CHAN 2020: Impinduka zatumye u Rwanda ruzakina ijonjora rya kabiri

Yanditswe na Eric Tony Ukurikiyimfura
Kuya 3 Nyakanga 2019 saa 12:16
Yasuwe :
0 0

Ikipe y’igihugu y’u Rwanda ‘Amavubi’ ntabwo izabanziriza mu ijonjora rya mbere ryo gushaka itike y’Igikombe cya Afurika gihuza abakinnyi bakina imbere mu bihugu byabo ‘CHAN 2020’ nk’uko byari byatangajwe mbere.

Ku wa Mbere w’iki cyumweru, Impuzamashyirahamwe y’Umupira w’Amaguru ku mugabane wa Afurika, CAF, yatangaje uburyo bushya iyi mikino izakinwamo nyuma y’aho Ethiopia yari kuzakira CHAN 2020 iyambuwe, igahabwa Cameroun.

CAF yakoze impinduka mu buryo amakipe yo muri karere k’Iburasirazuba no Hagati (CECAFA) azahura, hiyongeramo Ethiopia na Djibouti.

Muri ubu buryo bushya, u Rwanda ruzahura n’ikipe izaba yakomeje hagati ya Ethiopia na Djibouti mu ijonjora rya kabiri rizakinwa muri Nzeri. Ibi bikaba byatewe n’uko u Rwanda ruri mu bihugu bihagaze neza muri aka karere kuko rwitabiriye amarushwa abiri aheruka ya CHAN.

U Rwanda rwakiriye CHAN 2016 yabereye i Kigali, runitabira iyabereye muri Maroc mu mwaka ushize, ruzaba rushaka gukina iri rushanwa rihuza abakinnyi bakina imbere muri za shampiyona zabo ku nshuro ya gatatu yikurikiranya ndetse izaba ari iya kane muri rusange nyuma yo kwitabira CHAN 2011 yabereye muri Sudani.

Ikipe izakomeza hagati ya Djibouti na Ethiopia izahura n’u Rwanda mu mukino ubanza uzaba hagati ya tariki ya 20 na 22 Nzeri mu gihe uwo kwishyura uzabera i Kigali hagati ya tariki ya 18 na 20 Ukwakira 2019.

Uko amakipe azahura mu ijonjora ribanza

- Burundi vs Sudani y’Epfo - (26-27-28 Nyakanga)
- Sudani y’Epfo vs Burundi - (02-03-04 Kanama 2019)
- Somalia vs Uganda - (26-27-28 Nyakanga 2019)
- Uganda vs Somalia - (02-03-04 Kanama 2019)
- Djibouti vs Ethiopia - (26-27-28 Nyakanga 2019)
- Ethiopia vs Djibouti - (02-03-04 Kanama 2019)
- Tanzania vs Kenya - (26-27-28 Nyakanga 2019)
- Kenya vs Tanzania - (02-03-04 Kanama 2019)

U Rwanda rwakinnye CHAN ebyiri ziheruka zirimo n'iyabereye muri Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza