Bugesera FC izakoresha ingengo y’imari ya miliyoni 190 FRW

Yanditswe na Ishimwe Israel
Kuya 9 Nzeri 2016 saa 08:05
Yasuwe : XX
0

Imyaka ibiri ishize ivuye mu cyiciro cya kabiri, kuzana umutoza Mashami Vincent, kwiyubaka igura abakinnyi b’inararibonye barimo umuzamu Kwizera Olivier, ni bimwe mu byo ubuyobozi bwa Bugesera FC bushingiraho buvuga ko iyi kipe izakoresha ingengo y’imari ya miliyoni 190 ifite ubushobozi bwo guhatanira igikombe.

Iyi kipe yamaze gutangira umwiherero aho abakinnyi bose n’abatoza barimo gutegura umwaka w’imikino utaha, ni imwe mu ziyubatse ku buryo bugaragara guhera ku mutoza kugera ku bakinnyi.

Perezida wa Bugesera FC, Gashugi Jean Claude yatangarije IGIHE ko intego y’ikipe muri uyu mwaka ari ukwitwara neza muri shampiyona ndetse no guhatanira igikombe.

Ati “Uyu mwaka turashaka kugaragaza impinduka, twabitangiye dushaka umutoza umwe mu bakomeye bari mu gihugu ndetse n’abakinnyi beza. Ikiba kigoye ni amafaranga yo guhemba, kurya no gutwara abakinnyi ku bibuga ariko ibi byose twamaze kubirebaho byarateguwe. […]kuko ikipe izakoresha ingengo y’imari igera kuri miliyoni 190 ariko hashobora no kuboneka andi ayunganira.”

Gashugi yatangaje ko amafaranga azakoreshwa mu ngengo y’imari azakusanywa binyuze mu nkunga y’Akarere, abafatanyabikorwa n’abikorera ndetse n’andi bahabwa n’Ishyirahamwe ry’umupira w’amaguru mu Rwanda, Ferwafa.

Ubuzima bushya ku bakinnyi n’abatoza

Perezida yavuze ko nubwo bataramenya amatariki shampiyona izatangiriraho, ariko ngo itazarenza ukwezi gutaha bityo bakaba bifuza ko ikipe iba hamwe nibura ukwezi cyangwa ukwezi n’igice ku buryo izajya gutangira bamaze kumenyerana kugira ngo batangire neza nta guhuzagurika.

Mu byo ubuyobozi bw’ikipe bushyize imbere harimo gucunga neza umutungo ndetse no guhembera abakinnyi ku gihe kugira ngo birinde ibibazo by’amikoro bikunze kugaragara mu makipe mu minsi ya nyuma ya shyampiyona.

Ikipe irimo kuzenguruka imirenge igize Akarere ka Bugesera yiyereka abafana

Bwa mbere kuva Bugesera FC yakandagiza ikirenge mu cyiciro cya mbere, ku busabe bw’abaturage bayikunda ngo ubuyobozi bwahisemo kubanza gukorera ingendo mu mirenge yose aho akarere kagabanyijwemo ibice bitatu, kugira ngo abakinnyi n’abatoza bajye gusura abaturage.

Bugesera FC ikina n’amakipe y’abana baho bakishimana bagakora n’ubusabane ari nayo mpamvu banze kwitabira irushanwa rya AS Kigali kuko ubutumire bwaje butinze baratangiye gahunda yo kuzenguruka mu mirenge.

Ku nshuro ya mbere iyi kipe izakora ibirori byo kwerekana abakinnyi bashya

Perezida yanavuze ko mbere y’uko shampiyona itangira, bazahamagara itangazamakuru bakaryereka abakinnyi bashya na nimero bazajya bambara ibi bikazakorwa ubwo umutoza Mashami Vincent azaba amaze gutoranya abakinnyi 25 azakoresha mu bagera kuri 35 bafite kugeza ubu.

Iyi kipe yaguze abakinnyi bakomeye barimo Kwizera Olivier, Bienvenue Mugenzi na Iradukunda Jean Bertrand bavuye muri APR FC na Mwemere Ngirinshuti wa Police FC.

Kuri uyu wa Gatandatu tariki 10 Nzeli Bugesera FC irakina umukino wa gishuti n’Amagaju uzabera i Nyagisenyi.

Abakinnyi ba Bugesera FC batangiye kuzenguruka akarere biyereka abaturage no gusabana nabo
Imikino Bugesera FC yakiriye abafana barakubita bakuzura
Nyuma yo gufasha Amavubi kunganya na Ghana, Mashami yageze muri Bugesera FC mu mwiherero n'abakinnyi
Umuzamu Kwizera Olivier yerekeje muri Bugesera avuye muri APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza