CHAN 2020: Mali na Cameroun byabimburiye ibindi bihugu kugera muri ¼

Yanditswe na Bukuru JC
Kuya 25 Mutarama 2021 saa 08:51
Yasuwe :
0 0

Ikipe y’igihugu ya Mali n’iya Cameroun yakiriye Shampiyona Nyafurika ihuza abakinnyi bakina imbere mu bihugu byabo (CHAN 2020) zabimburiye izindi kugera muri ¼ nyuma yo gusoza imikino yo mu itsinda A ku Cyumweru.

Mali yazamutse iyobotse itsinda n’amanota arindwi nyuma yo gutsinda Zimbabwe igitego 1-0 mu gihe Cameroun yabaye iya kabiri n’amanota atanu ubwo yanganyaga na Burkina Faso ubusa ku busa.

Demba Diallo ni we watsindiye Mali igitego kimwe rukumbi yaboneye kuri Stade de la Réunification y’i Douala ku munota wa 12.

Zimbabwe yari yatangiye umukino iri hejuru, ishaka kubona inota rya mbere muri iri rushanwa mbere yo gusubira mu rugo. Ibi byatumye Qadr Amin ahusha uburyo bwiza bwabonetse ku munota wa gatatu, ariko asimburwa na Ian Nekati nyuma y’umunota umwe.

Issaka Samake na Siaka Bagayoko bashoboraga kubonera Mali ibindi bitego, uburyo babonye ntibwagana mu izamu mu gihe umunyezamu wabo, Djigui Diarra, na we yakuyemo umupira ukomeye watewe na Farawe Matare ku munota wa 34.

Mali yongeye kwiharira umupira mu gice cya kabiri, ariko ikagorwa no gukina imipira ya nyuma yahagaritswe n’abakinnyi ba Zimbabwe ku barimo Bagayoko na Mussa Koné.

Carlos Muvhurume ku ruhande rwa Zimbabwe na Bassekou Diabaté ku ruhande rwa Mali, na bo babonye amahirwe akomeye yo gutsinda, bagorwa n’abanyezamu ku mpande zombi.

Gutsinda uyu mukino byafashije Mali kuzamuka iyoboye itsinda, aho muri ¼, izahura n’ikipe izaba iya kabiri mu itsinda B mu gihe Cameroun izahura n’iya mbere muri iryo tsinda.

Kuri uyu wa Mbere hateganyijwe imikino isoza iyo mu itsinda B, aho Congo Brazzaville ikina na Libya naho Niger ihure na Repubulika Iharanira Demokarasi ya Congo.

Kugeza ubu, Repubulika Iharanira Demokarasi ya Congo ni iya mbere n’amanota ane, ikurikiwe na Niger inganya amanota abiri na Libya mu gihe Congo Brazzaville ifite inota rimwe ku mwanya wa nyuma.

Mali yazamutse iyoboye itsinda rya mbere nyuma yo gutsinda Zimbabwe igitego 1-0
Cameroun yakiriye irushanwa, yabaye iya kabiri mu itsinda nyuma yo kunganya na Burkina Faso
Bamwe mu Banya-Cameroun bashyigikiye ikipe yabo ku mukino wabereye i Yaoundée

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .