Kwamamaza

Manchester City na Bayern Munich zatunguwe, Arsenal yibereye iyo mu bicu

Yanditswe kuya 29-09-2016 saa 10:38' na Manzi Rema Jules


Celtic FC yakoze ibyasaga n’inzozi ibasha guhagarika umuvuduko wa Manchester City yari imaze imikino 10 idatsindwa, Atletico Madrid yihererana Bayern Munich ya Carlo Ancelotti naho Arsenal ibifashijwemo na Theo Walcott ikomeza kwerekana ko uyu mwaka ushobora kuba utandukanye n’ishize yihaniza FC Basel.

Manchester City yari imaze imikino 10 idatsindwa cyangwa ngo inganye mu marushanwa yose, yaraye ihagaritswe na Celtic itozwa na Brendan Rodgers mu mukino w’umunsi wa kabiri w’irushanwa rihuza amakipe yabaye aya mbere ku mugabane w’i Burayi wabereye ku kibuga Celtic Park, ku mugoroba wo kuri uyu wa Gatatu banganya ibitego 3-3.

Celtic FC yari yanyagiwe ibitego 7-0 na FC Barcelona mu mukino wa mbere n’ubundi nta mahirwe yahabwaga imbere ya Manchester City, ariko iminota itatu gusa yari ihagije ngo Moussa Dembele afungure amazamu.

Nyuma y’iminota umunani, Manchester City yabonye igitego cyo kwishyura cyatsinzwe na Fernandinho ariko Celtic ikomeza igitutu kugeza ubwo Sterling yitsinze ku munota wa 20.

Nyuma y’iminota umunani, rutahizamu w’Umwongereza, Raheem Sterling yahise yikosora atsinda igitego cya kabiri.

Mu gice cya kabiri Celtic yarushaga bigaragara Manchester City, yongeye kuyitsinda igitego cya gatatu cya Moussa Dembele ku munota wa 47 ariko na cyo Nolito acyishyura nyuma y’iminota umunani ari na ko umukino warangiye.

Ku rundi ruhande ku kibuga, Emirates mu Bwongereza, Arsenal yashimishaga abafana bayo itsinda ibitego 2-0 FC Basel, byose bya rutahizamu Theo Walcott uri mu bihe byiza, ku munota wa karindwi n’uwa 26 byatumye iyi kipe ihita iyobora itsinda A inganya amanota ane na Paris Saint Germain.

Mu makipe akomeye, iyatunguwe kurusha izindi ni Bayern Munich yari yasuye Atletico Madrid ishaka kwihimura kuri iyi kipe ya Diego Simeone yayisezereye umwaka ushize muri ½ cy’iri rushanwa ariko n’ubundi yatsinzwe igitego kimwe cya Yannick Carrasco, Carlo Ancelotti n’abasore be basubira mu Budage bimyiza imoso.

Uko imikino yose y’umunsi wa kabiri mu matsinda yarangiye:

Kuwa Kabiri, tariki ya 27 Nzeri 2016:

Itsinda E

- CSKA Moscow 0-1 Tottenham Hotspur
- Monaco 1-1 Bayer Leverkusen

Itsinda F

- Borussia Dortmund 2-2 Real Madrid
- Sporting CP 2-0 Legia Warszawa

Itsinda G

- FC Koebenhavn 4-0 Club Brugge
- Leicester City 1-0 FC Porto

Itsinda H

- Dinamo Zagreb 0-4 Juventus
- Sevilla 1-0 Lyon

Kuwa Gatatu, tariki ya 28 Nzeri 2016:

Itsinda A

- Arsenal 2-0 Basel
- Ludogorets Razgrad 1-3 Paris Saint Germain

Itsinda B

- Besiktas 1-1 Dynamo Kyiv
- SSC Napoli 4-2 Benfica

Itsinda C

- Borussia Moenchengladbach 1-2 Barcelona
- Celtic 3-3 Manchester City

Itsinda D

- Atletico Madrid 1-0 Bayern Munich
- FC Rostov 2-2 PSV Eindhoven

Moussa Dembele(imbere) yishimira igitego
Fernandinho atsinda igitego cya mbere cyo kwishyura
Dembele atsinda igitego cye cya kabiri
Sterling atsinda igitego cya kabiri
Nolito yatsinze igitego cya gatatu cyahesheje Manchester City inota rimwe
Abafana ba Celtic FC bari bakubise Stade buzuye
Guardiola(ibumoso) utoza Manchester City na Brendan Rodgers wa Celtic FC batanga amabwiriza ku bakinnyi
Theo Walcott yafashije Arsenal kubona amanota atatu
Walcott uri mu bihe byiza yatsinze ibitego bibiri ku mukino wahuje Arsenal na Basel

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved