00:00:00 IGIHE NETWORK KN KINYARWANDA EN ENGLISH FR FRANCAIS

Champions League: Liverpool na Ajax zageze muri 1/8, Real Madrid ikora amateka (Amafoto)

Yanditswe na Eric Tony Ukurikiyimfura
Kuya 4 Ugushyingo 2021 saa 08:58
Yasuwe :
0 0

Liverpool yageze muri 1/8 cya UEFA Champions League nyuma yo gutsinda Atlético Madrid y’abakinnyi 10 ibitego 2-0 mu mukino w’Umunsi wa Kane wo mu Itsinda E wabereye i Anfield mu Bwongereza ku wa Gatatu.

Ibitego byombi byabonetse hakiri kare, aho icya mbere cyinjijwe na Diogo Jota n’umutwe nyuma y’umupira wahinduwe na Trent Alexander-Arnold ku munota wa 12.

Liverpool yabonye igitego cya kabiri ku munota wa 20 nyuma yo guhererekanya neza, Trent Alexander-Arnold atanga umupira wa nyuma wakozweho na Sadio Mané, uruhukira mu izamu.

Habura iminota icyenda ngo igice cya mbere kirangire, Atlético Madrid yasigaye ari abakinnyi 10 mu kibuga kubera ikarita itukura itavugwaho rumwe yahawe Felipe Luis akiniye nabi Sadio Mané.

Nyuma y’iminota itatu amakipe yombi avuye kuruhuka, Jota yatsinze igitego cyanzwe nyuma y’uko amashusho ya VAR (ikoranabuhanga ryifashishwa mu misifurire) yagaragaje ko habayeho kurarira.

Luis Suárez yibwiraga ko agabanyije ikinyuranyo ubwo yatsindiraga Atlético Madrid igitego ku munota wa 60, ari ko na bwo VAR igaragaza ko hari habayeho kurarira.

Gutsinda uyu mukino byatumye Liverpool ibona itike ya 1/8 cya UEFA Champions League mu gihe kandi yujuje imikino 16 idatsindwa kuva uyu mwaka w’imikino wa 2021/22 utangiye.

Muri rusange, Liverpool imaze imikino 25 itazi uko gutsindwa bimeze kuva itsinzwe na Real Madrid tariki ya 6 Mata muri ¼ cya UEFA Champions League y’umwaka ushize w’imikino.

Indi kipe yageze muri 1/8 ni Ajax yo mu Itsinda C, aho yatsindiye Borussia Dortmund y’abakinnyi 10 iwayo ibitego 3-1, igira amanota 12 mu mikino ine.

Mu Itsinda D, Real Madrid yakoze amateka yo kuba ikipe ya mbere yinjije ibitego 1000 muri UEFA Champions League/ European Cup ubwo yatsindaga Shakhtar Donetsk ibitego 2-1.

Karim Benzema yafunguye amazamu ku munota wa 14 mu gihe yatsinze ikindi gitego ku munota wa 61. Iki gitego cyatumye Real Madrid iba ikipe ya mbere yinjije ibitego 1000 mu irushanwa rikuru ry’u Burayi rihuza amakipe.

Bayern Munich yo mu Budage, ni yo kipe ya kabiri ifite ibitego 768 mu gihe FC Barcelone yo muri Espagne, ifite ibitego 655 ku mwanya wa gatatu.

Mu bitego byose bya Real Madrid muri iri rushanwa, harimo 105 bya Cristiano Ronaldo kuri ubu ukinira Manchester United na 76 bya Raul.

European Cup ni irushanwa ryashyizweho kuva mu 1955 mbere y’uko ryitwa UEFA Champions League guhera mu 1992.

Real Madrid imaze kuritwara inshuro 13 zirimo eshatu zikurikiranya hagati ya 2015 na 2018.

Iyi kipe yatwaye irushanwa riba bwa mbere mu 1955/56, aba ari uko bigenda mu nshuro enye zakurikiyeho mu gihe mu 1960 yasezerewe na FC Barcelone mu ijonjora rya mbere.

Ibitego Benzema yatsinze ku wa Gatatu byatumye Real Madrid igira amanota icyenda ku mwanya wa mbere wo mu Itsinda D ndetse yiyongerera amahirwe yo kugera muri 1/8.

Uko amakipe yatsindanye ku wa Gatatu:

Itsinda A

  • Manchester City 4-1 Club Brugge
  • RB Leipzig 2-2 PSG

Itsinda B

  • Milan AC 1-1 FC Porto
  • Liverpool 2-0 Atlético Madrid

Itsinda C

  • Borussia Dortmund 1-3 Ajax
  • Sporting CP 4-0 Besiktas

Itsinda D

  • Real Madrid 2-1 Shakhtar Donetsk
  • FC Sheriff 1-3 Inter Milan
Diogo Jota yafunguye amazamu ku gitego yatsindishije umutwe
Jota yishimira igitego hamwe na Mohamed Salah
Sadio Mané yishimira igitego cya kabiri cya Liverpool
Luis Suarez na bagenzi be batunguwe no gutsindwa hakiri kare
Atlético Madrid yasigaye ari abakinnyi 10 mu kibuga guhera ku munota wa 36
Felipe Luis ava mu kibuga nyuma yo guhabwa ikarita itukura itavuzweho rumwe
João Félix yahawe ikarita y'umuhondo akiniye nabi Fabinho
Luis Suarez yangiwe igitego yatsinze mu gice cya kabiri
Umutoza wa Liverpool ashimira Sadio Mané wasimbuwe igice cya kabiri kigitangira
Umutoza wa Atlético Madrid, Diego Simeone, yageze aho asa n'ubuze ibisubizo byo guhindura umukino mu gice cya kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .