CHAN 2018: Uko Amavubi yatsindiye Ethiopia i Addis Abeba (Video)

Yanditswe na IGIHE
Kuya 7 Ugushyingo 2017 saa 11:43
Yasuwe :
1 0

Ikipe y’Igihugu y’u Rwanda, Amavubi, yongeye kugarurira icyizere abakunzi bayo ko yakongera kwitabira imikino ihuza abakinnyi bakina imbere mu bihugu byo ku mugabane wa Afurika (CHAN 2018) yakiriye mu 2016, nyuma yo gutsindira Ethiopia iwayo ibitego 3-2 mu mukino wa kamarampaka ubanza.

Ibi bihugu byombi byahawe amahirwe yo kwishakamo izasimbura Misiri yari yabonye itike, ikaza kwikura muri iri rushanwa rizabera muri Maroc mu ntangiriro za 2018.

Mu mukino ubanza, wabereye i Addis Abeba muri Ethiopia, tariki ya 5 Ugushyingo 2017, abakinnyi b’umutoza Antoine Hey, bitwaye neza bahakura intsinzi y’ibitego 3-2 ku ikipe yakiniraga imbere y’abafana bayo.

Ethiopia izwi nka ’Walias’ ni yo yafunguye amazamu ku gitego cyo ku munota wa 18 cyatsinzwe na Asechalew Girma kiza kwishyurwa ku wa 55 na Eric Rutanga ku ikosa ryari rikorewe rutahizamu Biramahire Abeddy, uyu myugariro wa Rayon Sports akaboneza coup franc mu izamu.

Walias yakomeje kotsa igitutu Amavubi yahise ibona igitego cya kabiri ku munota wa 65 cya Abubakher Sanni ariko nyuma y’iminota 13 Muhadjili Hakizimana yahise ashyiramo icya kabiri cyo kunganya.

Amavubi yabyaje umusaruro amahirwe yabonye imbere y’izamu yashimangiye intsinzi, ibyishimo bitaha mu mitima y’Abanyarwanda bari mu bice bitandukanye ku munota wa 80 ubwo Biramahire Abeddy yongeraga kunyeganyeza inshundura za Ethiopia.

Amavubi yageze i Kanombe kuri uyu wa Mbere agahita akomereza mu mwiherero i Nyamata, yahise atangira kwitegura umukino wo kwishyura uzabera i Kigali ku Cyumweru, tariki ya 12 Ugushyingo 2017.

Amavubi yatsinze Ethiopia ibitego 3-2 mu mukino ubanza wo gushaka itike ya CHAN 2018

Video igaragaza uko ibitego byinjiye ku mpande zombi:


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza