Kwamamaza

Champions League:Guardiola yasebeye aho yubakiye izina, Arsenal inyagira Ludogorets

Yanditswe kuya 20-10-2016 saa 09:27' na Manzi Rema Jules


Ubwo hakinwaga imikino ya gatatu y’amatsinda mu irushanwa rihuza amakipe yabaye aya mbere iwayo ku mugabane w’u Burayi (UEFA Champions League), Manchester City yahuye n’uruva gusenya itsindwa na FC Barcelona ibitego bine ku busa, naho Arsenal inyagira Ludogorets Razgrad ibitego bitandatu ku busa.

Umukino wari ukomeye cyane wari wanavugishije abantu amagambo menshi, warangiye iyi kipe yo mu Mujyi wa Manchester ihawe isomo rya ruhago ku bitego bine ku busa, birimo bitatu byatsinzwe na Lionel Messi.

Iminota 17 yari ihagije kugira ngo Messi yereke umutoza Pep Guardiola wamuzamuye mu ikipe y’abana ya FC Barcelona nyuma bagatwarana ibikombe mu ikipe nkuru, ko ibyo yamwigishije akibyibuka, maze atsinda igitego cya mbere.

Mu gihe Guardiola wari wabanje hanze y’ikibuga abakinnyi bakomeye nka rutahizamu Sergio Kun Aguero yitegura kumwinjiza mu gice cya kabiri ngo ashake uko yishyura, ku munota wa 53 gusa, umuzamu Claudio Bravo yahawe ikarita itukura, maze ibintu bisubira irudubi.

Uyu muzamu wavuye muri FC Barcelona ajya muri Man City gusimbura Joe Hart wari uyimazemo imyaka 10, yakoze umupira n’amaboko ari imyuma y’urubuga rwe nyuma y’amakosa yari amaze gukora ahereza Suarez umupira.

Gushyira mu izamu Willy Caballero usanzwe atagirirwa icyizere n’ubundi, bisa naho ntacyo byafashije Guardiola kuko ku munota wa 61 na 69 Messi yashyizemo ibindi bitego bibiri mbere y’uko Neymar wahushuje penaliti ku munota wa 87 atsinda igitego cya kane ku wa 89.

Nyuma yo gutsinda uyu mukino, FC Barcelona ni yo iyoboye itsinda C iherereyemo n’amanota icyenda, Manchester City ifite ane, Borussia Moenchengladbach ifite atatu naho Celtic igaheruka n’inota rimwe.

Undi mukino wabaye muri iri rushanwa, ni uwahuje Arsenal na Ludogorets Razgrad yo muri Bulgaria, aho iyi kipe yanyagiwe ibitego bitandatu ku busa.

Ibitego bya Alexis Sanchez, Theo Walcott, Alex Oxlade-Chamberlain na bitatu byatsinzwe na Mesut Ozil, nibyo byafashije iyi kipe yo mu Murwa Mukuru Londres gutahana intsinzi ndetse no guha ibyishimo abafana 59,944 bari bateraniye ku kibuga Emirates Stadium ndetse n’abandi benshi bawukurikiraniraga hirya no hino ku isi kuri za televiziyo.

Uko imikino yo kuri uyu wa Gatatu yagenze

Arsenal 6-0 Ludogorets Razgrad
Paris Saint Germain 3-0 Basel
Dynamo Kyiv 0-2 Benfica
SSC Napoli 2-3 Besiktas
Barcelona 4-0 Manchester City
Celtic 0-2 Borussia Moenchengladbach
Bayern Munich 4-1 PSV Eindhoven
FC Rostov 0-1 Atletico Madrid

Lionel Messi yatsinze ibitego bitatu wenyine muri uyu mukino
Abakinnyi ba FC Barcelone bashimira Messi
İlkay Gündoğan yatangiye umukino afasha Manchester City hagati mu kibuga
Claudio Bravo ufatira Manchester City yahawe ikarita itukura nyuma yo gukora ku mupira ari hanze y'urubuga rwe
Abakinnnyi ba Manchester City bababajwe no gutsindwa ibitego bine
Neymar yahushije Penaliti nyuma y'iminota itatu atsinda igitego
Neymar yatsinze igitego cya kane cya Barcelona nyuma yo guhusha penaliti
Jérémy Mathieu nawe yabonye ikarita ebyiri z'umuhondo zibyara umutuku
Pep Guardiola wanyuze muri Barcelona nk'umukinnyi n'umutoza ntiyiyumvishaga ibiri kumubaho
Luis Enrique utoza FC Barcelona we akanyamuneza kari kose
Alexis Sanchez niwe wafunguye amazamu
Mesut Ozil yigaragaje cyane muri uyu mukino
Bwa mbere mu mateka nk'umukinnyi wabigize umwuga, Ozil yatsinze ibitego bitatu mu mukino
Byari ibyishimo ku bakinnyi ba Arsenal nyuma y'umukino

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved