Kwamamaza

Buteera mu bicu, Irambona mu mutuku-Amanota y’abakinnyi kuri Classico y’u Rwanda

Yanditswe kuya 16-09-2016 saa 07:38' na Jah d'eau DUKUZE


Ikipe ya APR FC yashoboye kwihimura kuri Rayon Sports iyitsindira ibitego 3-0 kuri Stade Amahoro mu mukino yihariye wa ½ cy’irushanwa ryateguwe na AS Kigali.

Sibomana Patrick Papy, Bigirimana Issa na Sekamana Maxime ni bo bashoboye kubona amazamu muri uyu mukino utari witabiriwe cyane nk’indi isanzwe ihuza aya makipe yombi, ahanini kubera ikibazo cy’imvura yagwaga mu Mujyi wa Kigali.

IGIHE yasesenguye uyu mukino none dore amanota yahawe abakinnyi 22 abatoza bari bagiriye icyizere kuri uyu mugoroba.

Rayon Sports:

Bakame: 5- Nubwo ntacyo yari bukore ku gitego cya Issa Bigirimana, gusa gutinda gusohoka ku gitego cya mbere ndetse cyane cyane ku cya gatatu byatumye tutabona Bakame twari dusanzwe tuzi.

Zappy : 5-Umusore ukiri muto ikipe ya Rayon Sports yakuye muri Sunrise, yerekanye ko agifite byinshi byo kwiga nyuma yo kugorwa cyane na Papy bikanarangira amutsindanye igitego.

Fiston: 6- Nubwo ntacyo yakoze ku gitego cya Issa, ariko ni we mukinnyi wa Rayon Sports wo mu bwugarizi wagerageje kwitwara neza

Ange Mutsinzi: 6- Ku mukino nk’uyu wa mbere kuri we ntabwo byari bibi gusa kuba umutoza yamuhisemo mbere ya Manzi Thierry nanubu biracyibazwaho kuko nta gishya yagaragaje mu guhangana n’umuvuduko wa Issa Bigirimana.

Irambona Eric: 4- Yatangiranye igihunga cyinshi kuri uyu mukino, yakuye Rayon Sports mu mukino atanga igitego cya kabiri.

Fabrice Mugheni: 5: Ibyo yari yagaragaje ku mukino wa nyuma w’igikombe cy’amahoro byari mu nsi uyu munsi, kuko hagati ya APR FC hakoraga cyane kandi ashinzwe kwica umukino w’iyi kipe y’Ingabo z’Igihugu.

Niyonzima Sefu:4.5- Ntabwo yari wa Sefu dusanzwe tumenyereye. Ntabwo yibonye muri mikinishirize mishya y’umutoza, yo gukinisha abakinnyi batatu hagati. Yahaye ubwisanzure Buteera Andrew.

Kwizera Pierrot: 7- Ni we mukinnyi wa Rayon Sports wagerageje gukina ibyenda gusa n’ibyo ashoboye, yagize amahirwe make kuba Emery yakuyemo ishoti yateye ku munota wa 87.

Nahimana Shasir:3- Uyu musore waguzwe muri Vitalo yizeweho ibitangaza, nanubu ntakintu yari yereka abakunzi ba Rayon Sports.

Savio Nshuti: 6- Ni gake uzabona Savio arangije umukino nta mupira ateye ugana izamu. Yagowe n’imikinire ya APR FC yazitiraga imipira ica ku ruhande. Uyu ariko yagiye akorerwaho amakosa amwe n’amwe yashoboraga kubyara uburyo bw’igitego.

Camara: 5- Iminota 90, imipira yateye mu izamu ni 0. Ibi, birivugira kuri rutahizamu witezweho gusimbura Diarra wari watsinze igitego rukumbi ku mukino aya makipe yaherukaga guhuriramo

Umutoza Masudi:5- icyizere cyinshi cyatumye agerageza ibigoye abanza hanze Djaber na Manzi bashoboraga kwitwara neza kurushaho

Irambona Eric ni umwe mu bakinnyi batitwaye neza ku ruhande rwa Rayon Sports
Masudi ntiyahiriwe kuri uyu mukino

APR FC

Emery Mvuyekure: 6.5: Nta kazi kenshi yahuye na ko, nako yabonye mu minota ishyira iya nyuma yabyitwayemo neza nubwo ntacyo byari buhindure ku mukino

Michel Rusheshangoga: 7- Yitwaye neza haba mu kugarira ndetse no gusatira. Yaburijemo impande za Rayon Sports cyane cyane Savio Nshuti.

Herve Rugwiro:8- Umwe mu mikino myiza kuri uyu myugariro nubwo yashoboraga guhabwa ikarita itukura mu minota ya nyuma kubera amakosa yagendaga akora.

Faustin Usengimana: 6.5- Yagerageje nawe kwitwara neza nubwo hari imipira yatakazaga bitari ngombwa.

Imanishimwe Emmanuel: 8-Yeretse Rayon Sports icyo yahombye imutanga. Yagoye cyane ba myugariro b’iyi kipe ya Gikundiro (nubwo na we ari myugariro) ahanini binyuze ku ruhande yacagaho asatira izamu rya mukeba.

Yannick Mukunzi: 7- Yahagaze neza imbere ya ba myugariro b’ikipe ye. Yitwaye neza mu kibuga hagati bifasha APR FC kwima Rayon Sports umupira.

Buteera Andrew :9- Niwe mukinnyi w’umukino. Sinzi icyo yari gukora atakoze muri uyu mukino. Uyu musore yerekanye ko APR FC yari yarapfubije impano ye ukurikije umupira yakinnye muri iri rushanwa ryose.

Sibomana Papy: 8- Uretse gutsinda igitego, yanitwaye neza mu mu mukino muri rusange. Zappy ni umwe mu bantu atazapfa kwibagirwa.

Sekamana Maxime: 6.5- Nubwo yatsinze igitego, ntabwo Maxime yigaragaje cyane nkuko yari asanzwe abizwiho mu mikino ibiri yabanje.

Muhadjili: 6.5: Yagerageje kurema uburyo butandukanye bwo gutsinda ari nako ashimisha abafana n’amafiyeri atandukanye. Uyu ariko yanatakaje imipira bitari ngombwa.

Bigirimana Issa: 7.5: Yatsinze igitego, ahusha ikidahushwa, gusa yanahaye akazi ba myugariro ba Rayon Sports

Umutoza Rwasamanzi:8- Byagaragaye ko uko yari yateguye umukino ariko byaje kugenda mu kibuga.

Umukinnyi w’umukino: Buteera Andrew

Umusifuzi: 6: Yagerageje kwitwara neza, kutabona ikosa rya Herve kuri Djaber, byabazwa ahanini Simba wari umwungirije

Rugwiro Herve ni umwe mu bitwaye neza uyu munsi
Abasifuzi bayoboye umukino wahuje APR FC na Rayon Sports

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved