Kwamamaza

Bugesera FC na Espoir FC zaguye miswi, umukino usozwa n’imirwano y’abafana

Yanditswe kuya 29-10-2016 saa 21:29' na Manzi Rema Jules


Umukino wa shampiyona igeze ku munsi wayo wa gatatu, Bugesera FC yakiriyemo Espoir FC i Nyamata kuri uyu wa Gatandatu warangiye amakipe yombi anganya ubusa ku busa, abafana ba Bugesera FC basubiranamo bararwana karahava.

Aya makipe yombi ataritwaye neza ku mikino iheruka aho Bugesera FC yatsinzwe na Police FC 2-1 naho Espoir FC inganya na Rayon Sports 0-0 i Rusizi.

Inyota yo gushaka amanota atatu yagaragaye ku mpande zombi, Bugesera FC n’abafana bayo bari benshi cyane bagerageza ibishoboka byose ngo babone igitego ariko ab’i Rusizi nabo bakihagararaho berekana ko bambutse ishyamba rya Nyungwe bashaka kwitwara neza.

Uburyo bukomeye bwabonetse umukino ugitangira ku munota wa gatatu ubwo Umunya-Mali, Abdallah yateraga ishoti rikomeye ariko umuzamu wa Espoir FC abyitwaramo neza.

Nko ku bindi bibuga bya hamwe mu turere bitubakiye nabyo ubwabyo bikaba ari bibi, igice cya kabiri gitangiye imvura yaguye abafana benshi cyane bari kuri uyu mukino babura aho bugama abakinnyi nabo gutera umupira biba ihurizo kubera ibitaka.

Kuri uyu mukino, amakipe yombi yakiniye hagati mu kibuga, ari nako abakinnyi ku mpande zombi batakazaga umupira bya hato na hato, ibintu abatoza bombi bemeje ko byatewe n’ikibuga kibi, byanatumye iminota 90 irangira nta kipe ibasha kureba mu izamu rya mugenzi ry’iyindi.

Umutoza wa Espoir FC, Ndayizeye Jimmy wakiniraga kuri iki kibuga bwa mbere yagize ati “ Umukino wari ukomeye, Bugesera FC ni ikipe nziza. Twagerageje gukina ariko ntibyari byoroshye kubera ikibuga kibi. Umusaruro nturaba mwiza nk’uko tubishaka ariko shampiyona nibwo itangiye haracyari imikino, tuzitwara neza.”

Mashami Vincent utoza Bugesera FC nawe nubwo akorera imyitozo kuri iki kibuga buri munsi yunze mu rya mugenzi agira ati “Sinabihisha gukinira ku kibuga kibi nta kipe biha amahirwe. Dufite abakinnyi batandukanye ariko ntabwo ushobora kubona ubuhanga bafite badashobora guhererekanya umupira.”

Nyuma y’umukino ndetse n’abayobozi bamaze gutaha, abafana ba Bugesera FC basubiranyemo bararwana ngo bitewe n’amafaranga bishyujwe kuri uyu mukino batavuzeho rumwe.

Bamwe mu bazitiye ikibuga nk’uko byavugwaga n’abari ku kibuga bakubiswe kuko ngo batumye abandi bishyuzwa.

Mu mukino wabereye kuri Stade Mumena, Gicumbi FC yanyagiye Kiyovu Sports ibitego 4-1 bya Rutayisire Egide watsinze bibiri, Mudeyi Suleyman na Muhumure Omar icy’impozamarira cya Kiyovu Sports gitsindwa na Bigirimana Blaise.

Imikino yo ku munsi wa gatatu wa shampiyona yarangiye:

- APR FC 3-1 Mukura VS

- Bugesera Fc 0-0 Espoir FC

- SC Kiyovu 1-4 Gicumbi FC

Imikino iteganyijwe kuri iki Cyumweru, tariki 30 Ugushyingo 2016

- Etincelles vs Musanze FC (Umuganda, 15:30)

- Amagaju FC vs Police FC (Huye, 15:30)

- Rayon Sports vs AS Kigali (Stade ya Kigali, 15:30)

- Sunrise FC vs Marines FC (Kicukiro, 15:30)

Abatoza ku mpande zombi bikomye ikibuga cya Bugesera FC
Mashami Vincent (iburyo) aganira na Kapiteni Rucogoza Aimable Mambo
Umutoza Mashami aha abakinnyi be amabwiriza mu karuhuko
Mugabo Prince wa Bugesera FC
Mwemere Ngirinshuti (ufite umupira) wahoze akinira Police FC, ahanganye n'umukinnyi wa Espoir FC
Umukino wakiniwe hagati mu kibuga cyane
Rutahizamu wa Bugesera FC, Abdallah ukomoka muri Mali yananiwe gufasha ikipe ye kubona amanota atatu
Rutahizamu wa Espoir FC, Ndikumana Bodo, yavuye mu kibuga asimbuwe
Umuzamu wa Espoir fc, Ntagungira yaguye amara umwanya munini akurikiranwa n'abaganga
Stade ya Bugesera FC yarazitiwe, ubu kwinjira ni ukwishyura
Umuzamu Kwizera Olivier nta kazi gakomeye yabonye kuri uyu mukino
Bugesera ni imwe mu makipe yo mu Ntara afite abafana benshi
Abafana ba Bugesera FC bari babukereye
Uyu mufana bamwicaje hasi mu kiziba
Abafana ba Bugesera FC bafatanye mu mashati karahava
Nyuma y'umukino, abafana ba Bugesera bakubise mugenzi wabo(uwicaye hasi)

Amafoto: Manzi Rema Jules


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved