CHAN 2020: Tanzania yasezereye Namibia mu mukino wanditse amateka mu marushanwa ya CAF

Yanditswe na Eric Tony Ukurikiyimfura
Kuya 24 Mutarama 2021 saa 08:43
Yasuwe :
0 0

Namibia yo mu itsinda D, yabaye igihugu cya kabiri gisezerewe muri Shampiyona Nyafurika ihuza abakinnyi bakina imbere mu bihugu byabo (CHAN 2020) iri kubera muri Cameroun, ni nyuma yo gutsindwa na Tanzania igitego 1-0 ku wa Gatandatu.

Ikurikiye Zimbabwe yo mu itsinda A, yamaze gusezererwa mu irushanwa ry’uyu mwaka nyuma yo gutsindwa imikino ibiri ibanza mu matsinda.

Umukino waraye uhuje Tanzania na Namibia, wanditse amateka mashya mu marushanwa y’umupira w’amaguru ategurwa n’Impuzamashyirahamwe y’Umupira w’Amaguru muri Afurika (CAF), aho wasifuwe n’abagore barimo Lidya Tafesse wo muri Ethiopia, yungirijwe na Bernadettar Asimenye Kwimbira wo muri Malawi na Mimisen Agatha Iyorhe wo muri Nigeria, babaye aba mbere basifuye irushanwa ry’abagabo.

Uburyo bwa mbere bukomeye bwawubonetsemo, ni ubwo ku munota wa 29 bwabonywe n’ikipe ya Tanzania, ariko umupira watewe na Farid Mussa, usubizwa inyuma n’umunyezamu Kamaijanda Ndisiro mbere y’uko bagenzi be bakiza izamu.

Namibia yagize amahirwe kandi ku buryo bwabonywe na Ayubu Lyanga na Saidi Juma mu gihe yo yagerageje uburyo bwa Marcel Papama, umunyezamu Aishi Manula abyitwaramo neza mu gice cya mbere.

Nyuma y’akaruhuko, kapiteni wa Namibia, Absalom Limbondi, yatumye umunyezamu wa Tanzania akuramo imipira ibiri ikurikiranya ku mashoti yagerageje.

Ku munota wa 63, Lyanga yabonye umwanya mu rubuga rw’amahina, acenga abakinnyi babiri ba Namibia, atera umupira wakuwemo na Ndisiro.

Tanzania yafunguye amazamu nyuma y’iminota ibiri ubwo umunyezamu wa Namibia yananirwaga gukuraho umupira wari uhinduwe na Lyanga, aho yagerageje kuwukuraho n’ikiganza kimwe, ukujya mu nzira za Farid Mussa akawusubiza mu izamu.

Namibia yashoboraga kwishyura ku munota wa 77 ubwo Isaskar Guribab wagiyemo asimbura, yatunguraga umunyezamu Manula, ariko umupira uca ku ruhande.

Kwitwara neza k’umunyezamu Manula mu minota ya nyuma, akuramo imipira y’abarimo Absalom Limbondi na Gurirab, byafashije Tanzania gutsinda umukino wa mbere mu gihe Namibia yasezerewe.

Muri iri tsinda D, Guinea na Zambia byanganyije igitego 1-1 mu mukino wabanje, ni byo biyoboye n’amanota ane, imbere ya Tanzania ifite amanota atatu mu gihe Namibia nta nota ifite.

Ku munsi wa nyuma uzakinwa ku wa Gatatu, Nambia izahura na Zambia kuri Stade ya Limbe mu gihe Guinea izakina na Tanzania kuri Stade de la Réunification i Douala.

CHAN 2020 irakomeza kuri iki Cyumweru hakinwa umunsi wa nyuma mu itsinda C, aho Burkina Faso ikina na Cameroun mu gihe Zimbabwe ihura na Mali, imikino yombi itangira saa tatu z’ijoro.

Uyu mukino wabaye uwa mbere w'abagabo wayobowe n'abagore mu marushanwa ya CAF
Ivan Kamperipa ahanganiye umupira Ditram Adrian Nchimbi
Charles Hambira akura umupira kuri Ditram Nchimbi wa Tanzania
Abanya-Tanzania bishimira igitego kimwe cyatsinzwe na Farid Mussa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .