CAN 2021: U Rwanda rwisanze mu itsinda F hamwe na Cameroun

Yanditswe na Eric Tony Ukurikiyimfura
Kuya 18 Nyakanga 2019 saa 08:31
Yasuwe :
0 0

Tombora yabereye mu Misiri ku mugoroba wo kuri uyu wa Kane, yasize ikipe y’u Rwanda ‘Amavubi’ izahatanira itike yo gukina igikombe cya Afurika cya 2021 kizabera muri Cameroun, iri kumwe n’iki gihugu kizakira iri rushanwa, mu itsinda F.

Cameroun imaze kwegukana Igikombe cya Afurika inshuro eshanu zirimo irushanwa rya 2017, yahawe kwakira CAN 2021 nyuma y’uko yambuwe iya 2019 iri kubera mu Misiiri, aho yavuyemo itarenze 1/8.

Uretse Cameroun, u Rwanda ruzaba ruhanganye kandi na Cap-Vert na Mozambique mu itsinda F.

Ikipe y’u Rwanda imaze kwitabira igikombe cya Afurika inshuro imwe, aho yagiyeyo mu 2004 ubwo iri rushanwa ryari ryabereye muri Tunisie.

Muri iyi mikino y’amatsinda, U Rwanda ruzaba rusabwa kuba urwa mbere cyangwa rukaba urwa kabiri mu gihe Cameroun yaza imbere kuko hazazamuka ikipe imwe muri itsinda F (Cameroun ifite itike).

Buri tsinda rizatanga amakipe abiri akina Igikombe cya Afurika cya 2021 uretse irya F ririmo u Rwanda.

Imikino y’umunsi wa mbere n’uwa kabiri mu itsinda izakinwa hagati ya tariki ya 11 n’iya 19 Ugushyingo.

Iy’umunsi wa gatatu n’uwa kane izakinwa hagati ya tariki ya 31 Kanama n’iya 8 Nzeli 2020.

Umunsi wa gatanu uzakinwa hagati ya tariki ya 2 n’iya 13 Ukwakira 2020 mu gihe uwa nyuma uzakinwa hagati ya tariki ya 9 n’iya 17 Ugushyingo 2020.

Igikombe cya Afurika cyaherukaga kubera muri Cameroun mu 1972 ubwo cyitabirwaga n’amakipe umunani gusa.

U Rwanda rwaherukaga guhura na Cameroun mu gushaka itike ya CAN mu 2006, aho rwatsindiwe i Kigali ibitego 3-0 mu mukino ubanza n’ibitego 2-1 mu mukino wo kwishyura wabereye i Yaoundé.

Imikino y’amatsinda yo gushaka itike ya CAN 2021 izabanzirizwa n’iy’amajonjora ku makipe yari mu gakangara ka gatanu, yo izakinwa tariki ya 7 n’iya 15 Ukwakira 2019.

Uko amakipe yatomboranye mu matsinda

Itsinda A : Mali, Guinée, Namibie, izakomeza hagati ya (Liberia vs Tchad).

Itsinda B : Burkina Faso, Uganda, Malawi, izakomeza hahati ya (Sudan y’Epfo vs Seychelles).

Itsinda C : Ghana, Afurika y’Epfo, Sudani, izakomeza hagati (Ibirwa bya Maurice vs Sao Tomé-et-Principe).

Itsinda D : RD Congo, Gabon, Angola, izakomeza hagati ya (Djibouti Vs Gambie).

Itsinda E : Maroc, Mauritanie, Afrique Centrale, U Burundi.

Itsinda F : Cameroun, Cap Vert, Mozambique, U Rwanda.

Itsinda G : Misiri, Kenya, Togo, Comores.

Itsinda H : Algérie, Zambie, Zimbabwe, Botswana.

Itsinda I : Sénégal, Congo, Guinée-Bissau, Eswatini.

Itsinda J : Tunisie, Libye, Tanzanie, Guinée Equatoriale.

Itsinda K : Côte d’Ivoire, Niger, Madagascar , Ethiopie.

Itsinda L : Nigeria, Bénin, Sierra Leone, Lesotho.

U Rwanda rwisanze mu itsinda F hamwe na Cameroun izakira irushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza