CHAN 2020: RDC ikina na Cameroun yateye utwatsi ibipimo byerekanye ko abakinnyi 13 bayo banduye COVID-19

Yanditswe na Eric Tony Ukurikiyimfura
Kuya 30 Mutarama 2021 saa 11:20
Yasuwe :
0 0

Ikipe y’Igihugu ya Repubulika Iharanira Demokarasi ya Congo yateye utwatsi ibyavuye mu bipimo bya COVID-19 byafashwe abayigize bikagaragaza ko hari 13 banduye iki cyorezo mbere y’amasaha make ngo ihure na Cameroun muri ¼ cya CHAN 2020 kuri uyu wa Gatandatu.

Ku wa Gatanu ni bwo hashyizwe ahagaragara ibyavuye mu bipimo bya COVID-19 byafashwe ikipe ya Repubulika Iharanira Demokarasi ya Congo ku wa Kane.

Ibi byagaragaje ko hari abandi 13 bagize iyi kipe basanzwemo COVID-19 biyongera ku bandi icyenda batari bakira iki cyorezo, barimo batatu bari mu kato i Yaoundé n’abandi batandatu bari i Douala.

Umutoza Florent Ibenge n’abakinnyi Ley Matampi , Guy Serge Mukumi na Doxa Gikanji, bose batangiye kwitabira imyitozo ku wa Gatatu nyuma y’uko bigaragaye ko nta COVID-19 bakirwaye.

Ibisubizo byagaragajwe ku wa Gatanu ntibyakiriwe neza n’abahagarariye itsinda rya Repubulika Iharanira Demokarasi ya Congo iri muri CHAN, basaba Impuzamashyirahamwe y’Umupira w’Amaguru muri Afurika (CAF) ko hafatwa ibindi kandi bigasuzumirwa ahatandukanye.

Radio Okapi yo muri Repubulika Iharanira Demokarasi ya Congo yatangaje ko abaganga ba CAF baraye bageze kuri hoteli ikipe y’iki gihugu icumbitsemo, bafata ibindi bipimo.

Visi Perezida w’Ishyirahamwe ry’Umupira w’Amaguru muri iki gihugu, wagiye ayoboye itsinda ryagiye muri Cameroun, Théobald Binamungu, yagize ati “Twagize ibisubizo bya COVID-19 bigoye. Twasanze hari abanduye, hari n’abashidikanywaho, bitagaragazwa ko banduye cyangwa ari bazima.”

“Byatumye dushaka kumenya aho ibyo byakorewe, twasanze laboratwari yakorewemo ibipimo bya mbere itandukanye n’iyakoze iby’ubu. CAF izatubwira mu by’ukuri abarwaye n’abatarwaye. Ibisubizo baduhaye twabyanze, twasabye ko byongera gusuzumwa.”

Mu kiganiro yagiranye n’itangazamakuru ku wa Gatanu mu gitondo, Florent Ibenge, yavuze ko nk’abatoza babangamiwe no kuba batinda kumenya ibyavuye mu bipimo bya COVID-19 kugira ngo bamenye abakinnyi bazifashisha mu mukino.

Repubulika Iharanira Demokarasi ya Congo ni yo imaze kwegukana iri rushanwa inshuro nyinshi (ebyiri), aho kuri ubu yifuza kuritwara ku nshuro ya gatatu, ariko ikaba igomba kubanza kwikiranura na Cameroun iri mu rugo, guhera saa tatu z’ijoro.

Undi mukino wa ¼ uteganyijwe kuri uyu wa Gatandatu, urahuza Congo Brazzaville na Mali saa kumi n’ebyiri.

Repubulika Iharanira Demokarasi ya Congo yabwiwe ko abayigize 13 banduye COVID-19 mbere yo gukina na Cameroun
Ku wa Gatanu, umutoza Florent Ibenge yavuze ko bitaboroheye nk'abatoza kuba ibisubizo bya COVID-19 bitinda kugaragazwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .