CECAFA Kagame Cup: Gor Mahia yageze muri ¼, Maniema itsinda umukino wa mbere (Amafoto)

Yanditswe na Eric Tony Ukurikiyimfura
Kuya 10 Nyakanga 2019 saa 10:51
Yasuwe :
0 0

Gor Mahia yo muri Kenya yabaye ikipe ya gatatu ibonye itike ya ¼ muri CECAFA Kagame Cup iri kubera mu Rwanda nyuma yo gutsinda AS Ports yo muri Djibouti ibitego 2-0 mu mukino w’umunsi wa kabiri wo mu itsinda D rikinira i Rubavu.

Uyu mukino wabereye kuri Stade Umuganda kuri uyu wa 10 Nyakanga 2019.

Ikipe y’Umutoza Hassan Oktay, yatsinze ibitego byombi yabonye muri uyu mukino mu gice cya kabiri, aho igitego cya mbere cyatsinzwe na Boniface Omondi ku munota wa 70 naho Dennis Owalo atsinda icya kabiri mu minota y’inyongera.

Gor Mahia iri mu zihabwa amahirwe yo kugera kure muri riri rushanwa riterwa inkunga na Perezida Kagame, yari yatangiye neza, itsinda AS Maniema mu mukino wabaye ku wa Mbere.

Umusifuzi w’Umunyarwanda, Uwikunda Samuel, ni we wayoboye uyu mukino, aho yafatanyaga n’abarimo Hakizimana Ambroise nk’umwe mu basifuzi bo ku mpande.

Gutsinda uyu mukino byafashije Gor Mahia kugira amanota atandatu ndetse iba ikipe ya gatatu igeze muri ¼ inyuma ya APR FC na Rayon Sports zo mu Rwanda.

Undi mukino wo mu itsinda D wabaye kuri uyu wa Gatatu warangiye AS Maniema Union yo muri Repubulika Iharanira Demokarasi ya Congo itsinze KMKM yo muri Zanzibar ibitego 2-0.

Muri uyu mukino wayobowe n’umusifuzi w’Umunyarwanda Ruzindana Nsoro, Likwela Denis yafunguye amazamu ku munota wa 50 mbere y’uko Hafid Mohamed Ali yitsinda igitego cya kabiri ku wa 64.

N’ubwo yari yatsinze, Ikipe y’Umutoza Guy Lusadisu yasigaye ari abakinnyi 10 mu kibuga ubwo Mapumba Katomba yahabwaga ikarita itukura ku munota wa 72, aba umukinnyi wa mbere usohowe mu kibuga muri iri rushanwa ry’uyu mwaka.

AS Maniema na AS Ports zanganyije amanota atatu mu gihe KMKM yahise isezererwa kuko isigaje umukino umwe izahuramo na Gor Mahia ndetse iramutse iwutsinze imwe mu zisigaye yagira amanota arenze ayo yaba ifite.

Itsinda D rizakina imikino isoza ku Cyumweru, aho Gor Mahia izahura na KMKM saa 13:30 naho AS Ports ihure na AS Maniema Union guhera saa 15:30.

CECAFA Kagame Cup irakomeza kuri uyu wa Kane, hasozwa imikino yo mu itsinda A, aho Proline ikina na Green Eagles guhera saa 13:30 mu gihe APR FC ihura na Heegan FC guhera saa 15:30.

Umusifuzi Uwikunda Samuel (hagati) yayoboye umukino ari kumwe n'abarimo Hakizimana Ambroise (ubanza iburyo)
Ndayisenga Frank agerageza uburyo bw'ishoti, umupira uca munsi y'amaguru ya Lokuwam wa Gor Mahia wasimbutse
Gor Mahia yabonye ibitego byombi mu gice cya kabiri
Iyi kipe yo muri Kenya yasanze APR FC na Rayon Sports muri 1/4
AS Maniema yo muri RDC ifite abafana batari bake i Rubavu
Ruzindana Nsoro yayoboye umukino wa AS Maniema Union na KMKM
Maniema yambaye icyatsi, yatsinze KMKM ibitego 2-0, ibona intsinzi ya mbere muri iri rushanwa
Abanye-Congo bashyigikiye ikipe y'iwabo

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza