Barcelone atanzweho akayabo ka miliyoni 145 z’ama-pound, aba umukinnyi wa mbere uhenze mu mateka ya Espagne, anashyirirwaho igiciro fatizo cya miliyoni 400 z’ama-Euro (€ ) ku yindi kipe izamushaka.

Coutinho Correia yatangiye kwifuzwa bikomeye na FC Barcelone umwaka ushize ngo asimbure mugenzi we w’Umunya-Brazil, Neymar Junior Santos, wari werekeje muri Paris Saint-Germain yo mu Bufaransa ariko Liverpool ikamuryamaho.

Kuri uyu wa Gatandatu nibwo yarekuwe yerekeza muri iyi kipe iri mu zikomeye muri Shampiyona ya Espagne "La Liga" gukinana na Luis Suarez babanye i Merseyside ndetse na Lionel Messi.

Uyu mukinnyi w’imyaka 25, yaguzwe miliyoni 145 z’ama-pound ahita aba umukinnyi wa mbere uhenze uguzwe n’ikipe yo muri Espagne nyuma ya Gareth Bale wagiye muri Real Madrid ava muri Tottenham Hotspur atanzweho miliyoni 86 z’ama-pound mu 2013.

Coutinho yahise aba n’umukinnyi wa kabiri uhenze mu mateka ya ruhago, inyuma ya Neymar watanzweho miliyoni 198 z’ama-pound umwaka ushize ava muri FC Barcelone ajya muri PSG.

Mu rwego rwo kwirinda ko uyu mukinnyi hagira indi kipe imwifuza akaba yagenda ku giciro kiri hasi, mu masezerano uyu mukinnyi yagiranye na FC Barcelone harimo ingingo ivuga ko mu gihe haba hagize ikipe ishaka kumugura, amasezerano ye atararangira nibura yamutangaho agera kuri miliyoni 400 z’ama-Euro.

Abakinnyi 10 baguzwe akayabo mu mateka ya ruhago, batatu ba nyuma banganya agaciro:

1. Neymar (2017, Barcelone - PSG, £198m)

2. Philippe Coutinho (2018, Liverpool - Barcelone, £145m)

3. Ousmane Dembélé (2017, Borussia Dortmund - Barcelone, £97m)

4. Paul Pogba (2016, Juventus - Manchester United, £89m)

5. Gareth Bale (2013, Tottenham - Real Madrid, £86m)

6. Cristiano Ronaldo (2009, Manchester United - Real Madrid, £80m)

7. Gonzalo Higuain (2016, Napoli - Juventus, £75.3m)

8. Neymar (2013, Santos - Barcelone, £71.5m)

9. Romelu Lukaku (2017, Everton - Manchester United, £75m)

9. Virgil van Dijk (2018, Southampton - Liverpool, £75m)

9. Luis Suarez (2014, Liverpool- Barcelona, £75m)

Coutinho agera i London mu nzira yerekeza i Barcelona
Philippe Coutinho ubwo yuriraga indege ajya muri Espagne
Coutinho n'umugore we Aine
Coutinho aganira na Kia Joorabchian mbere yo kwerekeza mu Mujyi wa Barcelone
Philippe Coutinho ava mu ndege ubwo yageraga i Barcelona aho agiye kurangiza ibyo gushyira umukono ku masezerano
Coutinho w'imyaka 25 yashyize umukono ku masezerano y'imyaka itanu n'igice akinira FC Barcelone
FC Barcelone yerekanye Coutinho nk'umukinnyi wayo ibinyujije muri video
Coutinho avuye ku kibuga Anfield cya Liverpool atsinze ibitego 54 mu mikino 200

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza